Հարցվածների ընդամենը 32,4%-ն է աջակցում Վրաստանի իշխող ուժին․ Edison Research
Edison Research-ի նոր հետազոտություն Վրաստանի վերաբերյալ
Edison Research-ի կողմից անցկացված հասարակական կարծիքի հարցման համաձայն՝ Վրաստանի բնակչության 63 տոկոսը կարծում է, որ երկիրը զարգանում է սխալ ուղղությամբ, իսկ 37 տոկոսը կարծում է, որ այն ճիշտ ուղղությամբ է ընթանում։
Հասարակական կարծիքի հարցումն իրականացրել է Edison Research միջազգային հետազոտական ընկերությունը՝ վրացական Formula հեռուստաընկերության պատվերով։
Հետազոտության շրջանակներում պատահականության սկզբունքով հարցման են մասնակցել 18 տարեկանից բարձր 1000 անձինք, ովքեր ունեն ընտրելու իրավունք և բնակվում են Վրաստանում։
Հետազոտության ճշգրտության տատանումը կազմում է +/- 2,5% Վրաստանի համար և +/- 2,5% Թբիլիսիի համար՝ 95% վստահության միջակայքով: Դաշտային աշխատանքներն իրականացվել են 2024 թվականի հուլիսի 11-24-ը։
Edison Research-ի վերջին երեք հարցումների համաձայն՝ ավելացել է այն քաղաքացիների թիվը, որոնք կարծում են, որ Վրաստանը զարգանում է սխալ ուղղությամբ։
Հարցին. «Եթե այսօր խորհրդարանական ընտրություններ լինեին, ո՞ր կուսակցության օգտին կքվեարկեիք», հարցվածների 32,4 տոկոսը պատասխանել է, որ կաջակցեր իշխող «Վրացական երազանք» կուսակցությանը կամ նրա արբանյակ «Ժողովրդի ուժ» կուսակցությանը. 17,3 տոկոսն իր ձայնը կտար ընդդիմադիր «Ազգային շարժում» և «Ագմաշենեբելի ռազմավարություն» կուսակցություններին, մնացած կուսակցությունները կստանային ձայների 12,8-ից մինչև 0,4 տոկոսը։
Քաղաքական գործիչներից, ըստ հարցման, բնակչությունն ամենաշատը համակրում է գործող նախագահ Սալոմե Զուրաբիշվիլիին և չորրորդ նախագահ Գիորգի Մարգվելաշվիլիին (63 տոկոս), ժողովրդականության վարկանիշում երրորդ տեղը զբաղեցնում է նախկին օմբուդսմեն Նինո Լոմջարիան (48 տոկոս), որին հաջորդում են «Ազգային շարժման» նախագահ Թինա Բոկուչավան և ընդդիմադիր պատգամավոր Գիորգի Վաշաձեն (41 տոկոս)։
Հարցվածների 29 տոկոսը կարծում է, որ «Վրացական երազանքն» արժանի է վերընտրվելու, իսկ 71 տոկոսը կարծում է, որ ժամանակն է հնարավորություն տալ մեկ այլ կուսակցության։ Նախորդ հարցումների համեմատ աճել է այդ կարծիքը կիսող անձանց թիվը։
Ընդ որում, հարցվածների մեծամասնությունը (61 տոկոս) իշխող կուսակցության և ընդդիմադիր միավորման միջև ընտրություն կատարելիս նախապատվությունը տալիս է ընդդիմությանը։ Սա ներառում է նաև նրանց, ովքեր դեռ չեն կողմնորոշվել, թե ում են ընտրելու 2024 թվականի հոկտեմբերի 26-ին կայանալիք խորհրդարանական ընտրությունների ժամանակ։
