Փաշինյանի որդուն փորձել են առևանգե՞լ․ մանրամասներ
Աշոտ Փաշինյանի առևանգման փորձ
Հայաստանում թեժ քննարկումներ են ընթանում վարչապետի որդու՝ Աշոտ Փաշինյանի առևանգման փորձի շուրջ։ Նա այդ մասին հաղորդում է ներկայացրել ոստիկանություն, քրեական վարույթ է հարուցվել։ Փաշինյանը տուժող է ճանաչվել։
Առևանգման փորձի համար ձերբակալվել է «Որդիների կանչ» ՀԿ անդամներից Գայանե Հակոբյանը, 44-օրյա պատերազմում զոհված Ժորա Մարտիրոսյանի մայրը։ Նա ձերբակալվածների պահման վայրում է։ Պաշտպանական կողմը ձերբակալման դեմ բողոք է ներկայացրել դատարան։
«Որդիների կանչ» ՀԿ-ն սկսել է գործել մեկ տարի առաջ։ Կազմակերպության անդամները 44-օրյա պատերազմում զոհվածների ծնողներն են։ Ապրիլի կեսերին նրանք հայտարարեցին պայքարի ակտիվ փուլ սկսելու մասին։ Հասնել գործող կառավարության հրաժարականին և ձևավորել ազգային կառավարություն․ սրանք ՀԿ կողմից հայտարարված առաջիկա քայլերն են։
Նախորդ տարվա մայիսին «Որդիների կանչ» ՀԿ անդամներից Գարիկ Գալեյանը հրապարակային հայտարարել էր, որ իշխանությունները «պետք է պատժվեն, թե չէ տեռոր է լինելու։ Մենք՝ ծնողներս արդեն ամեն օր մտածում ենք տեռորի մասին, չգիտենք՝ որ դպրոցն ենք մտնելու, որ մանկապարտեզը, որ բուհը, որ կառավարության շենքը»։
Իրավապաշտպան Զառա Հովհաննիսյանն ասում է՝ Աշոտ Փաշինյանը վարչապետի առաջացրած խնդիրների պատասխանատուն չէ, և չպետք է թույլ տալ, որ սա դառնա վատ նախադեպ, այն է՝ մարդիկ սկսեն հարցերն ուղղել ոչ թե որևէ քայլ կատարած պաշտոնյայի, այլ նրան զավակին։
Այս պահին հայտնի մանրամասները, ինչպես նաև փորձագիտական կարծիք
Վարչապետ Նիկոլ Փաշինյանի որդին՝ Աշոտ Փաշինյանը և զոհված զինծառայող Ժորա Մարտիրոսյանի մայրը՝ Գայանե Հակոբյանը երեկ մասնակցել էին առերես հարցաքննության։ Սա վկայում է այն մասին, որ նրանց ցուցմունքներում էական հակասություններ կան։ Առերեսման բովանդակության մասին տեղեկություններ, սակայն, դեռ չեն հաղորդվել։
Հայտնի է, որ Հակոբյանին մեղադրանք է ներկայացվել Քրեական օրենսգրքի 191-րդ հոդվածի 2-րդ մասի 1-ին կետի հատկանիշներով, այսինքն՝ անձի կամ նրա մերձավոր ազգականի կամ մերձավորի նկատմամբ առևանգումը՝ կապված այդ անձի կողմից իր պետական, քաղաքական, ծառայողական, մասնագիտական կամ հասարակական գործունեության կամ պարտքի կատարման հետ։
Ասել է՝ իր էմոցիաներից ելնելով կորոշի՝ «ազատ թողնե՞լ, թե՞ ոչ»
Մայիսի 17-ին Աշոտ Փաշինյանին առևանգելու փորձի մասին առաջինը տեղեկություն տարածեց վարչապետի ընտանիքին պատկանող «Հայկական ժամանակը»։ Ավելի ուշ լուրը հաստատեցին ոստիկանությունից՝ տեղեկացնելով, որ Փաշինյանը հանցագործության մասին հաղորդում է ներկայացրել։ Այդ հաղորդման հիման վրա Քննչական կոմիտեում նախաձեռնվել է քրեական վարույթ։
Քննչական կոմիտեի փոխանցմամբ՝ Փաշինյանը 44-օրյա պատերազմում զոհվածների ծնողներին հանդիպել է Վերաքննիչ դատարանի բակում։ Նշվում է, որ ծնողներն են մոտեցել նրան, ձայն տվել, «ռեպլիկներ» հնչեցնել: Հաղորդագրությունից տեղեկանում ենք, որ զոհված զինծառայողներից մեկի մայրը մոտեցել է վարչապետի որդուն, առաջարկել նստել մոտակայքում կայանված իր ավտոմեքենան, հանգիստ զրուցել։ Երբ Աշոտ Փաշինյանը նստել է մեքենան, կինը սկսել է վարել այն ու ասել, թե «փոքր-ինչ հեռու կգնան, որպեսզի իրենց չխանգարեն»․
«Ավտոմեքենայում կինը սկսել է խոսել 2020 թ․ պատերազմից, տարածքային ու մարդկային կորուստներից։ Տեսնելով, որ վերջինս դրսևորում է ոչ ադեկվատ վարքագիծ, երթևեկում է արագությունը գերազանցելով՝ երթևեկության կանոնների խախտմամբ, պահանջել է կանգնեցնել ավտոմեքենան, որպեսզի ինքն իջնի:
Կինն ասել է, որ իր տղային առանց իրեն հարցնելու տարել և սպանել են, ինքը կորցնելու ոչինչ չունի, կարող է նրան սպանել, ուստի առանց հարցնելու տանում է Եռաբլուր, որտեղ իր էմոցիաներից ելնելով կորոշի՝ ազատ թողնե՞լ, թե՞ ոչ»։
Ճանապարհին, երբ մեքենայի արագությունը դանդաղել է, Աշոտ Փաշինյանը դուրս է նետվել մեքենայից։ Նրան հարվածել է մեկ այլ մեքենա, ինչի արդյունքում վնասել է ոտքը։ Փաշինյանի ցուցմունքի համաձայն՝ այդ մեքենայում նույնպես եղել են 44-օրյա պատերազմի զոհվածների ծնողներ։
Մեքենայից նետվել է «անհասկանալի պատճառով»
Նման պնդում է արել «Որդիների կանչ» ՀԿ-ն։ Կառույցի անդամները հանդես են եկել հայտարարությամբ, որում պնդում են՝ Աշոտ Փաշինյանը «առանց առարկումների, առանց որևիցե մեկի միջամտության» է նստել Հակոբյանի մեքենան՝ այդ կերպ հերքելով առևանգման մասին լուրերը։
Տեղի ունեցածը առևանգում չի որակում նաև Գայանե Հակոբյանի պաշտպան Ռուբեն Մելիքյանը։ Նրա դիտարկմամբ՝ Աշոտ Փաշինյանի նկատմամբ բռնություն չի կիրառվել, մեքենա է նստել ինքնակամ, իսկ մեքենայի մեջ Գայանե Հակոբյանը «որևէ միջոց չի ձեռնարկել, որը նրան կզրկեր մեքենայից դուրս գալու հնարավորությունից»։
Փորձագիտական կարծիք
Իրավապաշտպան Զառա Հովհաննիսյանի խոսքով՝ Աշոտ Փաշինյանը չէ այն անձը, որից զոհված զինծառայողների ծնողները կարող էին իրենց հարցերի պատասխանները ստանալ։
«Պետությունը շատ ավելի բան կարող էր անել՝ նախ կանգնեցնելու, կանխելու պատերազմը, երկրորդ՝ պատասխաններ տալու զոհված զինծառայողների ծնողներին և նրանց հանդեպ ավելի հոգատար վերաբերմունք ունենալու։ Բայց դա որևէ կերպ չի կարող արդարացնել պետության ղեկավարի կամ որևէ գործողության համար պատասխանատուի զավակի հանդեպ նման վերաբերմունքը»,- ասել է նա։
Հովհաննիսյանի դիտարկմամբ՝ զավակը առանձին մարդ է, պատասխանատու չէ այն խնդիրների համար, որոնք «առաջացրել է իր հայրը»։
Անդրադառնալով «Որդիների կանչ» ՀԿ պնդումներին, թե առևանգման մասին խոսք լինել չի կարող, իր կամքով է նստել մեքենան՝ նա նկատել է՝ եթե նույնիսկ ինքնակամ է նստել, դա չի բացառում մեքենայում անկանխատեսելի հանգամանքների առաջացումը։
«Ցանկացած պարագայում, եթե մեքենայում անախորժ խոսակցություն է լինում, և անձը խնդրում կամ հորդորում է կանգնեցնել մեքենան, ուրեմն վարորդը պետք է կատարի այդ գործողությունը։ Ես ենթադրում եմ, որ ցատկել է՝ պահանջը չկատարելու պարագայում»,- նշել է նա։
Իրավապաշտպանի համոզմամբ՝ այս դեպքում, երբ պաշտոնյայի զավակը հրաժարվել է պետական պաշտպանությունից, հանրությունը պետք է իր վրա վերցնի նրա պաշտպանությունը, այլ ոչ թե ոտնձգություն իրականացնի նրա իրավունքների նկատմամբ։
Վարչապետի հետ համատեղ բնակվող ընտանիքի անդամները ենթակա են հատուկ պետական պաշտպանության։ Հայկական ԶԼՄ-ները գրում են, որ Աշոտ Փաշինյանն ընտանիքի հետ չի ապրում, բացի այդ՝ հրաժարվել է հատուկ պաշտպանությունից։
«Լրագրողներ հանուն մարդու իրավունքների» ՀԿ ղեկավար, իրավապաշտպան Ժաննա Ալեքսանյանն ասում է՝ առերևույթ չեն եղել այնպիսի գործողություններ, որոնցից կարելի է միանշանական եզրահանգումներ անել։ Ըստ նրա՝ պետք է պարզել՝ ի՞նչ է տեղի ունեցել մեքենայում, որ Աշոտ Փաշինյանը որոշել է իրեն դուրս նետել։
«Հաղորդագրություն չկա, որ նրա վրա զենք են պահել, այդ տեսակ վտանգի դեպքում կարելի էր դուրս թռչել մեքենայից»,- ասում է նա ու հարց հնչեցնում՝ ի՞նչ սպառնալիք կարող էր լինել կինը, որն այդ պահին մեքենա էր վարում։
Ալեքսանյանի կարծիքով՝ եթե համաձայնել էր զրուցել, ուրեմն «ծանր խոսակցությունից» չէր խուսափել, կարող էր գնալ «Եռաբլուր», իջնել մեքենայից ու խոսել։
Մյուս կողմից նկատում է՝ պետք է խորքային մոտենալ հարցին։ Հիշեցնում է՝ ծնողները Վերաքննիչ դատարանի մոտ էին, քանի որ նրանց նկատմամբ վարչական վարույթներ են հարուցվել նախորդ տարվա սեպտեմբերի 21-ի քրեական գործի շրջանակներում։ Նման քայլերն, ըստ նրա, մեծ խզում են առաջացնում պետության և զոհված զինծառայողների ընտանիքների միջև։
2022 թ․-ի սեպտեմբերի 21-ին 44-օրյա պատերազմում զոհվածների ծնողները փակել էին «Եռաբլուր» զինվորական պանթեոնի մուտքը՝ արգելելու համար վարչապետ Փաշինյանի մուտքը։ Նրանց այնտեղից հեռացնելու համար ոստիկանները ուժ էին կիրառել։
«Եթե նույնիսկ մի ոստիկան պատժվեր, այդ մարդիկ նման բորբոքված վիճակում չէին լինի»,- շեշտել է նա ու հավելել, որ ոստիկանները մնացել են անպատիժ և նույնիսկ չեն նույնականացվել։
Իրավապաշտպանը Աշոտ Փաշինյանին հորդորել է «մեծահոգի վերաբերմունք» դրսևորել և հետ վերցնել հանցագործության մասին հաղորդումը։
Հետևեք մեզ — Facebook | Youtube
Աշոտ Փաշինյանի առևանգման փորձ
