Հայաստանի առողջապահական ոլորտի ներկայացուցիչներն ահազանգում են՝ երկիրը մտնում է կորոնավիրուսի 4-րդ ալիքի մեջ։ Վերջին օրերին նոր դեպքերի, հոսպիտալացումների և մահացության կտրուկ աճ է նկատվում։ Կորոնավիրուսի «Դելտա» տեսակի շրջանառությամբ պայմանավորված՝ բարդ դեպքեր են գրանցվում նաև երիտասարդների մոտ։
Օգոստոսի 13-ի ժամը 11։00-ի դրությամբ՝ հաստատվել է կորոնավիրուսային հիվանդության ընդհանուր 233 797 դեպք, որոնցից 222 183-ն` առողջացած, 4678-ը` մահվան ելքով: Երեկ կատարվել է 6055 թեստավորում, որից հաստատվել է 397 նոր դեպք: 264 մարդ առողջացել է։ Գրանցվել է մահվան 9 դեպք: Այս պահին փաստացի բուժում է ստանում 5805 պացիենտ: Մինչ օրս կատարվել է 1 421 593 թեստավորում:
Հայաստանը պատվաստում է չափահաս՝ 18 տարին լրացած անձանց՝ կամավորության սկզբունքով։ Սակայն պետական կառույցներում, տեղական ինքնակառավարման մարմիններում և սպասարկման ոլորտում աշխատողների համար պատվաստումը պարտադիր կդառնա։
Սա առողջապահության նախարարության առաջարկն է, որը շուտով իրավական ակտի տեսք կստանա։ Եվ պատվաստումից հրաժարվող անձինք ստիպված կլինեն ամսական 2 անգամ գործատուին ներկայացնել ՊՇՌ թեստի արդյունք։ Պահանջը չի կիրառվի միայն այն անձանց նկատմամբ, որոնք ունեն պատվաստման հակացուցում։
«Կորոնավիրուսը լուրջ մարտահրավեր է մեր երկրի համար, անտեսանելի պատերազմ, որը մենք 1.5 տարի վարում ենք։ Որպես պետություն՝ պետք է անենք ամեն ինչ մեր քաղաքացիներին համավարակից պաշտպանելու համար», — լրագրողների հետ ճեպազրույցում ասել է առողջապահության նախարար Անահիտ Ավանեսյանը։
Ի՞նչ պատվաստանյութերով և որտե՞ղ պատվաստվել
Այս պահին Հայաստանում հասանելի է 3 տեսակի պատվաստանյութ՝ բրիտանաշվեդական AstraZeneca-ն, ռուսական Sputnik V-ն և չինական CoronaVac-ը։
Նախարարը վստահեցնում է՝ պատվաստանյութի պակաս Հայաստանում չկա։ Աշխատանքներ են տարվում նոր պատվաստանյութեր ներմուծելու ուղղությամբ։
Մինչ օրս ՀՀ-ում պատվաստվել է 204 հազար քաղաքացի։ Հայաստանի քաղաքացիների համար առանձին վիճակագրություն սկսել են վարել հուլիսի 15-ից։ Թե մինչ այդ պատվաստված 132 հազար քաղաքացուց քանիսն են եղել օտարերկրացիներ, հայտնի չէ։
Պատվաստվելու համար ՀՀ քաղաքացիները պետք է մոտենան պոլիկլինիկա կամ Հյուսիսային պողոտայում գործող պատվաստման կետ։ Այստեղ պատվաստվելու համար կարելի է հերթագրվել նախապես՝ Earlyone հավելվածի միջոցով։
«Պատվաստումները պարտադիր չեն և պարտադիր չեն կարող լինել»
Կորոնավիրուսի դեմ պատվաստումների հարցին անդրադարձ է եղել նաև խորհրդարանում։ Բժշկական գիտությունների թեկնածու, նոր գումարման խորհրդարանի Առողջապահության հարցերով մշտական հանձնաժողովի նախագահ ընտրված Նարեկ Զեյնալյանն ասել է, որ վերջին տասն օրվա կտրվածքով Հայաստանում դիտվող վարակման դեպքերի աճը պայմանավորված է «Դելտա» շտամով, որի վարակելիության աստիճանը շատ ավելի բարձր է:
Պատգամավորը քաղաքացիներին հորդորում է չտրվել հակապատվաստումային քարոզչությանը և պատվաստվել․«Պատվաստումները պարտադիր չեն և պարտադիր չեն կարող լինել: Բայց և այնպես, պետությունը կիրառում է որոշակի գործիքակազմ, որպեսզի բնակչությանը բերի պատվաստումների, որովհետև սա է միակ միջոցը համավարակի դեմ արդյունավետ պայքարի: Եվրոպական, ԱՊՀ երկրներում շատ ավելի խիստ մեթոդներ են կիրառվում՝ ընդհուպ մինչև հանրային վայրերի մուտքի արգելք, եթե անձը պատվաստված չէ»։
Նարեկ Զեյնալյանի կարծիքով` համավարակի տարածումը կառավարելի դարձնելու համար երկրի բնակչության առնվազն 50 տոկոսը պետք է պատվաստվի։
