Բժշկին, որը հրապարակել էր Toplum TV-ի հիմնադրի ձերբակալության կադրերը, ազատել են աշխատանքից
Բժիշկ Այդին Ալիևը կորցրել է աշխատանքը
Բաքվում գտնվող «Ստամբուլ» կլինիկայի մոտակայքում ձերբակալվել էր Toplum TV անկախ առցանց հեռուստատեսության համահիմնադիր Ալեսքեր Մամեդլին։ Կլինիկայի բժիշկներից մեկը կորցրել է աշխատանքը։ Այդին Ալիևի խոսքով՝ իրեն աշխատանքից ազատել են այն պատճառով, որ հրապարակել է հայտնի մեդիափորձագետի կալանավորման կադրերը, որոնք ֆիքսել էր տեսահսկող սարքը։ Իսկ կլինիկայի սեփականատերը պնդում է, որ բժիշկն իր կամքով է հեռացել աշխատանքից։
- «Ադրբեջանի դեմ հայցերից հրաժարվելը խիստ վտանգավոր կլինի»․ կարծիք
- Ստալինը և Վրաստանը. բարդ հարաբերությունների պատմություն
- Նավալնիի փոխանակում Վրաստանի քաղաքացուն սպանողի հետ. ի՞նչ է հայտնի այս պլանի մասին
Մարտի 12-ին հայտնի բժիշկ-ռադիոլոգ Այդին Ալիևը, որը նաև Toplum TV-ի համահիմնադրի ազգականն է, ֆեյսբուքյան իր էջում գրել է, որ իրեն աշխատանքից ազատել են։
«Սիրելի բարեկամներ։ Սպառնալիքի՞ց, թե՞ վախից՝չգիտեմ, բայց «Ստամբուլ» կլինիկայի ղեկավարությունն այսօր ինձ ազատեց աշխատանքից։ Ինձ ասացին՝ վաղվանից աշխատանքի չգաս։ Ո՞ւր է օրենքի գերակայությունը: Հե՞շտ է մարդուն աշխատանքից ազատելը։ Որտե՞ղ են արհմիությունները: Ի՞նչ կասեք աշխատողների իրավունքների մասին։ Ի՞նչ կասեք աշխատանքային պայմանագրի մասին»,- գրել է նա։
Բժշկի խոսքով՝ իրեն աշխատանքից հեռացնելու պատճառ է դարձել այն, որ ինքը տարածել է Ալեսքեր Մամեդլիի կալանավորման կադրերը։
Ալեսքեր Մամեդլին ձերբակալվել էր մարտի 8-ին Բաքվի «Ստամբուլ» կլինիկայի դիմաց, ուր եկել էր հետազոտություն անցնելու՝ քաղցկեղի կասկածանքով։ Այնուհետեւ նրա բնակարանում խուզարկություն էր իրականացվել, ինչի արդյունքում իրավապահ մարմինները հայտարարել էին, որ բնակարանից հայտնաբերվել է 7200 եվրո։
Դատարանի որոշմամբ մեդիափորձագետը նախաքննության ընթացքում 4 ամսով կալանավորվել է, մեղադրվում է մի խումբ անձանց հետ նախնական համաձայնությամբ իրականացված մաքսանենգության մեջ։
Մարտի 6-ից Toplum TV-ի գործով ձերբակալվել է 8 մարդ, ևս երկուսը ազատ են արձակվել։ Նրանց բոլորին մեղադրանք է առաջադրվել նույն՝ «մաքսանենգության» հոդվածով։ Այս մեղադրանքով նրանց սպառնում է 5-8 տարի ժամկետով ազատազրկում։
Այն բանից հետո, երբ Այդին Ալիևը տարածեց տեսանյութը, կառավարությանը մոտ կանգնած լրատվամիջոցները հրապարակեցին հոդվածներ՝ ուղղված Այդին Ալիևի և կլինիկայի ղեկավարության դեմ։
Այդին Ալիևի խոսքով՝ կլինիկայի ղեկավարությունը իրեն բազմիցս ասել է, որ ինքը խնդիրներ է ստեղծում՝ սոցիալական ցանցերում Ալեսքեր Մամեդլիի մասին գրառումներ հրապարակելով։
«Ասացի, որ իմ բարեկամն է։ Մարդը, ով չի պաշտպանում իր հարազատներին, վաղը կվաճառի իր պետությունն ու իր ժողովրդին։ Մարտի 12-ին նորից խոսեցինք, նա [կլինիկայի ղեկավարը- խմբ.] ասաց, որ մենք չենք կարող միասին աշխատել, մեր ճանապարհները պետք է բաժանվեն, և վաղվանից ես չպետք է գնամ աշխատանքի։
Ես չեմ լսել, որ նորմալ պետությունում աշխատողին ասեն, որ վաղվանից չգա աշխատանքի։ Առանց աշխատանքի, իհարկե, ինձ համար շատ դժվար կլինի, ես արդեն սկսել եմ նոր աշխատանք փնտրել»։
«Ստամբուլ» կլինիկայի սեփականատեր Ազիզ Գուլիևն իր հերթին Abzas Media-ին հայտնել է, որ բժիշկ Այդին Ալիևը աշխատանքից չի հեռացվել։ Նրա խոսքով՝ Ալիևն իր կամքով է թողել աշխատանքը։
«Այդինը լավ բժիշկ է: Ես նրա մասին վատ բան չեմ մտածում։ Նրան չեն ազատել աշխատանքից, ինքն է որոշել գնալ։ Այժմ նրա կինը՝ Գյուլշան Խանումը, շարունակում է աշխատել կլինիկայում։ Բժիշկ Այդինին ոչ ոք ոչինչ չի ասել։ Նա իր կամքով է ազատվել աշխատանքից»,- տեղեկությունը հերքել է Ազիզ Գուլիևը։
Այդին Ալիևը հայտարարել է, որ հրաժարականի դիմում չի ներկայացրել։
Իրավապաշտպան Միրվարի Գահրամանլին ասում է, որ երկրում աշխատանքային հարաբերությունները կարգավորվում են աշխատանքային օրենսգրքով, և ըստ օրենքի՝ ոչ ոք չի կարող աշխատանքից ազատվել մերձավոր ազգականի քաղաքական գործունեության պատճառով.
«Դա կոչվում է խտրականություն։ Ենթադրվում է, որ աշխատակցին հետապնդում են կոնկրետ պատճառով։ Նման դեպքերի առկայության պարագայում աշխատանքից ազատումը հիմնականում փաստաթղթավորվում է Աշխատանքային օրենսգրքի 70-րդ հոդվածի Գ կետով: Այն է՝ աշխատակիցը չի կարողանում կատարել իր պարտականությունները։ Կան նաև այլ հոդվածներ։ Ես շատ մտահոգված եմ, որ նրան [Այդին Ալիևին – խմբ.] բանավոր ասել են, որ չգա աշխատանքի, իսկ հետո գուցե աշխատանքից ազատում են ձևակերպել, օրինակ՝ աշխատանքի չներկայանալու համար:
Կարծում եմ՝ բժիշկը պետք է դիմի դատարան, օմբուդսմենին ու Աշխատանքի տեսչությանը՝ իր իրավունքները պաշտպանելու համար»,- ասել է Միրվարի Գահրամանլին։
