Meydan TV-ի գործը. քննությունն ավարտվել է, առաջադրվել են նոր մեղադրանքներ
Meydan TV գործով քննությունն ավարտվել է
Բաքվի ոստիկանության գլխավոր վարչությունում իրականացվող՝ Meydan TV-ի գործով քննությունն ավարտվել է: Մեղադրանքները խստացվել են՝ մեղադրյալներին առաջադրվել են Քրեական օրենսգրքի 8 հոդվածներ:
Առաջադրված մեղադրանքների թվում են ապօրինի ձեռնարկատիրությունը, հանցավոր եղանակով ստացված գույքի օրինականացումը, մաքսանենգությունը, հարկերից խուսափումն ու փաստաթղթերի կեղծումը: Ակնկալվում է, որ գործի նյութերը կուղարկվեն Բաքվի ծանր հանցագործությունների դատարան:
2024թ. դեկտեմբերի 6-ին ձերբակալվել են Meydan TV-ի աշխատակիցներ Ռամին Դեկոն (Ջաբրայիլզադե), Այնուր Գանբարովան (Էլգյունեշ), Այսել Ումուդովան, Այթաջ Ահմեդովան (Թափդիկ), Խայալա Աղաևան, Նաթիկ Ջավադլին և Ուլվի Թահիրովը: Նրանց մեղադրանք է առաջադրվել Քրեական օրենսգրքի 206.3.2 հոդվածով (մի խումբ անձանց կողմից նախնական համաձայնությամբ իրականացված մաքսանենգություն), իսկ նրանց նկատմամբ հարուցված քրեական գործը ստացել է Meydan TV-ի գործ անվանումը: Այնուհետև այս գործով ձերբակալվել են նաև լրագրողներ Շամշադ Աղան, Նուրլան Լիբրեն, Ֆաթիմա Մովլամլին և Ուլվիյա Ալին:
Meydan TV-ն հայտարարում է, որ այս ձերբակալությունները կապված են իր քննադատական գործունեության հետ:
Ստորին շարք՝ Ուլվիյա Ալի, Խայալա Աղաևա, Ֆաթիմա Մովլամլի, Այնուր Էլգյունեշ, Այթաջ Թափդիկ, Այսել Ումուդովա
Վերին շարք՝ Ռամին Դեկո, Ահմեդ Մուխթար, Ուլվի Թահիրլի, Նուրլան Լիբրե, Շամշադ Աղա, Նաթիկ Ջավադլի
«Ազատ արձակե՛ք մեր աշխատակիցներին»
Meydan TV-ի խմբագիր Օրհան Մամմադը մեկնաբանել է ներկայացված մեղադրանքներն ու նոր ձերբակալությունները:
«Մենք չենք ընդունում այդ բոլոր մեղադրանքները: Վերջին օրերին փորձում են գործում ներգրավել հավելյալ անձանց: Meydan-ի հետ որևէ կապ չունեցող Ուլվի Թահիրովի գործի միացումը Meydan TV-ի գործին վկայում է, որ իշխանություններն ընդլայնում են լրագրողների հանդեպ զրպարտչական մեղադրանքների շրջանակը: Բռնաճնշումները չեն կարող կանգնեցնել ազատ մամուլը, բայց իշխանությունն ամեն օր պատմության մեջ նոր սև բիծ է թողնում: Ազատ արձակե՛ք մեր աշխատակիցներին»:
Օգոստոսի 27-ին ֆոտոլրագրող Ահմեդ Մուխթարը նույնպես ձերբակալվեց Meydan TV-ի գործով, դատարանը նրա նկատմամբ խափանման միջոց է ընտրել 40 օր ձերբակալությունը:
Meydan TV-ի ղեկավարությունը հայտարարել է, որ Ահմեդ Մուխթարն առնչություն չունի խմբագրության հետ.
«Ահմեդ Մուխթարը երբեք մեզ հետ չի համագործակցել»:
Ձերբակալված լրագրողները մեղքը չեն ընդունում և պնդում են, որ հետապնդման են ենթարկվում մասնագիտական գործունեության համար: Իրավապահ մարմինները գործի վերաբերյալ լրացուցիչ մեկնաբանություններ չեն արել:
Հետևեք մեզ — Facebook | Youtube
Meydan TV գործով քննությունն ավարտվել է
