Հայաստանում սկսել են Կալաշնիկովի ինքնաձիգներ արտադրել

Հայաստանում սկսել են Կալաշնիկովի ինքնաձիգներ արտադրել։ Տեղական արտադրության ինքնաձիգների առաջին նմուշները Զինված ուժերը կստանան հուլիսի վերջին։

Հայաստանի վարչապետը Հայաստանում գործարանի բացումը գնահատում է որպես ռազմական արդյունաբերությունում հայ–ռուսական սերտ համագործակցության արդյունք։

Ընդ որում, գործարանի բացումը ժամանակային առումով համընկել է ընդդիմադիրների հայտարարությունների հետ այն մասին, թե կառավարությունը ձախողել և անգամ տապալել է Ռուսաստանի հետ դաշնակցային հարաբերությունները։

Մասնավորապես, այդպիսի հայտարարություն է արել «Բարգավաճ Հայաստան» ընդդիմադիր կուսակցության առաջնորդ Գագիկ Ծառուկյանը։ Նա իշխանություններին մեղադրել է «հակառուսական տրամադրությունների արհեստական սրման» համար։

Իսկ իշխանությունները բոլոր հնարավոր առիթների դեպքում ընդգծում են, որ Ռուսաստանի հետ հարաբերություններում ոչ մի խնդիր չկա։

«Հայաստանում չկան և չեն լինելու հակառուսական տրամադրություններ, և ոչ ոք չի սադրում և չի կարող սադրել հակառուսական օրակարգ Հայաստանում», – ի պատասխան հայտարարել է «Իմ քայլն» իշխող խմբակցության պատգամավոր Ռուբեն Ռուբինյանը։

● Ո՞ւմ Ռուսաստանն ավելի շատ «կսիրի» Հայաստանում։ Ներքաղաքական իրավիճակի և Կրեմլի հետ հարաբերությունների միջև կապը

● Հայաստանում, չնայած կորոնավիրուսի համավարակին, սկսվել է ամառային զորակոչը

Ի՞նչ է արտադրելու գործարանը և ի՞նչ քանակությամբ

Նախնական փուլում ԱԿ-103 ինքնաձիգները Հայաստանում հավաքելու են Ռուսաստանից բերված պահեստամասերից։ Սակայն ժամանակի ընթացքում արտադրական ողջ գործընթացը Հայաստանում է իրականացվելու։

Գործարանը «Նեյտրոն» գիտաարտադրական միավորման մաս է կազմում։ Ամեն տարի այն արտադրելու է 50 հազար ինքնաձիգ։

Սա մեծ թիվ է հայկական բանակի համար, այդ պատճառով էլ ռազմական փորձագետների մեծ մասը կարծում է, որ տեղական արտադրության զենքի մի մասն արտահանվելու է։ Սակայն ընկերության ղեկավարությունն արտահանման հնարավորություները դեռևս չի մեկնաբանում։

Կալաշնիկովի ինքնաձիգներից բացի գործարանում նախատեսված է նաև նանոմանրաթելի և նանոմանրաթելից պատրաստված սարքերի արտադրություն։ Մասնավորապես, խոսքը գնում է օպտիկաէլեկտրոնային սարքերի, գիշերային տեսադիտման սարքերի և գիշերային ջերմային նշանոցների արտադրության մասին։

Քանի որ Հայաստանում կազմակերպվելու է զենքի արտադրության լիարժեք գործընթաց, Աբովյան քաղաքում լրացուցիչ մեծ արդյունաբերական գոտի է կառուցվում։ Այդտեղ արտադրվելու են նաև տարբեր տրամաչափի փամփուշտներ։ Հաղորդվում է, որ, ընդհանուր առմամբ, այդ արտադրությունը կապահովի մինչև 1200 նոր աշխատատեղ։ 

Զենքի շոփինգ 

Խաղաղության խնդիրների հետազոտման ստոկհոլմյան միջազգային ինստիտուտի զեկույցի տվյալներով՝ վերջին 5 տարում Հայաստան ներկրվող գրեթե ողջ զենքը Ռուսաստանից է բերվել։ 

Մասնավորապես, անցյալ տարի Հայաստանը մեծ քանակությամբ զենք և ռազմական տեխնիկա է ձեռք բերել։ Հայաստանի կառավարության 2019 թ–ի ծրագրի կատարման ընթացքի մասին զեկույցի համաձայն՝ ձեռք են բերվել Սու–30ՍՄ բազմաֆունկցիոնալ կործանիչներ, «ՏՕՐ-Մ2ԿՄ», «Օսա-ԱԿ» զենիթահրթիռային համալիրներ։ Հայկական բանակը ձեռք է բերել նաև հրետանային և հրաձգային զենք, զինամթերք, զենիթային կայաններ և ավտոմոբիլային տեխնիկայի հարյուրավոր միավորներ։