«Transparency International Վրաստանի» (TI) վերջին զեկույցի համաձայն՝ ենթադրյալ կոռուպցիայի 144 գործերում ներգրավված է 166 բարձրաստիճան պաշտոնյա։ Նրանց թվում են 13 դատավորներ, 27 պատգամավորներ, կառավարության 28 անդամներ և 53 քաղաքապետարանի պաշտոնյաներ:
Այս 144 գործերի շարքում են նաև կասկածներն այն մասին, որ վարչապետ Իրակլի Ղարիբաշվիլին կառավարական ինքնաթիռն օգտագործել է անձնական նպատակներով, ինչպես նաև Ղարիբաշվիլիի կնոջ ծննդյան թանկարժեք երեկույթը, Վրաստանի նախկին գլխավոր դատախազ Օթար Պարցխալաձեի ունեցվածքը և այլն։
● Բարձր մակարդակի կոռուպցիայի առկայության և խնդրի լրջության մասին վկայում են տեղական քաղաքացիական հասարակության բացահայտումները, ինչպես նաև միջազգային գնահատականները, Վրաստանում անցկացված հասարակական կարծիքի հարցումները և հետաքննող լրագրողների և ոչ կառավարական կազմակերպությունների կողմից վերհանված ենթադրյալ դեպքերի աճող թիվը։
● Վրաստանում կոռուպցիոն հանցագործությունների կանխարգելման համար պատասխանատու մարմինները (Գլխավոր դատախազությունը և Պետական անվտանգության ծառայությունը) ամենաբարձր մակարդակի վրա գտնվող կոռուպցիայի հնարավոր դեպքերը թողնում են առանց արդյունավետ արձագանքման։ Հատկապես, եթե դրանում ներգրավված են իշխող կուսակցությանը մոտ կանգնած մարդիկ։
● Օրինակ՝ դատախազության և Պետական անվտանգության ծառայության վերջին տարիների զեկույցները ցույց են տալիս, որ կոռուպցիոն հանցագործությունների համար ձերբակալված ամենաբարձրաստիճան պաշտոնյաները քաղաքապետն ու նախկին մարզպետն են։
● «Transparency International Վրաստանի» կողմից պարբերաբար հասցեագրվող գործերը մնում են անպատասխան, չնայած այն հանգամանքին, որ վրացական օրենսդրության համաձայն՝ հանցագործության մասին տեղեկություն ստանալուց հետո քննիչն ու դատախազը պարտավոր են հետաքննություն սկսել։
