Ամենայն հայոց կաթողիկոսը Հայաստանի իշխանություններին առաջարկել է բանտից ազատել նախկին նախագահ Ռոբերտ Քոչարյանին

Ամենայն հայոց կաթողիկոս Գարեգին Երկրորդն ապրիլի 14–ին խոսել էր այն մասին, որ կորոնավիրուսի պանդեմիայի պայմաններում, ինչպես նաև հաշվի առնելով Հայաստանի նախկին նախագահ Ռոբերտ Քոչարյանի առողջական վիճակը, կարելի է դիտարկել նրան բանտից ազատ արձակելու հարցը։

Ապրիլի 15–ին հայ եկեղեցու ղեկավարին այս հարցով կոշտ պատասխան է տվել վարչապետի մամուլի խոսնակը։

Դրան հետևեց Մայր աթոռ Սուրբ Էջմիածնի մամուլի ծառայության կոչը չքաղաքականացնել Վեհափառի խոսքերը․

«Ցավոք, Ամենայն հայոց կաթողիկոսի արտահայտած մտքերը ներկայացվում են հատվածաբար, իսկ ՀՀ երկրորդ նախագահին անդրադարձը՝ ենթատեքստից կտրված և այլափոխված»։

2018 թ–ի հուլիսին Ռոբերտ Քոչարյանին սահմանադրական կարգը տապալելու մեղադրանք էր ներկայացվել։ Խոսքը 2008 թ–ի մարտի ցույցը ցրելու մասին է, որի հետևանքով տասը մարդ էր մահացել։ 2018թ–ի գարնանը տեղի ունեցած «թավշյա» հեղափոխությունից հետո Հայաստանում վերսկսվել էր այդ իրադարձությունների հետաքննությունը, և առաջին մեղադրյալներից մեկը Ռոբերտ Քոչարյանն էր։

Առաջին անգամ նա այս գործով կալանավորվել էր 2018 թ–ի հուլիսի 28–ին։ Նախկին նախագահի փաստաբանները բազմիցս փորձել են դատարանին համոզել փոխել խափանման միջոցը։ Երկու անգամ նրանց դա հաջողվել է։ Վերջին անգամ Քոչարյանը կալանավորվել է 2019 թ–ի հունիսի 25–ին։

Ինչո՞ւ են նստեցրել Հայաստանի նախագահ Ռոբերտ Քոչարյանին

Լեռնային Ղարաբաղը նոր նախագահ ունի։ Ի՞նչ սպասել նրանից

Ի՞նչ է ասել կաթողիկոսը

Ինչպես հաղորդում էր news.am լրատվականը, Գարեգին Երկրորդն ասել էր, որ նախկին նախագահի նկատմամբ արդարադատության իրագործման հետ մեկտեղ պետք է ձեռնարկվեն միջոցառումներ՝ համավարակի այս շրջանում ապահովագրելու նրան առողջական վիճակի հետագա բարդացումներից։ Նշվում էր նաև, որ հաղորդ լինելով Քոչարյանի առողջության առնչությամբ բժիշկների մասնագիտական կարծիքներին, հայրապետը հնարավոր է համարում խափանման միջոցի փոփոխությունն, այսինքն՝ Քոչարյանին կալանքից ազատելը։ 

Նախկին նախագահը պարբերաբար ստացիոնար բուժում է ստանում բուժհաստատություններում։ Վերջին անգամ Ռոբերտ Քոչարյանը հոսպիտալացվել էր մարտի 7–ին։ Նա հիվանդանոցից դուրս էր գրվել ապրիլի 3–ին։

Գարեգին Երկրորդը խոսել էր նաև այն մասին, որ կորոնավիրուսի պանդեմիայի պայմաններում աշխարհի շատ երկրներում առանձնահատուկ ուշադրություն է դարձվում կալանքի տակ գտնվող անձանց․

«Քայլեր են ձեռնարկվում՝ հասարակության համար վտանգ չներկայացնողների ազատ արձակման և կամ խափանման միջոցների փոփոխության՝ զերծ պահելու նրանց վտանգավոր այս վարակից։ Նման հարցերում Եկեղեցու դիրքորոշումը խարսխված է սիրո, խնամքի և գթասրտության աստվածային պատգամի վրա, և այս առումով Մեր հորդորն է, որ հայրենի մեր իշխանությունները շարունակեն այս ուղղությամբ անհրաժեշտ քայլեր նախաձեռնել»։

Կառավարության կոշտ պատասխանը

Իշխանությունների պատասխանը սպասեցնել չտվեց։ Վարչապետի մամուլի խոսնակը հնչեցրեց այն հաջորդ իսկ օրը։ Մանե Գևորգյանը հայտարարեց, որ կառավարությունը մտադիր չէ մեկնաբանել կաթողիկոսի «ցանկություններն ու հույսերը»։

Ավելին՝ նա հիշեցրեց կալանքի տակ գտնվող մեկ այլ անձի պատմությունը, որի համար նույնպես երաշխավորել էր եկեղեցին, ավելի ստույգ՝ Մայր աթոռ Սուրբ Էջմիածնի մամուլի ծառայության ղեկավար Վահրամ քահանա Մելիքյանը։

Խոսքը գործարար Սամվել Մայրապետյանի խափանման միջոցը փոխելու մասին է, որը ևս առնչվում է 2008 թ–ի մարտի դեպքերի քրեական գործով։

«Մայրապետյանը 2019-ի հունվարից բուժման պատրվակով մեկնել է երկրից և, չնայած քննչական մարմնի պահանջին, և ի հեճուկս Տեր Վահրամ քահանա Մելիքյանի երաշխավորությանը, չի վերադարձել Հայաստան», — հայտարարել է վարչապետի մամուլի խոսնակ Մանե Գևորգյանը։

Նրա խոսքով՝ կառավարությունում ակնկալում են, որ Մայր Աթոռը կվերագնահատի Մայրապետյանի երաշխավորության պատմությունը և դրա հետևանքով առաջացած վիճակը։

Պաշտպանության կարծիքը

Քոչարյանի փաստաբաններն էլ են վիճարկում Քոչարյանի բանտախցում պահպանումը կորոնավիրուսի տարածման պայմաններում․

«Ռոբերտ Քոչարյանը 60-ն անց է, ունի առողջական խնդիրներ, այսինքն՝ միաժամանակ ներառված է նոր տեսակի կորոնավիրուսի հետ կապված մի քանի ռիսկային խմբերում, սակայն գտնվում է քրեակատարողական հիմնարկում այն դեպքում, երբ այդտեղ արդեն հաստատվել են COVID-19–ի դեպքեր»։

Պաշտպանական կողմի կարծիքով՝ ներկա իրավիճակում Քոչարյանի՝ կալանքի տակ գտնվելն անմարդկային վերաբերմունքի նշան է։