Ադրբեջանի առաջին նախագահը հերքել է իր իշխանության վերադարձի հնարավորությունը

Ադրբեջանի առաջին նախագահ Այազ Մութալիբովը կտրականապես հերքել է մամուլում տեղ գտած այն լուրերը, որ ինքը, հնարավոր է, նշանակվի Ադրբեջանի վարչապետ:

Այդ խոսակցություններն առաջացել էին նախկին նախագահի անսպասելի հայտարարությունից հետո առ այն, որ ինքը պատրաստ է գալիք տարի սպասվող նախագահական ընտրություններում պաշտպանել առաջին տիկին, առաջին փոխնախագահ Մեհրիբան Ալիևայի թեկնածությունը:

Մի շարք, այդ թվում կառավարամետ ԶԼՄ—ներ ենթադրել էին, որ այդ հայտարարությունը Մութալիբովի՝ Ադրբեջանի ապագա վարչապետ նշանակվելու արշավի սկիզբն է: Նրանց կարծիքով՝ դրա համար հիմք է հանդիսանում այն, որ գործող վարչապետ Արթուր Ռասիզադեն արդեն պատկառելի տարիքում է և ընտրություններից հետո ամենայն հավանականությամբ վաստակած հանգստի կգնա (հաջորդ տարի Ռասիզադեն դառնում է 83 տարեկան, նա Մութալիբովից մեծ է ընդամենը երեք տարով):

Այդ հրապարակումներում Մութալիբովը ներկայացվում է որպես «Ռուսաստանի դրածո», իսկ նրա նշանակումը առանցքային պաշտոնում՝ որպես մերձեցում դեպի հյուսիսային հարևանը:

Ինքը՝ Այազ Մութալիովը, այդ խոսակցություններն անվանել է «անհեթեթություն»:

«Մի՞թե ինձ սազում է այս տարիքում պայքար սկսել աթոռի համար: Ու ես էլ Ռուսաստանի դրածոն չեմ: Այո, ես ստիպված եմ եղել ապաստան փնտրել Ռուսաստանում: Բայց դա չի նշանակում, որ ինձ այնտեղ ծաղիկներով են դիմավորել»,- Modern.az գործակալության հետ զրույցում ասել է Մութալիբովը :