Աբխազիայում արգելվել է ԱՄՆ ՄԶԳ գործունեությունը
ԱՄՆ ՄԶԳ գործունեության արգելք Աբխազիայում
Աբխազիայում արգելել են ԱՄՆ Միջազգային զարգացման գործակալության (USAID) նախագծերը։ Հարավային Կովկասում ԱՄՆ ՄԶԳ առաքելության ղեկավար Ջոն Փենելը պերսոնա նոն գրատա է հայտարարվել Աբխազիայում։ Բացի այդ, երկրում արգելվել է նաև Աբխազիայի և Վրաստանի քաղաքացիների միջև կապեր հաստատելուն ուղղված նախագծերի իրականացումը։
Աբխազիայի արտաքին գործերի նախարար Ինալ Արձինբան իր հատուկ հայտարարության մեջ ասել է, որ արտաքին գործերի նախարարությունը չի հաստատի նոր նախագծեր, որոնք մասամբ կամ ամբողջությամբ ֆինանսավորվում են ԱՄՆ ՄԶԳ կողմից։
Սա անակնկալ չէր։ Դեռ նոյեմբերի սկզբին Արձինբան, ով երկու տարի առաջ պաշտոնը ստանձնելուց ի վեր մշտապես հանդես է եկել միջազգային ՀԿ-ների գործունեությունը դադարեցնելու օգտին, արդեն հայտարարել էր ԱՄՆ ՄԶԳ-ի դեմ պատժամիջոցների մասին: Իսկ հիմա դրանց տրվեց պաշտոնական ընթացք։
- Հնարավո՞ր է, որ Աբխազիան դառնա Միութենական պետության մաս
- Աբխազիայի ԱԳ նախարարը ՌԴ հետ հարաբերությունների սերտացում է քարոզում
Արգելքի ներդրման պատճառը ՄԱԿ-ի «Գործընկերություն հանուն կայուն զարգացման» նախագիծն է, որի դոնորը ԱՄՆ ՄԶԳ-ն է, այն համաձայնեցման նպատակով ներկայացվել է Աբխազիայի արտաքին գործերի նախարարություն։
Ինալ Արձինբայի կարծիքով՝ 8 միլիոն դոլար բյուջեով այս նախագծում «նպատակների և խնդիրների՝ միտումնավոր կերպով լղոզված ձևակերպումներ կան»:
«Այս նախագծի գործնական իրականացման ընթացքում փորձ է արվել ստեղծել օնլայն և օֆլայն ձևաչափերով երկխոսության հարթակներ Աբխազիայի Հանրապետության և Վրաստանի քաղաքացիների, այդ թվում՝ փախստականների միջև ուղիղ կապ հաստատելու նպատակով»,- հայտարարել է նախարարը։
Որպես USAID-ի գործունեության արգելման ևս մեկ հիմնավորում՝ Արձինբան մատնանշել է այս կազմակերպության պաշտոնական ռազմավարությունը, որը հրապարակված է կառույցի կայքում։ Այս տեքստում Աբխազիան դիտարկվում է որպես «Վրաստանի օկուպացված տարածք», և բոլոր գործողություններն ուղղված են «տարածքային ամբողջականության վերականգնմանը» և «Կրեմլի կործանարար ազդեցությանը հակազդելուն»։
Աբխազիայի արտաքին գործերի նախարարության կողմից սահմանված արգելքները վերաբերելու են ոչ միայն USAID-ին։
Արգելվել է նաև՝
- իրականացումը նախագծերի, որոնց նպատակն է կապ հաստատել Աբխազիայի և Վրաստանի քաղաքացիների միջև,
- անորոշ և ոչ ճշգրիտ տեղեկություններով նախագծերը,
- ֆինանսավորումը մեդիա նախագծերի, որոնց նպատակն է լուսաբանել Աբխազիայի ներքին և արտաքին քաղաքականության խնդիրները։
Եվ վերջապես, միջազգային կազմակերպությունները և ՄԱԿ-ի գործակալությունները պետք է Աբխազիայի արտաքին գործերի նախարարության հետ համաձայնեցնեն աբխազական ՀԿ նախաձեռնությունների համար միջոցների հատկացումը։
ԱՄՆ ՄԶԳ գործունեության արգելք Աբխազիայում
