Եվրոպան խիստ միջոցներ է ներմուծում նրանց դեմ, ովքեր չեն պատվաստվում Covid-19-ի դեմ
Կարանտին նրանց համար, ովքեր չեն պատվաստվում
Ավստրիայի ավելի քան երկու միլիոն քաղաքացի նոյեմբերի 15-ից կարանտինի մեջ է, նրանց տեղաշարժը խստորեն սահմանափակվել է, քանի որ նրանք չեն պատվաստվել կորոնավիրուսի դեմ։ Նրանց թույլ են տալիս տնից դուրս գալ՝ միայն աշխատանքի գնալու համար, այն էլ՝ ներկայության սահմանափակմամբ և նոր հանձնած թեստով։ Նրանք կարող են նաև սնունդ գնել մոտակա խանութից և դիմել բուժօգնության։
Չպատվաստվածներին արգելել են ռեստորան գնալ, վարսավիրանոց, կինոթատրոն, առևտրի խոշոր կենտրոններ և այլ վայրեր այցելել, որտեղ շատ մարդիկ կարող են լինել։
Այս կանոնը չի տարածվում միայն մինչև 12 տարեկան երեխաների և վերջերս արդեն բուժված անձանց վրա։
Նախորդ հանգստյան օրերին հարյուրավոր մարդիկ ցույց էին անում մայրաքաղաք Վիեննայի կանցելյարիայի շենքի դիմաց՝ հետևյալ գրառումներով պաստառներով․ «Մեր մարմիններն են՝ որոշողը մենք ենք»։
Սակայն կանցլեր Ալեքսանդր Շալենբերգը հայտարարել է․ «Ցավոք, այս քայլը սուր անհրաժեշտություն է․ երկրում վարակման դեպքերի աճ է։ Մենք պետք է կտրուկ կրճատենք պատվաստվածների և չպատվաստվածների միջև շփումները»։
Ոստիկանությունը հանրային վայրերում ընտրովի ստուգումներ է իրականացնելու՝ պարզելու համար մարդկանց պատվաստված լինելը։
Ամբողջությամբ պատվաստված է Ավստրիայի բնակչության միայն մոտ 65 տոկոսը, սա Արևմտյան Եվրոպայի ամենացածր ցուցանիշներից մեկն է։ Իսկ նոր վարակման քանակը Եվրոպայում ամենաբարձր ցուցանիշներից մեկն է։
Ընդհանուր առմամբ, Եվրոպան կրկին դարձել է մի տարածաշրջան, որն առավել լրջորեն է տուժել համավարակից։ Եվ մի քանի երկիր նույնատիպ սահմանափակումներ են ներմուծում նրանց համար, ովքեր հրաժարվում են պատվաստվել։
- «Ձեզ պետք է, դուք էլ պատվաստվեք»։ Պատվաստանյութին դեմ արտահայտվողների փաստարկները Վրաստանում
- Պատվաստումն Ադրբեջանում փաստացի հարկադիր է դարձել
- «Այցի նպատակը՝ պատվաստում»․ Հայաստանում իրանցի զբոսաշրջիկների մեծ հոսք է
Պատվաստվածների տոկոսը Եվրոպայի տարբեր երկրների բնակչության շրջանում
Գերմանիայում առողջապահության նախարար Յենս Սպանն ակնկալում է նույնատիպ սահմանափակումների ներմուծում այս շաբաթվա վերջում։ Այստեղ պատվաստման մակարդակը 67,3 տոկոս է, սա բարձր է Ավստրիայի ցուցանիշից, բայց ոչ շատ։
Գերմանիան Ավստրիային ներառել է բարձր ռիսկի գոտում։ Սա նշանակում է, որ ցանկացած մեկը, որը ժամանում է այդ երկրից, պետք է կարանտին անցնի։
Նիդեռլանդներում ավելի մեղմ միջոցներ են ձեռնարկվել սոցիալական շփման սահմանափակման համար՝ ի պատասխան վարակման դեպքերի կտրուկ աճի։ Ռեստորաններն ու խանութները պարտավոր են փակվել երեկոյան ութից հետո, մարզական միջոցառումները պետք է անցկացվեն առանց հանդիսատեսի մասնակցության։
Ընդ որում, երկրում պատվաստվել է չափահաս բնակչության մոտ 84 տոկոսը։
Արևելյան Եվրոպայի երկրներում պատվաստման մակարդակը զգալիորեն ցածր է։
Լատվիայում ամբողջությամբ պատվաստված է բնակչության ընդամենը 59 տոկոսը։ Հոկտեմբերից այստեղ կոշտ սահմանափակումներ կներմուծվեն։ Այդ թվում՝ պատգամավորներին, որոնք հրաժարվում են պատվաստվել, արգելվում է մասնակցել դեբատներին և քվեարկություններին՝ նվազագույնը մինչև 2022 թ-ի կեսը։ Հետևաբար, նրանց աշխատավարձը կրճատվում է։
Ռուսաստանում, ըստ Our World In Data-ի տվյալների, լիարժեք պատվաստվել է բնակչության միայն 35 տոկոսը։ Հոկտեմբերի վերջին այնտեղ փակվել են բոլոր խանութները՝ բացի պարենայիններից, և ռեստորանները, իսկ դպրոցները մասնակիորեն անցել են հեռավար ուսուցման։ Բյուջետային կազմակերպությունների աշխատակիցներին 9-օրյա վճարովի արձակուրդ է տրամադրվել, նրանց պարտավորեցրել են միայն անհրաժեշտության դեպքում տնից դուրս գալ։
Մի քանի այլ երկրներ նույնպես կոշտ սահմանափակումներ են ներմուծում կորոնավիրուսով վարակման աճի առնչությամբ։ Ավստրալիայում դեկտեմբերի 17-ից չպատվաստվածներին կարգելեն ռեստորան, փաբ և մարզական միջոցառումների գնալ։
Սինգապուրում հայտարարվել է, որ դեկտեմբերից նրանք, ովքեր իրենց ցանկությամբ որոշել են չպատվաստվել, վարակվելու դեպքում ամբողջությամբ վճարելու են իրենց բուժման գումարը։
Բացառություն է դեռևս Մեծ Բրիտանիան։ Այստեղ նկատվում է կորոնավիրուսով վարակման ամենաբարձր ցուցանիշներից մեկը, սակայն չպատվաստվածների դեմ սահմանափակումներ դեռևս չեն կիրառվում։
