Եվրախորհրդարանը պահանջում է անհապաղ պատժամիջոցներ սահմանել Բիձինա Իվանիշվիլիի դեմ
Եվրախորհրդարանի բանաձևը Իշվանիիշվիլիի վերաբերյալ
Եվրոպական խորհրդարանն ընդունել է Վրաստանի վերաբերյալ բանաձև, որում Եվրոպայի խորհրդի և Եվրամիության ժողովրդավարական գործընկերներին կոչ է արել անհապաղ անձնական պատժամիջոցներ սահմանել Բիձինա Իվանիշվիլիի նկատմամբ՝ «երկրի քաղաքական գործընթացների վատթարացման մեջ նրա ունեցած դերի համար»:
Եվրախորհրդարանի պատգամավորները դատապարտել են Իվանիշվիլիի անձնական դերը ներկայիս քաղաքական ճգնաժամի և «դեպի Ռուսաստան շրջադարձ կատարելու ու երկրի եվրաատլանտյան կողմնորոշումը կրկին խաթարելու փորձի» մեջ։
Բացի այդ, Եվրախորհրդարանը Վրաստանի իշխանություններին կոչ է արել «անհապաղ ազատ արձակել նախկին նախագահ Միխեիլ Սաակաշվիլիին և նրան թույլ տալ բուժում ստանալ արտերկրում»:
Քվեարկությանը մասնակցել է Եվրախորհրդարանի 654 պատգամավոր: Փաստաթղթին կողմ է քվեարկել 495 խորհրդարանական, դեմ՝ 73, ձեռնպահ՝ 86:
Եվրոպական խորհրդարանը հերթական անգամ Եվրոպական հանձնաժողովին կոչ է արել ժամանակին գնահատել ոչ միայն «օտարերկրյա գործակալների մասին օրենքի», այլև «հակա-ԼԳԲՏ օրենքի», գենդերային քվոտաների վերացման և այլ օրենսդրական փոփոխությունների ազդեցությունը Վրաստանի կողմից վիզայի ռեժիմի ազատականացման չափանիշների կատարման վրա:
Եվրախորհրդարանը անհրաժեշտ է համարում Իվանիշվիլիից բացի անձնական պատժամիջոցներ սահմանել նաև այն վրացի պաշտոնյաների նկատմամբ, «ովքեր առնչություն ունեն Վրաստանում մարդու իրավունքների խախտումների կամ երկրի ժողովրդավարական հետընթացի հետ»:
Բանաձևը Վրաստանի իշխանություններին կոչ է անում ապահովել 2024 թվականի հոկտեմբերի 26-ին կայանալիք խորհրդարանական ընտրությունների անցկացումը՝ համաձայն բարձրագույն միջազգային չափանիշների, որպեսզի երաշխավորվի թափանցիկ, ազատ և արդար գործընթաց, որն արտացոլում է ժողովրդի ժողովրդավարական կամքը, և հրաժարվել «հօգուտ իշխող կուսակցության պետական ռեսուրսների և վարչական հնարավորությունների չարաշահման արմատացած պրակտիկայից»: Վրաստանի իշխանությունները պետք է ձեռնարկեն բոլոր անհրաժեշտ միջոցները, որպեսզի ընտրությունները դիտարկող կազմակերպությունները չբախվեն խոչընդոտների իրենց աշխատանքում:
Բանաձևը դատապարտում է իշխող «Վրացական երազանք» կուսակցության նախընտրական նոր պաստառները, որոնք Եվրախորհրդարանի պատգամավորների կարծիքով՝ օգտագործվում են որպես «մանիպուլյացիա և ապատեղեկատվություն» և հանդիսանում են նախընտրական արշավում ռուսամետ և հակաուկրաինական տրամադրություններն օգտագործելու փորձ:
