«ՀՀ-ն պետք է դիմի ԱՄՆ-ին և խնդրի դառնալ խաղաղության պայմանագրի երաշխավոր»․ կարծիք
ԱՄՆ-ն՝ խաղաղության պայմանագրի երաշխավո՞ր
«Ադրբեջանի նախագահը շահագրգռված չէ խաղաղության պայմանագրի ստորագրմամբ և հակված է անընդհատ երկարաձգել այս իրավիճակը՝ ոչ պատերազմ, ոչ խաղաղություն։ Ինքը համաձայնեց հայտարարել, որ 17 կետերն էլ համաձայնեցված են, որովհետև իր վրա լուրջ ճնշումներ են եղել»,- կարծում է «Հանրապետություն» կուսակցության նախագահ Արամ Սարգսյանը։
Նրա խոսքով՝ այդ ճնշումները եկել են Թուրքիայից, որի վրա, իր հերթին, ազդեցություն է գործել Միացյալ Նահանգները։ 1inTV-ի եթերում նա նշել է, որ Թուրքիայի վրա ԱՄՆ ազեցությունը պայմանավորված է մի շարք հանգամանքներով, որոնցից Անկարան ուզում է օգտվել։ Ըստ Սարգսյանի՝ դրանցից մեկն այն է, որ «Միջին միջանցքի» համատեքստում թուրքական կողմը դառնում է լուրջ դերակատար՝ հաբ միջինասիական երկրներից եկող գազատարների համար։
Վերադառնալով խաղաղության պայմանագրին՝ քաղաքական գործիչը նկատում է՝ կա այն արագ ստորագրելու հնարավորություն։ Ասում է՝ պետք է լինի այնպիսի երաշխավոր, որը «ռուս-թուրք-ադրբեջանական պայմանավորվածության» կողմ չէ։ Կարծում է՝ այդ դերը կարող է և ուզում է ստանձնել Միացյալ Նահանգները։ Համոզված է՝ չափից ավելի շահեկան կլինի, եթե «առաջին քայլն» անի Հայաստանը։
«Պետք է օր առաջ դիմել ԱՄՆ իշխանություններին, խնդրել, որ դառնան պայմանագրի երաշխավորը։ Եթե Վաշինգտոնում ԱՄՆ դրոշի հովանու ներքո, ԱՄՆ երաշխիքով փաստաթուղթ ստորագրվի, շատ մեծ ձեռքբերում կլինի։ Առանց երաշխավորի Ադրբեջանի հետ որևէ փաստաթուղթ ստորագրելը նույնիսկ այդ փաստաթղթի թղթի գինը չարժի, անհեթեթ է, անիմաստ»,- հայտարարել է նա։
- «Բաքուն ուզում է պայմանագրի վերաբերյալ կասկած առաջացնել հայ հանրության մոտ»․ կարծիք
- «Աննախադեպ առիթ և ձևաչափ»․ Փաշինյանի հարցազրույցը թուրքական ԶԼՄ-ներին
- «Նրանց միակ մեղքը հայ լինելն է»․ Եվրախորհրդարանը կոչ է անում ազատ արձակել հայ գերիներին
«Մենք պետք է վերջնականացնենք խաղաղության գործարքը»․ Թրամփի խորհրդական
Խաղաղության պայմանագրի բոլոր դրույթների շուրջ համաձայնության ձեռքբերումից հետո ԱՄՆ նախագահի ազգային անվտանգության գծով խորհրդական Մայքլ Ուոլցը X-ի իր էջում գրառում էր հրապարակել՝ հայտարարելով, որ կոնֆլիկտը Հարավային Կովկասում պետք է ավարտվի.
«Մենք գոհ ենք, որ Ադրբեջանը և Հայաստանը առաջընթաց մեծ քայլ են արել և համաձայնել են խաղաղության պայմանագրի շուրջ»։
Թրամփի խորհրդականը նույն գրառմամբ տեղեկացրել էր, որ այդ թեմայով զրուցել է նաև Ալիևի խորհրդական Հիքմեթ Հաջիևի հետ։
«Ես նրան ասացի, որ այժմ մենք պետք է վերջնականացնենք այդ խաղաղության գործարքը, ազատ արձակենք բանտարկյալներին, և միասին աշխատենք տարածաշրջանն ավելի անվտանգ և բարգավաճ դարձնելու ուղղությամբ»,— գրել էր նա։
Մեկնաբանություն
«Հանրապետություն» կուսակցության նախագահ Արամ Սարգսյանի խոսքով՝ միայն ԱՄՆ-ն կարող է դառնալ ՀՀ-Ադրբեջան խաղաղության պայմանագրի երաշխավոր, քանի որ
- Ադրբեջանը կատեգորիկ մերժում է Եվրոպային,
- Ռուսաստանը մի անգամ ստանձնել է միջնորդական դեր, 2020 թ․-ի նոյեմբերի 9-ի եռակողմ հայտարարության կետերի մեծ մասն իրականություն չի դարձել։
Ասում է՝ ԱՄՆ նախագահի ազգային անվտանգության գծով խորհրդական Մայք Ուոլցի հայտարարությունից ակնհայտ է, որ Վաշինգտոնում սպասում են Երևանի դիմելուն։
«Հայտարարության բանալի բառը մենքն է։ Ուոլցն ասում է՝ մենք կանք այստեղ, պատրաստ ենք դա անել, մեր միջոցով դա պիտի արվի»,- նկատել է Սարգսյանը և հավելել, որ խոսվում է նաև հայ գերիների ազատ արձակման մասին։
Վստահ է՝ եթե Երևանը երաշխավորության խնդրանքով դիմի, ԱՄՆ-ն կիրագործի այն, այսինքն՝ Վաշինգտոն կհրավիրի կողմերին, որպեսզի ստորագրեն համաձայնեցված փաստաթուղթը։
«Ինչու՞։ Որովհետև ,իմ կարծիքով՝ Դոնալդ Թրամփին նաև հաջողության պատմություններ են պետք։ Ուկրաինայի պարագայում ոչ շատ հեռավոր ապագայում խնդիրները կլուծվեն հրադադարի տեսքով։ Բայց դա կարող է մեկ տարի և ավել տևել։ Մեր պարագայում փաստաթուղթը պատրաստ է»։
Նրա համոզմամբ՝ ԱՄՆ-ն խաղաղության կողմնակից է։ Սարգսյանը հիշեցնում է՝ Թրամփն իշխանության է եկել խաղաղության խոստումով։ Կարծում է՝ Երևանի և Վաշինգտոնի շահերը համընկնում են նաև տարածաշրջանի հաղորդակցության ուղիների ապաշրջափակման հարցում։
«Թրամփն ուզում է, որ Չինաստանի «Մեկ գոտի, մեկ ճանապարհն» առաջ չգնա, դա դառնա «Միջին միջանցք»։ Մեր այս [երաշխավորության] դիմումն ամբողջությամբ ԱՄՆ շահերի համատեքստում է։ Այն 100 տոկոսով համընկնում է մեր շահերի հետ, ապահովում է ՀՀ ոչ միայն խաղաղությունը, այլև տարանցիկ երկիր դառնալը, երկրի տնտեսական հզորացումը»,- մանրամասնում է նա։
Քաղաքական գործչի գնահատմամբ՝ ՀՀ-ն կարող է նաև ԱՄՆ-ին շահագրգռող առաջարկներով հանդես գալ, մասնավորապես՝
- ԱՄՆ-ն, որը «Միջին միջանցքի» կողմնակից է, մասնակցի ՀՀ երկաթուղային ցանցի նորոգմանը, ժամանակակից ստանդարտների համապատասխանեցմանը,
- Հայաստանն առաջարկներ անի ԱՄՆ-ին իր հանքահումքային ռեսուրսների կառավարման մասին։
«Որպես առաջին քայլ՝ Քաջարանի մետալուրգիական կոմբինատի ձախ ափը, որի լիցենզիան տրված չէ որևէ մեկին, տրամադրի ԱՄՆ-ին, գան, այդտեղ ներդրում անեն»,- նշել է նա։
Սարգսյանի խոսքով՝ նման առաջարկները չեն կարող չհետաքրքրել ԱՄՆ-ին և բիզնես մտածելակերպ ունեցող Դոնալդ Թրամփին։ Իսկ դրանք, ըստ նրա, կնպաստեն երկրի տնտեսական հզորացմանը, որն էլ ինքնին անվտանգության երաշխիք է։
«ԱՄՆ տնտեսական պոտենցիալի ներգրավումից հետո, եթե ՀՀ-ն ճիշտ օգտագործի իր հանքահումքային, ջրային, էներգետիկ ռեսուրսները, 10 տարի հետո տարածաշրջանում կունենա այն դերակատարությունն ու կշիռը, ինչ Մերձավոր Արևելքում ունի Իսրայելը»,- արձանագրել է նա։
Հարցին՝ արդյո՞ք Ադրբեջանը կհամաձայնի ԱՄՆ երաշխավորությամբ փաստաթուղթ ստորագրել, Սարգսյանը պատասխանել է, որ Բաքուն Նահանգների հետ հարաբերությունները ջերմացնելու կողմնակից է։
«Մերժելու դեպքում Բաքուն մեզ չի մերժի, այլ ԱՄՆ-ին, որը շատ լուրջ ազդեցություն ունեցող պետություն է։ Ադրբեջանը ՌԴ չէ, ոչ էլ Ալիևն է Պուտին։ Թող մերժեն։ Դրանից իրենց կյանքն ավելի լավը չի դառնա, դիրքերն էլ ավելի չեն ամրանա»,- ամփոփել է նա։
Հետևեք մեզ — Facebook | Youtube | Telegram
ԱՄՆ-ն՝ խաղաղության պայմանագրի երաշխավո՞ր
