Իվանիշվիլին Վրաստանի վարչապետի պաշտոնում առաջադրել է իշխող կուսակցության նախագահի թեկնածությունը
Վրաստանի վարչապետի թեկնածու է առաջադրվել իշխող «Վրացական երազանք» կուսակցության նախագահ Իրակլի Կոբախիձեն։ Համապատասխան որոշումը հրապարակվել է փետրվարի 1-ին, «Վրացական երազանքի» համագումարում։ Կոբախիձեի թեկնածությունն առաջադրել է «Վրացական երազանքի» հիմնադիր և պատվավոր նախագահ, օլիգարխ և, ըստ լուրերի, երկրի ոչ պաշտոնական կառավարիչ Բիձինա Իվանիշվիլին։
Կոբախիձեն վարչապետի պաշտոնում կփոխարինի Իրակլի Ղարիբաշվիլիին, ով հրաժարական էր տվել հունվարի 29-ին։ Ղարիբաշվիլին իր հերթին արդեն զբաղեցրել է Կոբախիձեի տեղը՝ որպես «Վրացական երազանքի» նախագահ։
Համագումարից հետո Կոբախիձեն լրագրողներին ասել է, որ Ղարիբաշվիլիի վարչապետության երեք տարիները «առանձնահատուկ հաջող էին», և, հետևաբար, նա մտադիր չէ փոխել կառավարության կազմը: Փոխվելու է միայն պաշտպանության նախարարը, այն էլ՝ սեփական ցանկությամբ։
Ի՞նչ է ասվել համագումարում
Ընդամենը մեկ ամիս առաջ Բիձինա Իվանիշվիլին ասել էր, որ վարչապետի փոփոխություն չի նախատեսվում։ Իսկ այժմ լրագրողները հետաքրքրվել են, թե ինչու է նա ստել։ Իվանիշվիլին պատասխանել է, որ Ղարիբաշվիլին ինքն է ցանկացել հեռանալ իր պաշտոնից։
Ինքը՝ Իրակլի Ղարիբաշվիլին, իր ելույթում ընդգծել է, որ Վրաստանում տիրում է խաղաղություն՝ ի տարբերություն շատ հարևան երկրների։ Նրա խոսքով՝ անկախության վերականգնումից ի վեր առաջին անգամ այստեղ շարունակական ու երկարատև խաղաղության շրջան է սկսվել։
Այս և այլ ձեռքբերումների համար նա շնորհակալություն է հայտնել Բիձինա Իվանիշվիլիին և հայտարարել, որ «եթե Բիձինա Իվանիշվիլին և «Վրացական երազանքը» իշխանության ղեկին լինեին 2008 թվականին, օգոստոսյան պատերազմը չէր լինի։
«Բիձինա Իվանիշվիլին և «Վրացական երազանքը» շարունակում են մնալ խաղաղության և ժողովրդավարական զարգացման հիմնական երաշխավորները», — պնդել է Ղարիբաշվիլին։
Պոտենցիալ վարչապետ Իրակլի Կոբախիձեն նույնպես իր ելույթում շատ ժամանակ է հատկացրել՝ շնորհակալություն հայտնելով Իվանիշվիլիին իրեն վստահելու և կառավարության ղեկավարի պաշտոնում առաջադրելու և մնացած ամեն ինչի համար.
«Այն, որ այսօր Վրաստանում կա ժողովրդավարություն, խաղաղություն, տնտեսական առաջընթաց, և երկիրը ստացել է ԵՄ անդամակցության թեկնածուի կարգավիճակ, առաջին հերթին պարոն Բիձինա Իվանիշվիլիի վաստակն է։ Դրա համար հատուկ շնորհակալություն կուսակցության հիմնադրին»։
Կոբախիձեի խոսքով՝ Իվանիշվիլին իր երկրին ծառայելու օրինակ է։
Կոբախիձեն նաև շնորհակալություն է հայտնել Իրակլի Ղարիբաշվիլիին «վարչապետի պաշտոնում երեք տարվա շատ հաջող աշխատանքի համար» և կուսակցության գլխավոր քարտուղար Կախա Կալաձեին։
Կոբախիձեն կարծում է, որ «Վրացական երազանքը» խորհրդարանական ընտրություններին ընդառաջ է շարժվում բնակիչների մեծ աջակցության ֆոնին.
«Մեր թիմը 2012 թվականից ի վեր չի վայելել հասարակության այսքան բարձր վստահությունը։ Վստահ եմ, որ խորհրդարանական ընտրություններում մենք հաղթելու ենք շատ մեծ առավելությամբ»։
Կոբախիձեն մատնանշել է «Վրացական երազանքի» երկու հիմնական առաքելությունները.
- «Ֆիզիկապես և հոգեպես կատարյալ Վրաստանը, այսինքն՝ Վրաստանը Աբխազիայի և Հարավային Օսիայի հետ, աբխազների և օսերի հետ միասին»։
- Մարդկանց բարեկեցության եվրոպական մակարդակով Վրաստան, որտեղ ոչ ոք աղքատության մեջ չի ապրում։
