«Թույլ չտալ Բաքվին հեռարձակել արցախցի պաշտոնյաների հետ բեմադրած զրույցները»․ կոչ
ԼՂ պաշտոնյաների հարցազրույցների հեռարձակումը
«Ադրբեջանի կողմից հայ ռազմագերիների և պատանդների հետ բեմադրված հարցազրույցների հեռարձակումը նրանց իրավունքների ուղղակի խախտում է և ավելի է խորացնում նրանց առանց այն էլ ծանր վիճակը»,- հայտարարել է Արցախի ժողովրդի հիմնարար իրավունքների պաշտպանության հանձնախումբը։
Հայաստանի նախկին արտգործնախարար Վարդան Օսկանյանի համակարգմամբ գործող կառույցն այդպես է արձագանքել Բաքվի կողմից տարածվող անոնսներին։ Ադրբեջանը պատրաստվում է մարտի վերջին հրապարակել հարցազրույցներ Բաքվի բանտերում պահվող Արցախի նախկին բարձրաստիճան պաշտոնյաների, այդ թվում՝ նախկին նախագահների։ Նրանք Ադրբեջանում են հայտնվել 2023 թ․-ի սեպտեմբերին Լեռնային Ղարաբաղում իրականացված ռազմական գործողությունների արդյունքում։
Հանձնախմբի գնահատմամբ՝ Ադրբեջանը «մանիպուլյատիվ մարտավարություն» է որդեգրել, որը խաթարում է միջազգային մարդասիրական իրավունքի ամբողջականությունը։ Կարծում են՝ միջազգային հանրությունը պետք է անվերապահորեն դատապարտի դա։
Հանձնախումբը ստեղծվել է 2024 թ․-ի հունվարին։ Նպատակը Արցախի ժողովրդի հավաքական հայրենադարձության և հիմնարար այլ իրավունքների պաշտպանությունն է։
Խմբի աշխատանքների համակարգումը ստանձնելուց հետո Վարդան Օսկանյանը համոզմունք էր հայտնել, որ տևական և կայուն խաղաղություն կարող է բերել միայն խնդրի «հավասարակշռված լուծումը, որը ներառում է Արցախի ժողովրդի իրավունքների վերականգնումը»։
«Ռազմագերիներին հանրային հետաքրքրասիրության առարկա դարձնելն արգելված է»
Հանձնախումբը հայտարարել է՝ ռազմագերիների՝ հանրային հետաքրքրասիրությունից զերծ մնալու իրավունքն ամրագրված է ռազմագերիների հետ վարվելակերպի մասին Ժնևի երրորդ կոնվենցիայում:
Ըստ այդմ՝ Բաքվում պահվող հայ ռազմագերիներին պատկերող տեսանյութերի հրապարակային հեռարձակումը նրանց անձնական կյանքի և արժանապատվության անձեռնմխելիության իրավունքի կոպիտ խախտում է։
Շեշտում են՝ նման գործողությունները ոչ միայն դատապարտելի են բարոյական տեսանկյունից, այլև ուղղակիորեն հակասում են միջազգային մարդասիրական իրավունքին․
«Այս գործողությունները խախտում են Մարդու իրավունքների համընդհանուր հռչակագիրը, որը հաստատում է գաղտնիության և անձնական կյանքի, ընտանիքի, բնակարանի կամ նամակագրության կամայական միջամտությունից պաշտպանվելու իրավունքը»։
«Հրատապ և վճռական գործողություններ են պետք»
Խախտումները, ըստ հանձնախմբի, աղաղակող են, ուստի անհրաժեշտ է, որ Ժնևյան կոնվենցիաների մասնակից երկրները միջոցներ ձեռնարկեն և թույլ չտան Ադրբեջանին հետագայում հեռարձակել ռազմագերիների և պատանդների հետ տեսանյութեր կամ հարցազրույցներ:
«Սա ներառում է դիվանագիտական ուղիների օգտագործում, անհրաժեշտության դեպքում պատժամիջոցների կիրառում և հրապարակային դատապարտում»,- ասված է հայտարարությունում։
Կարևոր են համարում նաև այն, որ այդ երկրները ձեռնարկեն հրատապ և վճռական գործողություններ՝ կանխելու համար նման տեսանյութերի որևէ վերահեռարձակում իրենց իրավասության տակ գտնվող սերվերների, ԶԼՄ-ների հարթակներում։
«Այս գործողությունները սպառնում են նաև տարածաշրջանային կայունությանը և խաղաղությանը»
Արցախի ժողովրդի հիմնարար իրավունքների պաշտպանության հանձնախմբի գնահատմամբ՝ Բաքվի այս նախաձեռնությունը ոչ միայն խաթարում է մարդասիրության և արժանապատվության սկզբունքները, այլև սպառնում է տարածաշրջանային կայունությանը և խաղաղությանը։
Նախաձեռնող խմբի անդամները նշում են՝ պատրաստ են աշխատել միջազգային հանրության հետ ինչպես այդ խախտումների վերացման, այնպես էլ հակամարտության հետևանքով տուժած բոլոր անձանց իրավունքների պաշտպանության ապահովման ուղղությամբ․
«Կոչ ենք անում բոլոր պետական դերակատարներին և միջազգային կազմակերպություններին շարունակել պահանջել անհապաղ և անվերապահ ազատ արձակել ապօրինի ադրբեջանական գերության մեջ պահվող բոլոր հայերին»։
Հետևեք մեզ — Facebook | Youtube | Telegram
ԼՂ պաշտոնյաների հարցազրույցների հեռարձակումը
