Երկու ոստիկան է սպանվել Ադրբեջանի Գյանջա քաղաքում բողոքի ցույցի ժամանակ

Երկու ոստիկան է սպանվել հուլիսի 10-ին Բաքվից մոտ 400 կմ դեպի հյուսիս գտնվող Գյանջա քաղաքում բողոքի ակցիան ցրելու ժամանակ:

Բողոքի ակցիայի պատճառ են դարձել մեկ շաբաթվա վաղեմության իրադարձությունները: Հուլիսի 3-ին Գյանջայում կրակել են քաղաքի գործադիր իշխանության ղեկավար Էլմար Վելիևի վրա: Վերջինս իր թիկնապահի հետ միասին վիրավորվել է, բայց երկուսն էլ կենդանի են մնացել: Կրակողն այդ ժամանակ դեռ անհայտ Յունիս Սաֆարովն էր:

Նա այժմ քննության տակ է պետական հեղաշրջման փորձի մասնակցության մեղադրանքով: Սակայն Ադրբեջանում շատերը նրա արարքն ընկալել են որպես «բողոք դաժան պաշտոնյայի դեմ» և համարում են «վրիժառու և ժողովրդի պաշտպան»:

Բողոքի ակցիան սկսվել է Գյանջայում հուլիսի 10–ի երեկոյան: Գործադիր իշխանության շենքի մոտ գրեթե 200 մարդ էր հավաքվել: Այդ ակցիան անցկացնելու կոչեր, ինչպես նշում են գյանջացիները, հնչել են՝ քաղաքի գործադիր իշխանության ղեկավարի նկատմամբ մահափորձի պահից սկսած:

Տեսանյութից հնարավոր չէ հասկանալ, թե արդյոք հավաքվածների մոտ զենք եղել է, թե ոչ, սակայն ՆԳՆ վարկածով՝ նրանց մոտ «ծակող-կտրող առարկաներ» կային:

https://www.youtube.com/watch?v=ldR_b42JHsU

Ցույցը ցրել են, սակայն երկու ոստիկան է սպանվել՝ գնդապետ Իլգար Բալաքիշիևն ու գնդապետ-լեյտենանտ Սամեդ Աբասովը: Ոստիկանությունը 40 մարդ է ձերբակալել:

ՆԳՆ-ն հաղորդում է, որ ակցիային արմատական իսլամիստներ են մասնակցել, և, ընդհանուր առմամբ, Վելիևի նկատմամբ մահափորձը համարում է «երկրում քաոս սերմանելու, պետական հեղաշրջում կատարելու և Ադրբեջանն իսլամական պետության վերածելու փորձ»:

Ինչպես JAMnews-ին պատմել է Գյանջայի բնակիչներից մեկն, այսօր քաղաքում ամեն ինչ հանգիստ է:

Վելիևի նկատմամբ մահափարձն իշխանությունների լուրջ արձագանքն ու հասարակությունում մեծ ռեզոնանս է առաջացրել:

Հետևանքները.

— Սաֆարովից զատ կալանավորվել է ևս 11 մարդ: Դեռևս հայտնի չէ, թե ինչ մեղադրանք է նրանց առաջադրվել,

— 17 բլոգեր և սոցցանցերի օգտատեր է քրեական և վարչական պատասխանատվության ենթարկվել «ապօրինի կոչերի» համար,

— Չորս կայք է արգելափակվել (bastainfo.com, criminalaz.com, topxeber.az և fia.az), դրանց խմբագիրների դեմ քրեական գործեր են հարուցվել ապատեղեկատվություն տարածելու մեղադրանքով: Ընդ որում, bastainfo.com-ն ասում է, օրինակ, որ իրենք հրապարակել են այդ գործի վերաբերյալ այլ տեղեկատվական գործակալությունների նորությունները և չեն պաշտպանել Սաֆարովին:

Այդ ակցիան սոցցանցերում քննարկելիս շատերն (օրինակ, ընդդիմադիր լրագրող Խադիջա Իսմայիլը) զուգահեռներ են անցկացնում դրա և Բաքվին մոտ գտնվող Նարդարան ավանում տեղի ունեցած անկարգությունների հետ: 2015թ-ին այնտեղ նույնպես բախում տեղի ունեցավ իսլամական շարժման ակտիվիստների և ոստիկանության միջև: Զոհվեց 6 մարդ, որոնցից երկուսը ոստիկան էին, ինչպես և այս անգամ: Ավան, որն ավանդաբար համարվում էր Ադրբեջանում «արմատական իսլամի բույն» մինչև հիմա կարելի է մտնել միայն ոստիկանական անցակետով, իսկ իրավիճակը խստորեն վերահսկվում է իշխանությունների կողմից: