Հինգ հանգստյան օրեր Ադրբեջանի բնակիչների համար՝ Ռամազան և Ազգային փրկության օր

Հունիսի 15-ից առաջիկա 5 օրը Ադրբեջանի աշխատող բնակչության մեծ մասը մի փոքր շունչ քաշելու ժամանակ կունենա՝ շնորհիվ Ռամազան տոնի և Ազգային փրկության օրվա:

Ռամազան կրոնական տոնն այս տարի նշվելու է հունիսի 15-ին և 16-ին՝ համընկնելով ևս մեկ պաշտոնական տոնի՝ Ազգային փրկության օրվա հետ, որը նույնպես հունիսի 15-ին է նշվում: Իսկ հաշվի առնելով այն, որ հունիսի 16-ը շաբաթ օր է, ըստ Աշխատանքային օրենսգրքի, ոչ աշխատանքային են համարվում նաև հունիսի 18-ը և 19-ը: Արդյունքում՝ Ադրբեջանի բնակիչները հինգ օր կհանգստանան:

Ռամազանը մուսուլմանների համար պարտադիր պահքի ամիս է: Այդ ամսվա ընթացքում հավատացյալ մուսուլմաններն օրվա ցերեկային ժամերին հաց չեն ուտում և չենք խմում, ինչպես նաև չեն ծխում և ինտիմ կյանքով չեն ապրում: Ուտել և խմել թույլատրվում է միայն արևածագից առաջ և մութն ընկնելուց հետո:

Այս պահքը ֆիքսված ամսաթիվ չունի, և յուրաքանչյուր տարի մի փոքր ետ է ընկնում: Յուրաքանչյուր տարի Ռամազանի օրացույցը կազմում է Կովկասի մուսուլմանների վարչությունն ու Շամախու աստղադիտարանը:

Պահքն ավարտվում է համանուն տոնով: Պահքի նպատակն «աշխարհիկ» պահանջմունքներից հրաժարվելն է, ինչը թույլ է տալիս ցուցադրել սեփական հավատքի ուժն ու սանձել սեփական բնազդներն ու կրքերը: Ֆիզիոլոգիական ցանկությունների սահմանափակմանը զուգահեռ այս ամսվա ընթացքում հարկ է զերծ մնալ վատ մտքերից և արարքներից: Համարվում է, որ պահքին հետևելն օգնում է մաքրել հոգին և արժանանալ Ալլահի օրհնությանը:

Պետական մակարդակով այս տոնն Ադրբեջանում նշվում է 1993թ-ից՝ ԽՍՀՄ կազմից երկրի դուրս գալուց և հետևաբար, աթեիստական գաղափարախոսության չեղարկումից հետո:

Ամեն տարի պահքին հետևողների թիվն ավելանում է, թեև պարբերաբար վեճեր են առաջանում, թե ինչպես է պետք հետևել պահքին, որ գործողություններն այն կարող են խախտել:

Ազգային փրկության օրն Ադրբեջանի նախկին նախագահ (և ներկայիս նախագահի հայրը) Հեյդար Ալիևի՝ 1993թ-ի հունիսի 15-ին իշխանության վերադառնալու հետ կապված տոն է: Նա երկիրը գլխավորում էր դեռ խորհրդային տարիներին՝ 1969-1982թթ-ին, այն ժամանակ որպես Ադրբեջանի ԽՍՀ Կոմկուսի Կենտկոմի առաջին քարտուղար:

1993թ-ին՝ ԽՍՀՄ փլուզումից հետո, Ադրբեջանում իշխանության ճգնաժամ սկսվեց (մնացած բոլոր հնարավոր ճգնաժամերի և Հայաստանի հետ պատերազմի ֆոնին): Համարվում է, որ ելքն այդ ճգնաժամից Հեյդար Ալիևի վերադարձը դարձավ, որը հետագայում այդ պաշտոնը զբաղեցրեց մինչև մահը՝ 2003թ-ը:

Այդ տոնը պետականի կարգավիճակ ստացավ 1998թ-ին (դեռևս Հեյդար Ալիևի կյանքի օրոք):

Երկարատև տոների կապակցությամբ երկաթուղին աշխատանքային հատուկ ռեժիմով կաշխատի. մայրաքաղաքի շատ բնակիչներ այս օրերին բնության գիրկ են մեկնում կամ հարևան Թբիլիսի: