Եվրոպացի դիտորդները հայտարարել են, որ Հայաստանում «ընտրությունները լավ կազմակերպված են եղել»

Կենտրոնական ընտրական հանձնաժաղովի հրապարակած նախնական արդյունքների համաձայն՝ Հայաստանի խորհրդարանում ընտրություններին մասնակցած 9 քաղաքական ուժերից չորսն են ներկայացված լինելու. իշխող Հանրապետական կուսակցությունը, «Ծառուկյան» դաշինքը, «Ելք» դաշինքն ու «Դաշնակցություն» կուսակցությունը:

Ձայների մեծամասնություն ստացած Հանրապետական կուսակցությունը նոր խորհրդարանում կներկայացնեն 58 պատգամավոր, «Ծառուկյան» դաշինքը՝ 30, «Ելք» դաշինքը՝ 9, «Դաշնակցություն» կուսակցությունը՝ 7 պատգամավոր: 

ԵԱՀԿ Մարդու իրավունքների և ժողովրդավարական ինստիտուտների բյուրոյի դիտորդները հայտարարել են, որ ապրիլի 2-ին անցկացված խորհրդարանական ընտրությունները «լավ էին կազմակերպված և, ընդհանուր առմամբ, պահպանվել են ազատությունները»: Դիտորդների մոտ բացասական տպավորություն է ստեղծվել ընտրակաշառք բաժանելու և ընտրողների վրա ճնշում գործադրելու մասին «վստահության արժանի աղբյուրներից» ստացված տեղեկություններից:

ԵԱՀԿ ՄԻԺԻ դիտորդական առաքելության համակարգող Իգնասիո Սանչես Ամորն արդյունքներն ամփոփելիս կոչ է արել «խորհրդարանական մեծամասնությանն ու կառավարությանը, որ շարունակեն բարեփոխումների քայլերը քաղաքացիական հասարակության և միջազգային հանրության հետ մեկտեղ»:

Հայաստանի նախագահը նույնպես հայտարարությամբ է հանդես եկել՝ շնորհակալություն հայտնելով քաղաքական ուժերին ակտիվ և ընդհանուր առմամբ կոռեկտ քաղաքական պայքարի համար. «Դա գեղեցիկ պայքար էր, որի նպատակը երկրի զարգացման հարցերի վերաբերյալ կարծիքների և դիրքորոշումների համադրությունն ու հակադրությունն էր»:

Սարգսյանն անդրադարձել է նաև Նոր ընտրական օրենսգրքով քվեարկության ընթացակարգին և ընտրություններին ժամանակակից տեխնիկայի օգտագործմանը (ընտրողների էլեկտրոնային նույնականացում է կատարվել և մատնահետք վերցվել). «Մենք նորովի ենք կազմակերպել ընտրական գործընթացը, որի շնորհիվ կոպիտ խախտումների զգալի մասն անցյալում է մնացել»:

Հայաստանի առաջին նախագահ Լևոն Տեր-Պետրոսյանն ընտրություններին մասնակցել է «Հայ ազգային կոնգրես – Հայաստանի ժողովրդական կուսակցություն» դաշինքով, որը հավաքել է ընտրողների ձայների մոտ 2%-ը:

Ընտրությունների արդյունքը գնահատելով՝ Տեր-Պետրոսյանը հայտարարել է. «Մեզ մնում է միայն սպասել, թե ինչպես են ՀՀԿ-ն «Բարգավաճ Հայաստանը» [Ծառուկյանի գլխավորած կուսակցությունը], ՀՅԴ-ն և «Ելքը» տնտեսությունը զարգացնելու «վագրի թռիչքներով», միլիարդավոր ներդրումներ ապահովելու, բանակն ամրապնդելու, արտագաղթը կանգնեցնելու և լուծելու ժողովրդի առջև կանգնած հիմնական խնդիրը՝ ղարաբաղյան հակամարտությունը»:

Դաշինքն ընտրություններին մասնակցում էր «Խաղաղություն, հաշտություն, բարիդրացիություն» կարգախոսով՝ նախընտրական արշավին շեշտադրում անելով ղարաբաղյան հակամարտության խաղաղ կարգավորման վրա և նկատի ունենալով տարածքային զիջումներ: Փորձագետները սպասում էին. դաշինքի արդյունքը ցույց կտա, թե հայկական հասարակության որ հատվածն է պատրաստ ղարաբաղյան հարցում զիջումների գնալ: 

Իր հետընտրական հայտարարությունում «Հայկական վերածնունդ» կուսակցությունը, որն ընտրողների գրեթե 4%-ն է հավաքել և պատգամավորական մանդատ չի ստացել, ասված է, որ իրենց մրցակիցները վարչական ռեսուրս են օգտագործել և զանգվածաբար կաշառել ընտրողներին.

«Կուսակցությունը նշում է, որ Հայաստանում առաջին անգամ քաղաքական կուսակցությունները հեռուստատեսությամբ բազմակողմանի լուսաբանման շնորհիվ կարողացան իրենց նախընտրական ծրագրերը ներկայացնել: Սակայն գաղափարը զիջեց նյութական և վարչական լծակներին: Կուսակցությունը հայտարարում է, որ չի վիճարկելու ընտրությունների արդյունքները, չի մասնակցելու ինչ-որ հետընտրական զանգվածային միջոցառումների և հանրահավաքների: Կուսակցությունը շնորհավորում է և հաջողություն է մաղթում այն բոլոր ուժերին, որոնք խորհրդարանում են հայտնվել»:

ԿԸՀ-ն մեկ շաբաթ ժամանակ ունի ապրիլի 2-ին անցկացված ընտրությունների վերջնական արդյունքներն ամփոփելու համար: