Զինծառայողի զոհվելու կամ անհետ կորած ճանաչվելու դեպքում փոխհատուցում ստանալու իրավունք կունենան նաև նրա քույրը, եղբայրը, տատը կամ պապը: Կարգավորումը կգործի այն դեպքում, եթե զինծառայողի ծնողը, ամուսինը և զավակները բացակա ճանաչվեն:
Փետրվարի 9-ին Հայաստանի խորհրդարանը երկրորդ ընթերցմամբ ընդունել է օրենքի նախագիծը:
Ազգային ժողովը «Քաղաքացիական պայմանագիր» խմբակցության պատգամավոր Հայկ Սարգսյանի հեղինակած նախագիծն ընդունել է միաձայն: Կողմ է քվեարկել 92 պատգամավոր:
Ըստ այդմ՝ լրացումներ կկատարվեն «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում:
Օրենքի նախագիծը ԱԺ պատգամավորներն առաջին ընթերցմամբ ընդունել էին այս տարվա հունվարի 20-ին:
Նոր կարգավորման համաձայն՝ եթե զինծառայողի ծնողը, ամուսինը և զավակները բացակայում են, փոխհատուցման շահառու կարող են հանդիսանալ նաև ծառայողի քույրը, եղբայրը, տատը կամ պապը: Օրենքի այս դրույթը տարածվում է 2017 թվականի հունվարի 1-ից հետո տեղի ունեցած դեպքերի վրա:
Ըստ օրենքի՝ շահառուների բացակայություն է համարվում նրանց ֆիզիկապես գոյություն չունենալը, այդ թվում՝ դատական կարգով անհայտ բացակայող կամ մահացած ճանաչված լինելը, ծնողական իրավունքներից զրկված լինելը կամ համապատասխան կարգավիճակ չունենալը:
Օրենքը տարածվում է նաև այն դեպքերի վրա, երբ զինծառայողը գտնվել է փաստական ամուսնության մեջ, սակայն ամուսնության պետական գրանցում չի արվել: Այս պարագայում զինծառայողի կինը պետք է ներկայացնի համատեղ ամուսնական կենցաղ վարելու վերաբերյալ հավաստի տեղեկություններ, եկեղեցու տրամադրած պսակադրության վկայական, համատեղ կյանքի լուսանկարներ, հարազատների, բարեկամների և հարևանների գրավոր հավաստումները և այլ ապացույցներ:
Փաստական հանգամանք է դիտարկվելու նաև կենսաբանական երեխաների առկայությունը:
«Օրենքի փոփոխությամբ ֆիքսել ենք, որ զոհված զինծառայողի հետ համատեղ զավակ ունեցող, սակայն ամուսնալուծված անձը չի համարվում շահառու», — տեղեկացրել է նախագծի հեղինակ, իշխող ուժի պատգամավոր Հայկ Սարգսյանը։
Ապացույցները պետք է ներկայացվեն Զինծառայողների ապահովագրության հիմնադրամի հոգաբարձուների խորհուրդ: Միայն խորհրդի հաստատումից հետո զինծառայողի կինը կարող է համարվել շահառու:
«Քաղաքացիական պայմանագիր» խմբակցության պատգամավոր Հայկ Սարգսյանը զինծառայողներին վերաբերող ևս մեկ նախագիծ է շրջառանության մեջ դրել: Պատգամավորն առաջարկում է պարտադիր զինվորական ծառայությունից ազատել մարտական գործողությունների ժամանակ հայր կամ եղբայր կորցրած տղաներին:
Ընդունման պարագայում օրենքը տարածվելու է ոչ միայն 44-օրյա պատերազմի, այլև մարտական բոլոր գործողությունների ժամանակ տեղի ունեցած մահվան ելքով միջադեպերի վրա: Իսկ մինչ այդ նախագիծը պետք է ստանա ԱԺ գլխադասային հանձնաժողովի դրական եզրակացությունն ու ընդգրկվի խորհրդարանի լիագումար նիստերի օրակարգում:
