«Պիթոն» մականունով օլիգարխը»․ Daily Mail-ի հոդվածը Բիձինա Իվանիշվիլիի մասին
Daily Mail-ի հոդվածը Բիձինա Իվանիշվիլիի մասին
«Ինչպես է «Պիթոն» մականունով օլիգարխը, որը բոնդյան չարագործի որջում է ապրում, որոշելու Արևմուտքի կարևորագույն դաշնակցի ապագան»․ բրիտանական Daily Mail պարբերականն այսպես է վերնագրել Բիձինա Իվանիշվիլիի, Վրաստանի ընթացիկ իրադարձությունների և կայանալիք խորհրդարանական ընտրությունների մասին իր հոդվածը։
Պարբերականը գրում է, որ հոկտեմբերի 26-ի խորհրդարանական ընտրությունները Վրաստանում դիտարկվում են որպես հանրաքվե, որի արդյունքում որոշվելու է՝ երկիրը կշարունակի՞ շարժվել դեպի Արևմուտք, թե՞ կվերադառնա «Կրեմլի արյունարբու բռնապետի գիրկը»։ Daily Mail-ի կարծիքով՝ քանի որ օլիգարխ Իվանիշվիլին իր հարստությունը կուտակել է Մոսկվայում, այժմ փորձում է ընդօրինակել Վլադիմիր Պուտինի բռնաճնշող ռեժիմին։
«Նախընտրական պայքարի կենտրոնում գտնվում է ուրվականը Բիձինա Իվանիշվիլիի, ով իշխանության եկավ 12 տարի առաջ և իրեն ներկայացնում էր որպես ժողովրդավարության փրկիչ այն ֆոնին, երբ նախորդ կառավարությունը սկսել էր չարաշահել իշխանությունը։
Նրան անվանում են «Պիթոն», քանի որ նա սիրում է դանդաղ «խեղդամահ անել» իր հակառակորդներին։ Այժմ հարցն այն է՝ արդյոք օլիգարխը նման մոտեցում կկիրառի սեփական երկրի նկատմամբ»,- գրում է Daily Mail-ը։
Պարբերականը նաև նշում է, որ Ուկրաինայում պատերազմի մեկնարկից հետո Վրաստանը հրաժարվել է Ռուսաստանի դեմ պատժամիջոցներ մտցնելուց և նույնիսկ վերականգնել է ՌԴ հետ ուղիղ օդային հաղորդակցությունը։ Daily Mail-ը հիշեցնում է նաև իշխող կուսակցության հակաարևմտյան հռետորաբանության, «օտարերկրյա գործակալների մասին» և հոմոֆոբ օրենքների ընդունման, ընդդիմադիր կուսակցությունների գործունեությունն արգելելու մտադրության մասին։ Հիշատակելով իշխող կուսակցության սկանդալային նախընտրական պաստառները՝ պարբերականը «Վրացական երազանքի» ողջ նախընտրական արշավն անվանել է «լավ ֆինանսավորված»։
«Շատերը մտավախություն ունեն, որ Իվանիշվիլին կգողանա ընտրությունները և իրեն հաղթող կհայտարարի, այնուհետև կփորձի ուժով ճնշել բողոքի ցույցերը և կհայտարարի, որ ցանկացել է խուսափել պետական հեղաշրջումից։ Թբիլիսիում շատերը կասկածներ ունեն, որ Վրաստանի ապագան վերջնարդյունքում կախված է նրանից, թե ինչից է օլիգարխն ավելի շատ վախենում՝ արևմտյան պատժամիջոցների պատճառով իր միլիարդները կորցնելո՞ւց, թե՞ կյանքը կորցնելուց և Պուտինից, ով հայտնի է իր թշնամիներին վերացնելով»,- գրում է Daily Mail-ը։
