Արխիվ- 06.03.2018

Ադրբեջանում խստացվում է ապօրինի կրոնական պրոպագանդայի դեմ պայքարը

Ադրբեջանի 142 քաղաքացի անցյալ տարի իրավաբանական պատասխանատվության է ենթարկվել ապօրինի կրոնական պրոպագանադայի համար, ասված է Ադրբեջանի նախարարների կաբինետի հաշվետվությունում:

Ձերբակալված քաղաքացիների մոտ «հայտնաբերվել և առգրավվել է 14 զինամթերք, հրազենի 3 միավոր, 145 խտասկավառակ, 356 գրքույկ, կրոնական գրականության 5 185 նմուշ, որոնց արտադրանքն ու ներկրումն իրականացվել է առանց գործադիր իշխանության համապատասխան մարմնի համաձայնության»:

Հաշվետվությունում ասվում է, որ երկրի քաղաքների և շրջանների 53 մզկիթներում 230 տեսանկարահանող սարք է տեղադրվել, աշատանքներն այդ ուղղությամբ շարունակվում են:

Ապօրինի կրոնական գործունեության կասեցման վերջին դեպքը տեղի է ունեցել վերջին շաբաթվա ընթացքում Բաքվի մերձակայքում՝ Բուզովնա ավանում: Փետրվարի վերջին Իրավապահ մարմինները կասեցրել են «Իմամ Զեյնալաբդին» չգրանցված աղոթատեղիի գործունեությունը: Այդ աղոթատեղիի ղեկավար Ֆարհադ Ահմեդովը վարչական պատասխանատվության է ենթարկվել, գործը փոխանցվել է դատարան:

Ադրբեջանում կրոնական կազմավորումների պետական գրանցման համար պատասխանատու է Կովկասի մուսուլմանների հոգևոր վարչությունը: Այդ վարչության տվյալներով՝ այսօր Ադրբեջանում գրանցվել է 793 կրոնական կազմավորում: Դրանցից 765-ն իսլամական են, 17-ը՝ քրիստոնեական, 8-ը հուդայական, 2-ը՝ բահայիստական և մեկը՝ կրիշնայական:

Ադրբեջանում 2250 մզկիթ կա, որոնցից 136-ը մայրաքաղաքում են: Երկրում գործում է նաև 14 եկեղեցի և 7 սինագոգ: Հետաքրքիր է, որ պաշտոնապես գրանցված է 748 աղոթատեղի: