Հայաստանում վերջին մեկ օրվա ընթացքում գրանցվել է կորոնավիրուսի 634 նոր դեպք, մահացել է 10 մարդ։ Ամեն օր հիվանդացության և մահացության ավելի բարձր ցուցանիշ է գրանցվում։ Առողջապահության նախարարության մշտադիտարկումները ցույց են տվել, որ վարակման նոր դեպքերն առավել սուր ընթացք են ունենում՝ ուղեկցվելով արագ զարգացող թոքաբորբով։
Ոլորտի պատասխանատուներն արդեն իսկ խստացրել են հակահամաճարակային կանոնների պահպանման վերահսկողությունը և շարունակում են ձեռնարկել քայլեր, որպեսզի նոր ուսումնական տարվա մեկնարկին ընդառաջ կառավարելի դարձնեն համավարակի տարածման ռիսկերը։
Վերջին շրջանում հայտնաբերվող շտամների առանձնահատկությունների, վարակի դեմ շարունակական պայքարի, պատվաստումների ընթացքի և սեպտեմբերին դպրոցներում նախատեսվող փոփոխությունների մասին։
«Դելտա» շտամն ու կորոնավիրուսի երիտասարդացումը
Առողջապահական գերատեսչությունը սկսել է հիվանդանոցային մահճակալների ծավալման գործընթաց, քանի որ հիվանդացության թվի աճին զուգահեռ՝ նաև ընթացքի վատթարացում է նկատվում։
«Այժմ նկատվում է կորոնավիրուսային հիվանդության երիտասարդացում և ընթացքի ավելի կտրուկ վատթարացում, ինչը նշանակում է, որ կունենանք հոսպիտալացման ավելի երկար օրեր: Առկա մահճակալային ֆոնդի կիրառման առումով՝ դա շատ ավելի կբարդացնի այս իրավիճակը», — ԱԺ-ում լրագրողների հետ ճեպազրույցի ժամանակ ասել է առողջապահության նախարար Անահիտ Ավանեսյանը։
Նրա խոսքով՝ այս պահին 1000-ից ավելի պացիենտ է հիվանդանոցային բժշկական օգնություն ստանում: Առողջապահության նախարարությունը քայլեր է ձեռնարկում համակարգի հզորություններն ավելացնելու ուղղությամբ։
Հիվանդացության աճի զսպմանն էր միտված նաև այն, որ մեկ շաբաթ առաջ ոստիկանությանն ու տեսչական մարմիններին հանձնարարվեց խիստ վերահսկողություն իրականացնել փակ տարածքներում դիմակ կրելու պահանջի նկատմամբ։ Խախտումների դեպքում կիրառվում են օրենքով սահմանված վարչական պատասխանատվության միջոցներ։
Հայաստանում գրանցվող դրական դեպքերի գերակշիռ մասը «Դելտա» շտամն է։
Ավանեսյանի խոսքով՝ 60 հետազոտությունից 50 և ավելիի արդյունքում հենց այդ շտամն է հայտնաբերվում։ Այն բավականին ագրեսիվ է, արագ է տարածվում, և երբեմն պացիենտների մոտ ի հայտ չեն գալիս արդեն իսկ կորոնավիրուսի հետ ասոցացվող սիմպտոմներ։
«Սիմպտոմների առումով մի փոքր տարբերություն նկատում են մասնագետները: Նախկինում համի-հոտի կորուստը բնորոշիչ էր կորոնավիրուսային վարակին, սակայն այս շտամի պարագայում այդքան էլ այդպես չէ: Շատ դեպքերում համի և հոտի զգացողությունը չեն կորցնում: Բացի դրանից՝ այն ավելի հարբուխային սիմպտոմներ ունի, ինչն անգլիական շտամին այդքան էլ բնորոշ չէ», — ասում է նախարարը:
Հիվանդության տարածումն ու նոր ալիքը կանխելու դեռևս միակ միջոցը պատվաստումն է։ Թեև պատվաստումների տեմպը մեծացել է, սակայն ոլորտի պատասխանատուների գնահատմամբ՝ այն դեռևս գոհացուցիչ չէ։
Կարևոր են համարում, որ հատկապես հիմա՝ ուսումնական տարվա մեկնարկին ընդառաջ, պատվաստվեն հնարավորինս մեծ թվով ուսուցիչներ, դասախոսներ ու պրոֆեսորներ։
Համավարակն ու սեպտեմբերը
Հանրակրթական դպրոցներում կկազմակերպվի առկա ուսուցում։ Դասընթացները կիրականացվեն օրումեջ, եթե դասարանում 20-ից ավելի աշակերտ է սովորում։ Կրթական գերատեսչության որոշումն է։
«Մենք նախատեսում ենք նաև այնպիսի դեպքեր, երբ եթե ուսումնական հաստատությունները կարողանան հավուր պատշաճի պահպանել բոլոր հակահամաճարակային կանոնները, ապա կկարողանան դիմել ԿԳՄՍ նախարարություն, ինչից հետո կիրականացվի ստուգում, ապա կորոշվի՝ արդյոք դպրոցը կարող է անցնել ամենօրյա ռեժիմով դասապրոցեսի», — օգոստոսի 25-ին տեղեկացրել է ԿԳՄՍ փոխնախարար Ժաննա Անդրեասյանը:
Աշակերտները կլինեն դիմակներով, կիրականացվի ախտահանման գործընթաց։ Փոխնախարարը հայտնեց, որ ԿԳՄՍ նախարարությունը աշխատանքներ է տանում միջազգային գործընկերների հետ, որպեսզի դպրոցներն ապահովվեն անհատական պաշտպանիչ ու ախտահանող միջոցներով:
Հիշեցնենք, որ հոկտեմբերի 1-ից ուսումնական հաստատություններում աշխատողների համար ևս պատվաստումը կդառնա պարտադիր։ Եթե գործատուին չներկայացնեն պատվաստման հավաստագիր, ստիպված կլինեն երկու շաբաթը մեկ ՊՇՌ թեստ հանձնել ու ներկայացնել թեստի բացասական պատասխանը։
Կանխարգելման ամենագործուն միջոցը՝ պատվաստում
COVID-19-ի դեմ պատվաստումների մեկնարկից ի վեր, օգոստոսի 22-ի դրությամբ՝ կատարվել է 239.342 պատվաստում։ Առաջին դեղաչափ է ստացել 153.888, երկրորդ դեղաչափ` 85.454 քաղաքացի։
Պատվաստումներն իրականացվում են կամավորության սկզբունքով։ Այս պահին Հայաստանում հասանելի են «Կորոնավակ», «ԱստրաԶենեկա», «Սպուտնիկ-Վի» և «Սինոֆարմ» պատվաստանյութերը։ 18 և բարձր տարիքի Հայաստանի և օտարերկրյա քաղաքացիների պատվաստումն անվճար է։
Պոլիկլինիկաներում հերթապահություն է սահմանվել նաև հանգստյան օրերին՝ ժամը 10։00-16։00-ը, որպեսզի աշխատող քաղաքացիները, որոնք ժամանակի սղության պատճառով չեն հասցնում պատվաստվել, ևս պաշտպանված լինեն վարակից։
Նախապես պետք է զանգահարել նախընտրած պոլիկլինիկա և գրանցվել պատվաստման համար։ Պատվաստման կետ է գործում նաև Հյուսիսային պողոտայում։
Հիշեցնենք, որ մինչ օրս Հայաստանում գրանցվել է կորոնավիրուսային հիվանդության ընդհանուր 239.056 դեպք, որից 224.919-ն` առողջացած, 4778-ը` մահվան ելքով: Այս պահին փաստացի բուժում է ստանում 8209 պացիենտ:
