Ադրբեջանցի ընդդիմադիր գործիչը մեկ ու կես ամսում երկրորդ անգամ է կալանավորվել
Ադրբեջանի ժողովրդական ճակատ կուսակցության (ԱԺՃԿ) նախագահի օգնական Ֆայիգ Ամիրլին 15 օրով կալանավորվել է մանր խուլիգանության մեղադրանքով, հաղորդում է «Կավկազսկի ուզելը»։ Մեկ ու կես ամսում Ամիրլին արդեն երկրորդ անգամ է կալանավորվում․ ապրիլի 8–ին նա դատապարտվել էր 30–օրյա կալանքի՝ կարանտինային ռեժիմի խախտման մեղադրանքով։ Բացի այդ, մայիս ամսվա ընթացքում տարբեր վարչական և քրեական մեղադրանքներով կալանավորվել է ԱԺՃԿ ևս մի քանի անդամ։ Կուսակցության փոխնախագահ Գյոզալ Բայրամլին կարծում է, որ իշխանություններն «ԱԺՃԿ դեմ աննախադեպ բռնաճնշումների արշավ են վարում»։
- «Ադրբեջանում ապրելն իմ իրավունքն է»։ Խղճի նախկին գերի, լրագրող և քաղէմիգրանտ Աֆղան Մուխտարլին պատմել է իր պլանների մասին
- Քաղաքական գործիչները՝ կորոնավիրուսի մասին։ Ինչո՞ւ է Հայաստանը վարակվածների թվով առաջատարը տարածաշրջանում
Ֆայիգ Ամիրլին նախկին քաղբանտարկյալ է, որը 2016 թ–ին մեղադրվել էր կրոնական թշնամանք սերմանելու համար և դատապարտել 3 տարվա և 3 ամսվա ազատազրկման, իսկ մեկ տարուց պայմանական–վաղաժամկետ ազատ արձակվել։ Այդ օրվանից Ամիրլին բազմիցս կալանավորվել է տարբեր վարչական մեղադրանքներով։
Մայիսի 24–ին Ամիրլին կնոջ հետ մեկնել էր Բաքվից դեպի հարավ–արևմուտքում գտնվող Սաբիրաբադ քաղաք՝ Ռամադան տոնի առթիվ ծնողների գերեզմանն այցելելու համար։ Տեղի ոստիկանությունը նրան կալանավորել էր իր իսկ տանը և նույն օրը դատապարտել 15–օրյա կալանքի։ Նա մեղադրվում է խուլիգանության համար, սակայն պարզ չէ, թե ինչի մասին է խոսքը։
«Կարծես, մեր ակտիվիստների կալանավորման երկրորդ շրջան է սկսվել։ Մարտի վերջից վարչական կարգով կալանավորվել է մեր կուսակցության 17 անդամ, երեքը քրեական պատասխանատվության են ենթարկվել, ևս մեկը հոգեբուժարան է ուղարկվել։ ԱԺՃԿ առաջնորդը փաստացի տնային կալանքի տակ է, ապրիլի 13–ից նա զրկված է ֆիքսված և բջջային ինտերնետից», – ասում է Գյոզալ Բայրամլին։
Ներքին գործերի նախարարությունը չի մեկնաբանել Ամիրլիի կալանքը։ Սակայն ավելի վաղ ՆԳՆ–ն հերքել էր, որ հետապնդում է ընդդիմադիրներին քաղաքական շարժառիթներով։