Դատավորները եկել են գիշերազգեստներով
«Նաթիկին ձերբակալել են մոտավորապես 22:30-ի սահմաններում և ուղարկել Գլխավոր դատախազության՝ Ծանր հանցագործությունների քննչական կոմիտե, իսկ կեսգիշերին մոտ տարել են Ծանր հանցագործությունների դատարան, որտեղ 4 ամսով կալանավորելու որոշում են ընդունել,- ասում է Նաթիկ Ջաֆարլիի փաստաբան Ջավադ Ջավադլին:- Դատավորները եկել են գիշերազգեստներով»:
Օգոստոսի 12-ի լույս 13-ի գիշերը 4 ամսով կալանավորվել է հայտնի տնտեսագետ, ՌեԱլ հասարակական-քաղաքական կազմակերպության կառավարման խորհրդի անդամ Նաթիկ Ջաֆարլին:
Փաստաբանի խոսքով՝ քաղաքական գործչին և տնտեսագետին մեղադրանք է առաջադրվել 192.1 (անօրինական գործարարություն) և 308.2 (պաշտոնեական դիրքի չարաշահում, որը հանգեցրել է ծանր հետևանքների, կամ ընտրությունների կամ հանրաքվեի արդյունքների վրա ազդելու մտադրությամբ): «Կալանավորման նման ժամկետ նշանակվում է ծանր հանցագործությունների դեպքում, իսկ 192.1 հոդվածն ընդհանրապես ապաքրեականացված է,- ասում է փաստաբանը:- Մենք կփորձենք վերաքննիչ դատարանում հասնել այդ որոշման կասեցմանը»:
Նրա խոսքով՝ այս պահին Նաթիկ Ջաֆարլին գտնվում է Քյուրդախանիի №1 մեկուսարանում:
Ջաֆարլիի փաստաբանը և կուսակցության գործընկերները կարծում են, որ նրա կալանավորման իրական պատճառը քաղաքական է:
«Նաթիկը հայտնի է քննադատական հարցազրույցներով և սոցիալական ցանցերում գրառումներով, որոնցում բազմիցս խոսել է կոռուպցիայի, նավթի գների նվազման, մանաթի արժեզրկման պատճառների մասին, և ամենայն հավանականությամբ, հենց դա է նրա կալանավորման պատճառը»,- ասում է ՌեԱլ շարժումից նրա համախոհ Նիջաթ Մելիկովը:
«ՌեԱլի ղեկավար Իլգար Մամեդովն արդեն շուրջ 4 տարի է՝ բանտում է, 3 տարի բանտում անցկացնելուց հետո վերջերս ազատ արձակվեց կազմակերպության կառավարման անդամ Ռասուլ Ջաֆարովը, և ձերբակալեցին Նաթիկ Ջաֆարովին,- ասում է կառավարման խորհրդի մեկ այլ անդամ՝ Էրքին Գադիրլին:- ՌեԱլը ավելի քան 45 հազար ստորագրաթերթիկ է հավաքել՝ հանրաքվեի հարցով նախաձեռնող խումբ ստեղծելու համար: Նաթիկի կալանավորումը ավելի շատ մարդ կհավաքի ՌեԱլի շուրջ»:
«Կալանավորման համար պատճառները շատ են,- ասում է Ռասուլ Ջաֆարովը:- Նախ, Նաթիկը, որպես ակտիվիստ, շատ է օգնել Իլգարին բանտում և պատասխանատու էր ՌեԱլում ամենակարևոր նախագծերի համար: Բացի այդ, որպես տնտեսագետ, նա գրում էր քննադատական հոդվածներ: Երրորդ պատճառը առաջիկա հանրաքվեն է: Նա ԿԸՀ-ում գրանցված մեր քարոզչության խմբի լիազորված պատասխանատուն էր: Ինչ վերաբերում է անօրինական գործարարության վերաբերյալ քրեական գործին, այն հարուցվել էր դեռ մեկ տարի առաջ, և իշխանությունները, թերևս, սպասում էին և մտածում, որ նա կանգ կառնի»:
Ընդդիմադիր Ժողովրդական ճակատ կուսակցության ղեկավար Ալի Քերիմլին սոցցանցի իր էջում հայտարարել է. «Ես համոզված եմ, որ Նաթիկի կալանավորումը կապված է նրա հասարակական-քաղաքական գործունեության հետ: Այդ որոշումը ես գնահատում եմ որպես քաղաքական բռնության ակտ և պահանջում եմ ազատ արձակել նրան»:
Իշխող «Նոր Ադրբեջան» կուսակցությունը ոչ մի կերպ չի մեկնաբանել տնտեսագետի կալանավորումը: Ավելի վաղ ներքին գործերի նախարար և նախագահին կից հասարակայնության հետ կապերի բաժնի պետ Ալի Հասանովը հայտարարել էր, որ Ադրբեջանում քաղբանտարկյալներ չկան:
Սոցիալական ցանցերում այս նորության շուրջ քննարկումները սահմանափակվում են քաղաքական-կոփվածների շրջանակներում: Լինում են նաև ցավակցության և մռայլ հումորի արտահայտություներ, երբեմն քննարկումներ են ծավալվում հենց ՌեԱլ շարժման շուրջ, որը, ի դեպ, գնալով ավելի հայտնի է դառնում՝ իր անդամների ձերբակալությունների պատճառով:
«Ակնհայտ է, որ ՌեԱլը առայժմ (Իլգարի ձերբակալությունից հետո) այնքան էլ հայտնի կազմակերպություն չէ, և պետք էր մեր թանկագին Նաթիկին էլ ձերբակալեին, որպեսզի բոլորին պարզ լինի.
1. ՌեԱլն իսկապես իրական այլընտրանք է
2. բարեփոխումներ չեն լինի, մինչև վերջ դիմանալ, ամրապնդել դիրքերը և սպասել, թե երբ ամեն ինչ ինքնաբերաբար կփլուզվի»:
«Ես Facebook-ում էջ ունեմ: Վախենում եմ, որ կմեղադրեն անօրինական գործարարության մեջ և կփակեն բանտում»:
«Մենք հարմարվել ենք և սա ընկալում ենք որպես սովորական բան: Հասկանում ենք, որ այս ճանապարհին ձերբակալություններն ու բռնություններն անխուսափելի են: Պի՛նդ կացեք, ռեալցինե՛ր, այժմ միասնությունը մեզ առավել քան պետք է»:
ՌեԱլ հասարակական շարժումը պատրաստվում է քարոզչություն իրականացնել սեպտեմբերի 26-ին կայանալիք հանրաքվեի դեմ: Նախատեսվող սահմանադրական փոփոխությունները շարժումը կապում է նախագահի իշխանության ամրապնդման և հասարակությանը ազատության վերջին իրավունքից զրկելու հետ: Նաթիկ Ջաֆարլին բազմիցս դեմ է արտահայտվել այդ փոփոխություններին:
Արդեն 4-րդ տարին բանտում է գտնվում է հասարակական շարժման ղեկավար Իլգար Մամեդովը: Նա մեղադրվում է Իսմաիլի շրջանում անկարգություններ կազմակերպելու մեջ: Չնայած Մարդու իրավունքների եվրոպական դատարանը չեղյալ է հայտարարել այդ որոշումը, Մամեդովը շարունակում է մնալ բանտում: Amnesty International իրավապաշտպան կազմակերպությունը Իլգար Մամեդովին ճանաչել է խղճի բանտարկյալ: Եվրոպայի խորհրդի գլխավոր քարտուղար Թորբիերն Յագլանդը Ադրբեջանին քննադատել է ազատ արձակման որոշումը չկատարելու համար:
Հրապարակվել է 14.08.2016
