Մոլդովան կարող է հրաժարվել ԵՄ-ի հետ Ասոցացման համաձայնագրից

Մոլդովայի նախագահ Իգոր Դոդոնը չի բացառել, որ խորհրդարանական ընտրություններից հետո ԵՄ հետ Ասոցացման համաձայնագիրը կարող է չեղարկվել: Այս մասին Դոդոնը հայտարարել է Ռուսաստանի իր գործընկեր Վլադիմիր Պուտինի հետ հանդիպմանը, որը տեղի է ունեցել Մոսկվայում՝ Մոլդովայի նորընտիր նախագահի առաջին պաշտոնականայցի շրջանակում:

«Փետրվարի սկզբին ես կլինեմ Բրյուսելում: Իհարկե, այդ մասին կխոսենք նաև Եվրոպական միության մեր գործընկերների հետ: Կներկայացնենք թվեր: Անցել է երկու տարի: Ո՛չ տնտեսության մեջ, ո՛չ այլ ոլորտներում արդյունքներ առայժմ չկան, այնպես որ, եկե՛ք որոշենք՝ ինչ ենք անելու հետագայում»,- ասել է Իգոր Դոդոնը, որի խոսքերը մեջբերում էzdg.md պորտալը:

Դոդոնը կարծում է, որ Ասոցացման մասին համաձայնագիրը Մոլդովային չի բերել ակնկալվող արդյունքները: «Ի դեպ, ես բազմիցս դեմ եմ հանդես եկել այդ համաձայնագրի ստորագրմանը: Ես կարծում եմ, որ այդ համաձայնագիրը Մոլդովային ոչ մի դրական բան չիտվել… Ես չեմ բացառում, որ հաջորդ խորհրդարանական ընտրություններից հետո (…) այդ համաձայնագիրը կչեղարկվի»,- շարունակել է նա:

Հանդիպմանը Վլադիմիր Պուտինը նշել է, որ երկու երկրների հարաբերությունները վերջին շրջանում դասավորվում են լավագույն կերպով: «Այդ մասին է վկայում նաև վերջին տարիներին ապրանքաշրջանառության ավելացումը երկու անգամ… Բայց ես շատ մեծ ակնկալիքներ ունեմ, որ Ձեր առաջին այցը Ռուսաստան, նախագահի պաշտոնում սա Ձեր առաջին արտասահմանյան այցն է, լավ խթան կհանդիսանա բոլոր ուղղություններով մեր միջպետական կապերի զարգացման համար… »,- նշել է Պուտինը:

Նա նաև խոստացել է Մոլդովայի նախագահին աջակցություն ցուցաբերել Մոլդովայի շուրջ 50 քաղաքացիների (որոնց արգելվում է մուտք գործել ՌԴ) մուտքը Ռուսաստան թույլատրելու ուղղությամբ:

Իր հերթին Դոդոնը նշել է, որ պատրաստվում է վերսկսկել մոլդովական ապրանքների մատակարարումը ռուսական շուկա:

Մոլդովայի Սոցիալիստների կուսակցության ղեկավար Իգոր Դոդոնը, որը հրապարակավ կողմ է հանդես գալիս Ռուսաստանի հետ հարաբերությունների կարգավորմանը և սկեպտիկորեն է վերաբերում եվրաինտեգրմանը, նախագահ է ընտրվել 2016թ. դեկտեմբերին:

Մոլդովայում նախագահը հիմնականում կատարում է ներկայացուցչական գործառույթներ, իսկ արտաքին քաղաքականությունը երկրի կառավարության իրավասության տակ է:

ԵՄ-ի հետ Ասոցացման համաձայնագրի քաղաքական մասը Մոլդովայի, Վրաստանի և Ուկրաինայի հետ ստորագրվել է 2014թ. հունիսի 27-ին: Ռուսաստանի պաշտոնատար անձինք բազմիցս հայտարարել են, որ Ռուսաստանի հարևանների կողմից ԵՄ-ի հետ Ասոցացման մասին համաձայնագրի և ազատ առևտրի մասին պայմանագրերի կնքումը դիտարկվում է որպես սպառնալիք ՌԴ շահերին: 2013թ. վերջին Ուկրաինայի կառավարության կողմից Համաձայնագրի ստորագումից հրաժարվելը հանգեցրեց Կիևում զանգվածային ցույցերի, որոնք ավելի ուշ վերածվեցին արյունալի բախումների և ավարտվեցին իշխանափոխությամբ: