«Վրաց ժողովուրդը կընտրի կայունությունը, այլ ոչ թե առանց վիզայի ռեժիմը»․ Իրակլի Կոբախիձե

Կոբախիձեն ԵՄ-ին մեղադրում է շանտաժի մեջ

«Եթե հարց առաջանա՝ ո՞րն ընտրել՝ խաղաղություն և կայունությո՞ւն, թե՞ վիզային ռեժիմի [ԵՄ-ի հետ] ազատականացում: Անշուշտ, մենք առաջնահերթություն կտանք խաղաղությանն ու կայունությանը: Դա վրաց ժողովրդի ընտրությունն է»,- լրագրողների հետ զրույցում հայտարարել է «Վրացական երազանք» կուսակցության ներկայացուցիչ, վարչապետ Իրակլի Կոբախիձեն՝ մեկնաբանելով Եվրամիության կողմից Վրաստանի քաղաքացիների համար առանց վիզայի ռեժիմի կասեցման հնարավորությունը:

Կոբախիձեի խոսքով՝ քաղաքացին Եվրոպա կմեկնի վիզայո՞վ, թե՞ առանց վիզայի, գոյութենական հարց չէ, մինչդեռ «ընդունել նրանց առաջարկը, որը կխախտի մեր խաղաղությունն ու կայունությունը, գոյութենական հարց է»:

«ՌԴ-ն փորձում է խեղդել Հայաստանի տնտեսությունը Վրաստանի ձեռքերով»․ կարծիք

Քաղաքագետ Պաատա Զաքարեիշվիլի. «Ռուսաստանի և Հայաստանի միջև իրավիճակը ավելի ու ավելի է սրվում»

Եվրահանձնաժողովի նամակում, ինչպես նաև ԵՄ ներկայացուցիչների նախկին բազմաթիվ հայտարարություններում հստակ քննադատության են ենթարկվել Վրաստանում ընդդիմության առաջնորդների և եվրոպամետ ցույցերի մասնակիցների ձերբակալությունները:

Եվրահանձնաժողովը նաև պահանջել է չեղարկել 2025 թվականին ընդունված մի շարք օրենքներ, որոնք հանգեցնում են «քաղաքացիական հասարակության և անկախ լրատվամիջոցների նկատմամբ բռնաճնշումների»:

Ի՞նչ է հայտարարել Իրակլի Կոբախիձեն

Վերոնշյալ քննադատությունները մեկնաբանելիս Իրակլի Կոբախիձեն նշել է՝

«Ինչ վերաբերում է բանտարկյալներին, մենք ունենք հստակ պատասխան՝ այն անձը, ով այժմ ձերբակալված կամ բանտարկված է Վրաստանում, կատարել է կոնկրետ հանցագործություն:

Թող Եվրոպական հանձնաժողովը ներկայացնի ապացույցներ, եթե ունի իրավական հարցադրումներ այդ գործերից որևէ մեկի վերաբերյալ:

Բայց նման ապացույցներ նրանք չունեն, դրանք դատարկ քաղաքական վերջնագրեր են, ինչն ափսոսանք է առաջացնում:

Ինչ վերաբերում է նոր օրենքներին: Ընտանեկան արժեքների և անչափահաս անձանց շահերի պաշտպանության մասին օրենքն է, կազմակերպությունների և մեդիայի ֆինանսավորման թափանցիկության մասին օրենքը, և բոլորն էլ շատ կարևոր են մեր երկրի համար:

«Թափանցիկության» մասին օրենքը հեղափոխությունների թափանցիկության մասին է: Եթե ինչ-որ մեկը ցանկանում է Վրաստանում հեղափոխական գործընթացներ ֆինանսավորել, ապա դա պիտի անի թափանցիկ:

Մենք պատրաստ ենք այդ հարցերի շուրջ առողջ քննարկումներ վարել բոլոր սուբյեկտների հետ: Բայց կարևոր է, որ Եվրոպական միությունը վրացական հասարակությանը չներկայանա որպես Խորհրդային Միություն:

Ինչ էր կատարվում Խորհրդային Միությունում: Հրահանգները գալիս էին Մոսկվայից, եթե չէիր կատարում, քեզ պատժում էին: Ուրեմն ինչո՞վ է Բրյուսելը տարբերվում Մոսկվայից: Բրյուսելը չպիտի հիշեցնի խորհրդային Մոսկվան:

Մեր ձեռնարկած բոլոր քայլերն ուղղակիորեն համապատասխանում են մարդու հիմնարար իրավունքներին: Մենք պատասխանատվություն ենք կրում Վրաստանի խաղաղության, կայունության ու երկրի զարգացման պահպանման համար: Սխալ է վրաց ժողովրդին շանտաժի ենթարկել նրանով, որ նա իշխանության չվերադարձրեց արյունոտ քաղաքական ուժին [հավանաբար, Կոբախիձեն նկատի ունի նախկին նախագահ Միխեիլ Սաակաշվիլիին և նրա «Ազգային շարժում» կուսակցությունը- JAMnews]:

Եթե ինչ-որ մեկը հարցը դնում է այսպես՝ կամ խաղաղություն և կայունություն, կամ վիզային ռեժիմի ազատականացում, դա նշանակում է, որ նրանք ուզում են մեզնից խլել խաղաղությունն ու կայունությունը:

Երբ ասում են, որ մենք չպիտի ընդունենք օրենք, որը սահմանափակում է օտարերկրյա ուժերի կողմից երկրում հեղափոխության կազմակերպումը, նշանակում է՝ նրանք մեզ սպառնում են կայունության ու խաղաղության կորստով:

Եթե հարց առաջանա՝ ո՞րն ընտրել՝ խաղաղություն և կայունությո՞ւն, թե՞ վիզային ռեժիմի ազատականացում: Անշուշտ, մենք առաջնահերթություն կտանք խաղաղությանն ու կայունությանը: Դա վրաց ժողովրդի ընտրությունն է: Մենք ընտրում ենք խաղաղությունն ու կայունությունը, մենք չենք հանձնվի:

Եվրոպա գնում եք վիզայո՞վ, թե՞ առանց վիզայի՝ գոյութենական հարց չէ: Իսկ ընդունել նրանց առաջարկը, որը կխախտի մեր խաղաղությունն ու կայունությունը, գոյութենական հարց է:

Երբ գոյութենական հարցը բախվում է ոչ գոյութենականի հետ, անհրաժեշտ է նախապատվությունը տալ գոյութենականին:

Բոլորն արդեն հասկացել են, որ Բիձինա Իվանիշվիլին չի վախենում պատժամիջոցներից: Նրա նկատմամբ ոչ պաշտոնական պատժամիջոցներ էին սահմանվել, երկու միլիարդ դոլար պահում էին արել՝ կողոպտիչ և ամոթալի ձևով:

Այդպիսի վարքագիծն ընդունելի՞ է Եվրոպայի համար: Երբ առանց որևէ հիմքի երկու միլիարդ են պահում անում առևտրային բանկի միջոցով, մի մարդուց, ով զբաղեցնում էր բարձր քաղաքական պաշտոն և շարունակում է զբաղեցնել այն այսօր: Անշուշտ, սրանք գործողություններ են, որոնք հարիր չեն Եվրոպային:

30-40 տարի առաջ մենք չէինք էլ կարող պատկերացնել նմանատիպ որևէ բան Եվրոպայում: Սակայն, դժբախտաբար, Եվրոպան հասել է այս կետին, և սա, իհարկե, «խորը պետության» գործունեության և ազդեցության արդյունքն է:

Այս իրավիճակը, անշուշտ, ողբերգական է: Բիձինա Իվանիշվիլին չի վախենում ոչ պաշտոնական, ոչ էլ ոչ պաշտոնական պատժամիջոցներից: Նրանք Եվրոպայում մեզ հետ խոսում են շանտաժի լեզվով: Բայց դա ոչ մի ազդեցություն չի ունենա»:

Վրաստանի նախագահը ձերբակալված ընդդիմադիրներին ներման ակտ է խոստանում․ ինչի՞ դիմաց

«Մենք նրան ցույց կտանք դեպի ռուսական նավ տանող ճանապարհը»․ ընդդիմության ձերբակալված առաջնորդները մերժել են առաջարկը՝ հայտարարելով, որ «չեն ուզում լեգիտիմացնել «Վրացական երազանք»-ին

Հետևեք մեզ — Facebook | Youtube | Telegram

Կոբախիձեն ԵՄ-ին մեղադրում է շանտաժի մեջ