«Բանավոր խոստումնե՞ր, թե՞ ծրագիր». ի՞նչ է առաջարկում Հայաստանի ընդդիմությունը

Ընդդիմության ծրագիրն ու առաջարկները

Պետք է ձևավորվի իշխանություն, որը կապահովի թուրք-ադրբեջանական ագրեսիայի զսպումը՝ արդիականացնելով Հայաստանի ու Արցախի միասնական անվտանգության համակարգը: Մայիսի 9-ին կազմակերպված հանրահավաքի ժամանակ նման հայտարարություն է արել Հայաստանի խորհրդարանի ընդդիմադիր փոխխոսնակ Իշխան Սաղաթելյանը, որը Երևանում մեկնարկած շարժման առաջնորդներից մեկն է:

Հանրահավաքի ընթացքում ընդդիմությունն անդրադարձել է նաև ապագա պլաններին՝ ներկայացնելով գործողությունների ծրագիր:

Փողոցային պայքարի ընթացքի, ընդդիմության խոստումների մասին, ինչպես նաև փորձագիտական կարծիք

• Տեսանյութ երևանյան բողոքի ցույցերից․ ընդդիմությունը պահանջում է վարչապետի հրաժարականը

• «Ի՞նչ են ուզում ցուցարարները». փողոցային պայքարը Հայաստանում շարունակվում է

• Ընդդիմության «պայքարը մտել է վճռական փուլ». անհնազանդության ակցիաներ Երևանում

Փողոցային պայքարի ընթացքի մասին

Ընդդիմությունը շարունակում է ապրիլի վերջից մեկնարկած բողոքի ակցիաներն ինչպես մայրաքաղաք Երևանում, այնպես էլ մարզային քաղաքներում: Երևանի Ֆրանսիայի հրապարակը դեռևս փակ է, այդ հատվածով անցնող տրանսպորտային միջոցները շրջանցում են ճանապարհը: Քաղաքի մյուս հատվածներում, սակայն, բնականոն երթևեկությունը խախտվում է միայն ժամանակ առ ժամանակ՝ ընդդիմադիրների փողոց փակելու հետևանքով: Ոստիկանությունը կարճ ժամանակ անց բացում է տվյալ փողոցը՝ օրինական պահանջին չենթարկվողներին բերման ենթարկելով:

Նախորդ շաբաթվա վերջին ընդդիմադիրները նախաձեռնել էին նաև ավտոերթեր՝ դեպի Վանաձոր և Գյումրի: Վանաձորյան հանրահավաքի ընթացքում շարժման առաջնորդները խոստացել էին ոչ միայն անվտանգ երկիր ու արժանապատիվ կյանք, այլև Արցախի վերադարձ՝ իրենց իշխանության գալու դեպքում: Ելույթի ընթացքում ԱԺ ընդդիմադիր «Պատիվ ունեմ» խմբակցության ղեկավար, ԱԱԾ նախկին տնօրեն Արթուր Վանեցյանը վստահեցրել էր՝ «աա պայքար է հանուն հայրենիքի, պայքարի չի հանուն իշխանության, ոնց որ փորձում են ներկայացնել գործող իշխանությունները»: Հանրահավաքի վայրից քիչ հեռու մի խումբ քաղաքացիներ ընդդիմադիրներին կոչ էին արել հեռանալ Վանաձորից: Ընդդիմադիրներն իրենց ելույթներում նրանց բնորոշել էին որպես սադրիչներ:

Գյումրի տանող ճանապարհն ընդդիմադիրների առջև փակել էին Ադրբեջանում պահվող շիրակցի գերիների հարազատները: Նրանք հիշեցրել էին ԱԱԾ նախկին տնօրենի՝ գերիներին վերադարձնելու խոստումն ու հարցրել, թե «ինչո՞ւ չի բերել ոչ մի գերի»: Ըստ նրանց՝ գերիներին ազատ արձակելու փոխարեն ընդդիմությունը զբաղված է փողոցային պայքարով:

Ի տարբերություն Վանաձորի՝ Գյումրու պարագայում արձանագրվել էին նաև ընդհարումների դեպքեր: Միջադեպերից մեկը գրավեց շատերի ուշադրությունը: Վեճ էր տեղի ունեցել շարժման անդամ մի խումբ երիտասարդների և գյումրեցի տարեցների միջև: Երիտասարդները տարեցներին ծեծի էին ենթարկել:

«Զարթնիր, Լաո»․ փողոցային պայքար Երևանում

Ընդդիմության բողոքի ակցիաները, իշխանականների մեկնաբանությունը, ինչպես նաև փորձագիտական կարծիք

Ընդդիմությունը խոստանում է

ԱԺ ընդդիմադիր «Հայաստան» խմբակցության պատգամավոր Իշխան Սաղաթելյանը մայիսի 9-ին Ֆրանսիայի հրապարակում կազմակերպված հանրահավաքի ընթացքում անդրադարձել է նաև շարժման ապագա պլաններին՝ ներկայացնելով իրենց գործողությունների ծրագիրը:

Ընդդիմության ծրագրի համաձայն՝ իշխանափոխությունից հետո՝

• պետք է ձևավորվի իշխանություն, որը կապահովի թուրք-ադրբեջանական ագրեսիայի զսպումը՝ արդիականացնելով Հայաստանի ու Արցախի միասնական անվտանգության համակարգը,

• այդ իշխանությունը պետք է վերահաստատի Արցախի ժողովրդի անվտանգության և ինքնորոշման իրավունքի երաշխավոր լինելու ՀՀ հանձնառությունը՝ բացառելով Արցախի որևէ կարգավիճակ Ադրբեջանի կազմում,

• նոր իշխանությունը կբացառի Հայաստանի ինքնիշխանության և տարածքային ամբողջականության հաշվին հաղորդակցության ուղիների ապաշրջափակման անվան տակ միջանցքի տրամադրում թշնամի երկրին,

• Ադրբեջանի կողմից ուժի կիրառման և ուժի կիրառման սպառնալիքի ներքո չի իրականացնի սահմանագծում և սահմանազատում,

• նոր իշխանությունը կբացառի Հայաստան-Թուրքիա հարաբերություններում որևէ համաձայնություն, որը հարցականի տակ կդնի հայ ժողովրդի «հայրենազրկման և Ցեղասպանության իրողությունը»:

• կարևորագույն խնդիր կդիտարկի հայ ռազմագերիների, պատանդառվածների ու պահվող այլ անձանց վերադարձը:

Իշխանությունների հեռացումից հետ, ըստ ընդդիմության, պետք է ձևավորվի ազգային համաձայնության կառավարություն, որտեղ չեն լինի «մարդիկ, որոնց հասարակությունը չի ընդունում»:

Գործող իշխանության հրաժարականից հետո ընդդիմադիրները պատրաստ են հրապարակել այն 250 պրոֆեսիոնալների անունները, որոնք կօգնեն «Հայաստանը դուրս բերել ճգնաժամից»:

Շարժման առաջնորդներից Իշխան Սաղաթելյանի խոսքով՝ ժամանակավոր կառավարությունը կձևավորի նաև պրոֆեսիոնալների խումբ Ադրբեջանի և Թուրքիայի հետ բանակցությունների համար: Նախատեսում են, որ անցումային կառավարությունը գործունեություն կծավալի 1.5 տարի, ինչից հետո կկազմակերպվեն խորհրդարանական ազատ և անկախ ընտրություններ:

Հայաստանի ընդդիմությունը դուրս է գալիս փողոց. կլինի՞ երկրորդ «թավշյա հեղափոխություն»

Երևանում մեկնարկում են մշտական փողոցային ակցիաներ։ Ընդդիմությունը հայտարարում է պայքար գործող իշխանության դեմ Հայաստանն ու Լեռնային Ղարաբաղը պաշտպանելու համար։

Փորձագիտական կարծիք

Քաղաքագետ Սուրեն Սուրենյանցի խոսքով՝ ընդդիմության ներկայացրածն ավելի շուտ ցանկությունների ամբողջություն էր, քան ծրագիր: Որպես օրինակ է բերում Ադրբեջանի կազմում Արցախի որևէ կարգավիճակ բացառելու կետը:

«Շատ գեղեցիկ է ասված, բայց կազմողներն ակնհայտորեն մոռացել են 44-օրյա պատերազմի և դրա հետևանքների, նոյեմբերի 9-ի հայտարարության մասին: «Բացառելով Արցախի որևէ կարգավիճակ Ադրբեջանի կազմում» իմպերատիվը անհնար է դարձնելու հայ-ադրբեջանական որևէ բանակցություն, որովհետև քննարկելու որևէ թեմա այլևս չի մնում»:

Սուրենյանցն ընդդիմությանը շատ հարցեր ունի, օրինակ՝ ինչպե՞ս են հասնելու իրենց սահմանած անիրատեսական նշաձողին, ո՞ր միջազգային գործընկերն է աջակցելու նման օրակարգին:

«Ընդդիմությունն իրեն նեղություն չի տվել անդրադառնալ նման հարցերի կամ հասարակությանն այնքան պրիմիտիվ է պատկերացրել, որ կարծել է՝ նրան կարելի է կերակրել այն թեզով, թե Փաշինյանի հեռացումը բավարար է Արցախի անկախությանը հասնելու համար»,- JAMnews-ի հետ զրույցում նշել է Սուրեն Սուրենյանցը:

Քաղաքագետի գնահատմամբ՝ ընդդիմության կողմից շրջանառվող թեզերի հիմքում իրատեսական օրակարգեր չկան.

«Քաղաքական գործիչը ռոմանտիկներից տարբերվում է նրանով, որ ցանկացած ասելիքի հիմքում պետք է դնի մեխանիզմ: Ես այդ մեխանիզմները չտեսա»:

Անդրադառնալով շարժման առաջնորդներից Իշխան Սաղաթելյանի կողմից մատնանշված 250 պրոֆեսիոնալներին՝ Սուրենյանցը նկատում է՝ նրանց անունները չհրապարակելը հասարակությանը ծաղրելու նման մի բան է:

«Կա երկու տարբերակ: Կամ այդ ցուցակում կան մերժված կերպարներ և իրենք վախենում են անուններ հնչեցնելով հրապարակում հավաքված մարդկանց թիվը պակասեցնել, կամ, ինչը շատ հավանական եմ համարում, ընդդիմության էլիտայում այնպիսի գզվռտոց է, որ ոչ մի կոնսենսուս չեն կարողանում ձևակերպել»,- ընդգծում է քաղաքագետը:

Լեռնային Ղարաբաղը բանակցությունների էպիկենտրոնում. ի՞նչ սպասել

Չնայած ուկրաինական պատերազմին և դրա վրա սևեռված ուշադրությանը՝ ԼՂՀ-ի շուրջ նույնպես շարունակվում են գործընթացներ՝ Մոսկվայի, Բրյուսելի և Վաշինգտոնի ակտիվ մասնակցությամբ։

Ընդդիմության ծրագիրն ու առաջարկները