«Տարածաշրջանային անվտանգություն և խաղաղություն». Կոբախիձե-Ալիև հանդիպում Թբիլիսիում
Կոբախիձե-Ալիև հանդիպում Թբիլիսիում
Վրաստանի վարչապետ Իրակլի Կոբախիձեն հանդիպել է Ադրբեջանի նախագահ Իլհամ Ալիևի հետ, որը Թբիլիսի էր ժամանել պաշտոնական այցով: Վրաստանի կառավարության մամուլի ծառայության հաղորդմամբ՝ հանդիպման ընթացքում քննարկվել են երկու երկրների միջև ռազմավարական գործընկերության խորացումն ու տարբեր ոլորտներում համագործակցության զարգացումը:
Կողմերը նշել են, որ Թբիլիսիի և Բաքվի միջև տնտեսական կապերը շարունակում են մնալ առաջնահերթություն։
Այս համատեքստում ընդգծվել է Վրաստանի և Ադրբեջանի միջև տնտեսական համագործակցության միջկառավարական հանձնաժողովի դերը, հաջորդ նիստը նախատեսվում է անցկացնել Վրաստանում՝ մոտ ապագայում։ Պաշտոնական հայտարարության համաձայն՝ համագործակցությունը ներառում է էներգետիկայի, տրանսպորտի և առևտրի ոլորտները։
Որպես հանդիպման հիմնական թեմաներ մատնանշվել են տարածաշրջանային անվտանգությունն ու խաղաղությունը։ Կոբախիձեն ընդգծել է, որ Վրաստանը ողջունում է Ադրբեջանի և Հայաստանի միջև ընթացող երկխոսությունը և այն համարում է տարածաշրջանային կայունությանն ուղղված կարևոր քայլ։
Կողմերը քննարկել են նաև Մերձավոր Արևելքում տեղի ունեցող զարգացումները։ Նրանց կարծիքով՝ իրավիճակի ապաէսկալացիայի համար անհրաժեշտ են դիվանագիտական ջանքերի ուժեղացում և միջազգային համագործակցություն։
Ալիևի այցի ֆոնին ուշադրության է արժանացել նաև մեկ այլ իրադարձություն. ապրիլի 5-ին Վրաստանից արտաքսվել է ադրբեջանցի լրագրող, ակտիվիստ Աֆղան Սադիգովը, որ մեղադրվում էր սոցիալական ցանցերում ոստիկանին վիրավորելու մեջ։
Լույս ապրիլի 4-ի գիշերը Սադիգովի ձերբակալման մասին հաղորդագրություններ էր հրապարակել նրա փաստաբանը՝ Սոցիալական արդարության կենտրոնի ղեկավար Թամթա Միքելաձեն։ Սադիգովին տուգանել են 2000 լարիով [մոտավորապես 750 դոլար] և արգելել են նրա մուտքը Վրաստան 3 տարով։
Ապրիլի 6-ին Սադիգովի կինը հայտարարել է, որ ակտիվիստն արդեն ձերբակալվել է Ադրբեջանում, նրա գտնվելու վայրն անհայտ է։ Նրա խոսքով՝ Վրաստանից ամուսնու արտաքսումը «քաղաքական դրդապատճառներով պայմանավորված որոշում» էր։
Լրագրողի փաստաբան Թամթա Միքելաձեն հայտնել է, որ ադրբեջանական դատարանը ազատ է արձակել Սադիգովին։
Հետևեք մեզ — Facebook | Youtube
Կոբախիձե-Ալիև հանդիպում Թբիլիսիում
