Վրաստանի ընդդիմադիր «Միացյալ ազգային շարժում» կուսակցությունը բողոքի ցույցեր է սկսում

ԱԺՄ-ն բոյկոտում է խորհրդարանը և սկսում բողոքի ցույցեր

Այն բանից հետո, երբ Թբիլիսիի դատարանը հրաժարվեց առողջական վիճակով պայմանավորված ազատ արձակել Վրաստանի երրորդ նախագահ Միխեիլ Սաակաշվիլիին, երկրի գլխավոր ընդդիմադիր կուսակցությունը՝ «Միացյալ ազգային շարժումը» հայտարարեց արտակարգ ռեժիմի անցնելու մասին։

«Վրացական երազանքի [Վրաստանի իշխող կուսակցության] պաշտոնյաները հանգիստ չեն ունենալու», — ասել է «Միացյալ ազգային շարժման» ղեկավար Լևան Խաբեիշվիլին: Կուսակցությունների այլ առաջնորդների հետ հանդիպումից հետո նա պատմել է ապագայի ծրագրերի մասին և հայտնել, որ շարժումը դադարեցնում է աշխատանքը երկրի խորհրդարանում և սկսում է զանգվածային բողոքի ցույցեր փողոցներում և իշխող կուսակցության անդամների տների մոտ։

«Կոչ եմ անում մեր կուսակցության տեղական կառույցների ղեկավարներին, պատգամավորներին, վաղը բոլորին սպասում ենք Թբիլիսիում։ Վրաստանի մայրաքաղաքը կդառնա բողոքի ցույցերի գլխավոր կենտրոնը։ Ակցիաներ են պլանավորվելու նաև շրջաններում։ Բացի այդ, «Ազգային շարժումն» այլևս չի պատրաստվում մասնակցել խորհրդարանի աշխատանքներին։ Մենք պատրաստվում ենք հանդիպել մեր միջազգային գործընկերների և դեսպանների հետ, որպեսզի ուժեղացնենք ճնշումը «Վրացական երազանքի» վրա և փրկենք Միխեիլ Սաակաշվիլիի կյանքը», — ասել է Խաբեիշվիլին։

Կուսակցության անդամ Գիորգի Չալաձեն հայտնել է, որ «Ազգային շարժման» անդամներն ու համակիրները կգնան Վրաստանի վարչապետ Իրակլի Ղարիբաշվիլիի տան մոտ։

«Ուստի հիմա ճիշտ ժամանակն է մեր երկրի խաղաղ ապագայի համար մղվող պայքարին պատրաստվելու։ Հաջորդ քայլի մասին կհայտարարվի կես ժամից՝ Ղարիբաշվիլիի տան մոտ»,- ասել է Չալաձեն։

«Ազգային շարժման» նախկին նախագահ Նիկա Մելիան ասում է, որ կփորձի վերականգնել շարժման և մյուս ընդդիմադիր կուսակցությունների միջև բոլոր կոտրված կամուրջները․

«Այժմ Միխեիլ Սաակաշվիլիի շուրջ համախմբվելն այնքան էլ հեշտ չէ։ Համոզված եմ, որ այսօր այստեղ ընդդիմադիր կուսակցությունների բազմաթիվ առաջնորդներ կլինեին, եթե մենք ինքներս մեզ չխայտառակեինք։ Բայց ես կուսակցության ընտրողներին խոստանում եմ, որ իմ քաղաքացիական պարտքն է, ինչպես մյուսներինը, պայքարել Միխեիլ Սաակաշվիլիի փրկության համար, իսկ դրա համար կուսակցական դիրքորոշում պետք չէ»։

• «Եթե Սաակաշվիլին ազատ չարձակվի, նրա հովանավորներին կմնա միայն ազատվել նրանից՝ որպես վկա»
• Վրաստանի և Հայաստանի քաղաքացիներն այլևս անձնագրի կարիք չունեն սահմանը հատելու համար
• «Սաակաշվիլիի խոշտանգման հետևում Պուտինն է կանգնած»․ «Մագնիտսկու օրենքի» հեղինակ

Ընտանիքի անդամների և փաստաբանների խոսքով՝ Միխեիլ Սաակաշվիլի մոտ կախեքսիայի արագ ընթացք է սկսվել։ Սաակաշվիլիի առողջական վիճակի վերաբերյալ Օմբուդսմենի խորհրդի եզրակացության մեջ խոսվում է նաև 4-րդ աստիճանի կախեքսիայի մասին և նշվում է, որ նա պետք է տեղափոխվի արտերկրի բազմամասնագիտական ​​կլինիկա։

2022 թվականի դեկտեմբերի 29-ին Սաակաշվիլիի դատավարության ժամանակ որպես վկա հարցաքննվել է ամերիկացի թունաբան Դեյվիդ Սմիթը։ Նրա խոսքով՝ «Վիվամեդ» կլինիկա տեղափոխելուց առաջ Վրաստանի նախկին նախագահին բանտում թունավորել են ծանր մետաղներով։

Ամերիկացի թունաբանն ասել է, որ ծանոթացել է Միխեիլ Սաակաշվիլիի բժշկական քարտին, լաբորատոր հետազոտությունների արդյունքներին, ինչպես նաև մազերի, եղունգների և արյան նմուշների անալիզներին։

ԱԺՄ-ն բոյկոտում է խորհրդարանը և սկսում բողոքի ցույցեր

Հետևեք մեզ — Facebook | Youtube | Telegram