AstraZeneca․ փրկությո՞ւն, թե՞ վտանգ։ Ամեն ինչ՝ կորոնավիրուսի դեմ պատվաստանյութի շուրջ վերջին վեճերի մասին

Եվրոպայի 13 երկիր, այդ թվում՝ Ֆրանսիան, Գերմանիան, Իսպանիան և Իտալիան, կասեցրել են կորոնավիրուսի դեմ AstraZeneca պատվաստանյութի կիրառումը և սպասում են դրա անվտանգության մասին հետագա տեղեկություններին։ Պատճառն այն հաղորդագրություններն են եղել, որ այն թրոմբների առաջացմանն է նպաստում։ Սակայն դրա արտադրողը, Օքսֆորդի համալսարանը, միջազգային կարգավորող մարմիններն ու Առողջապահության համաշխարհային կազմակերպությունը (ԱՀԿ) հայտարարում են, որ այդ հաղորդագրությունները ոչ մի ապացույց չունեն։

Եվրամիության մյուս անդամները՝ Բելգիան և Լեհաստանը, շարունակում են օգտագործել AstraZeneca։ Մեծ Բրիտանիայի իշխանությունները նույնպես հայտարարել են, որ պատվաստումը չեն կանգնեցնելու։

Մեծ Բրիտանիայում ավելի քան 11 մլն մարդ արդեն ստացել է AstraZeneca պատվաստանյութի նվազագույնը մեկ չափաբաժին, և հավելյալ մահացության կամ թրոմբների գոյացության ոչ մի նշան չի եղել։

Պատվաստանյութը շարունակել են օգտագործել Չեխիան և Ուկրաինան։ Մարտի 15-ին սկսվել է AstraZeneca-ով պատվաստումը Վրաստանում։

• Վրաստանում սկսվել է COVID-19-ի դեմ պատվաստումը
• «AstraZeneca»-ն ուշանում է, Հայաստանը պայմանավորվում է ռուսական «Սպուտնիկ V»-ի գնման մասին
• Չինական պատվաստանյութն Ադրբեջանում․ հարցեր, որոնք ունեն պատասխաններ
• Ի՞նչ է հայտնի կորոնավիրուսի դեմ պատվաստանյութերի մասին, արդյո՞ք դրանք կհաղթեն համավարակն ու ե՞րբ

Դեղամիջոցների եվրոպական գործակալությունը (EMA) իր վերջնական եզրակացությունները կհրապարակի մարտի 18-ին, սակայն դրա ղեկավար Էմեր Քուքն արդեն հայտարարել է, որ «մեծապես համոզված է» AstraZeneca պատվաստանյութի առավելությունների հարցում։

«Որոշ երկրներում հայտնաբերված թրոմբները տասնամյակների ընթացքում, ընդհանուր առմամբ, հաճախ են հանդիպում բնակչության շրջանում», — ասել է Քուքը։

ԱՀԿ-ն կոչ է արել երկրներին չկասեցնել պատվաստումը, քանի որ «ոչ մի ապացույց չկա, որ հայտնաբերված թրոմբները կապված են պատվաստանյութի հետ»։

Այս գրաֆիկը ցույց է տալիս, թե ինչպես է ընթանում պատվաստումն ամբողջ աշխարհում։ Հաշվարկն արված է բնակչության 100 մարդու համար պատվաստանյութի չափաբաժնի քանակով։ Պատվաստանյութերի մեծ մասի դեպքում պահանջվում է նվազագույնը երկու չափաբաժնի ներարկում։

AstraZeneca-ի կիրառումը կասեցրած երկրների մեկնաբանությունները 

Առաջին երկիրը, որն այդ որոշումը կայացրել է, Դանիան էր։ Նրան հետևել են Նորվեգիան և Իսլանդիան, այնուհետև՝ Գերմանիան, Ֆրանսիան, Իտալիան, Կիպրոսը, Իսպանիան, Լատվիան և Շվեդիան։

«Մի քանի շատ անսովոր և տագնապալի դեպքեր եղան, որոնք արդարացնում են այս դադարն ու վերլուծությունը։ Սա կորցրած ժամանակ չէ», — ասել է ֆրանսիացի իմունաբան Ալեն Ֆիշերը, որը գլխավորում է կառավարական խորհրդատվական խորհուրդը։

Ընդ որում, պատվաստման կասեցման որոշումը լուրջ քննադատություն է առաջացրել եվրոպացի շատ քաղաքական գործիչների և բժիշկների շրջանում։

Գերմանացի համաճարակաբան Կառլ Լաուտերբախն ասել է, որ դա քաղաքական որոշում է։ «Դատելով եղած տվյալներից՝ պատվաստման առավելությունները զգալիորեն գերազանցում են ռիսկերը, հատկապես՝ տարեցների համար», — ասել է նա Deutschlandfunk ռադիոյին։

Այս պատվաստանյութի կիրառումը կասեցրած երկրները «խուճապի են մատնվել որոշ լրատվամիջոցներում կանխակալ հաղորդագրությունների հրապարակման պատճառով», ասել է Լեհաստանի Պատվաստման խորհրդի ղեկավար Միխալ Դվորչիկը։

«Օգուտը գերազանցում է ռիսկերը»՝ Եվրոպայում վարակման քանակի կտրուկ ավելացման ֆոնին

Եվրոպայի մեծ մասը ողջ ուժով փորձում է զսպել կորոնավիրուսի համավարակի նոր ալիքը։ Շատ երկրներ կրկին խստացրել են սահմանափակումները։

Գերմանիայում վերջին մեկ շաբաթում վարակման դեպքերի քանակը 20 տոկոսով ավելին է։ Ֆրանսիայի վարչապետ Ժան Կաստեկսը հայտարարել է, որ երկիրը համավարակի «կարելի է ասել, երրորդ ալիքի մեջ է»։ Նորվեգիայի մայրաքաղաք Օսլոն հայտարարել է ավելի խիստ սահմանափակումների մասին։ Իտալիան ու Նիդեռլանդները կրկին կոշտ ագելքներ են սահմանում, այդ թվում՝ դիտարկում երթևեկությունը կտրուկ սահմանափակելու հնարավորությունը։

COVID-19․ վարակման համեմատական վիճակագրություն

Մարտի 16-ին Ֆրանսիայում մեկ օրում գրանցվել է վարակման գրեթե 30 հազար նոր դեպք (երրորդ տեղն աշխարհում)։ Իտալիայում՝ 20 396 դեպք (հինգերորդ տեղն աշխարհում), Գերմանիայում՝ 9 290 նոր դեպք մեկ օրում (11-րդ տեղն աշխարհում)։

Մեկ միլիոն բնակչությանը բաժին ընկնող վարակման դեպքերի հաշվարկով առաջին 20 երկրները․

1. Անդորա
2. Չեռնոգորիա
3. Չեխիա
4. Ջիբրալթար
5. Սան Մարինո
6. Սլովենիա
7. Լյուքսեմբուրգ
8. ԱՄՆ
9. Իսրայել
10. Պորտուգալիա
11. Պանամա
12. Արուբա
13. Լիտվա
14. Բահրեյն
15. Սեն Բարտ
16. Շվեդիա
17. Բելգիա
18. Վրաստան
19. Լիխտենշտեյն
20. Իսպանիա

Մեկ միլիոն բնակչության հաշվարկով կորոնավիրուսով վարակման քանակով Հայաստանը 33-րդ տեղում է, Ադրբեջանը՝ 81-րդ։