Հայաստան. Ընդդիմադիր գործիչը դատապարտվեց 10 տարվա ազատազրկման

Լուսանկարը՝ azatutyun.am

Ընդդիմադիր գործիչ Ժիրայր Սեֆիլյանն այսօր դատարանի որոշմամբ դատապարտվեց 10 տարի և 5 ամիս ազատազրկման:

Շուրջ 2 տարի ճաղերի հետևում գտնվող գործիչը ձերբակալվել էր զենք-զինամթերքի աօպրինի ձեռքբերման, տեղափոխման և պահպանման մեղադրանքով:

Դատական քննության ընթացքում դատավորն ապացուցված համարեց, որ Սեֆիլյանը Հայոց ցեղասպանության 100-րդ տարելիցին նախապատրաստել է զանգվածային անկարգություններ, իշխանության ներկայացուցչին զինված դիմադրություն ցույց տալով, բռնություն գործադրելով, գույք ոչնչացնելով, իսկ հետագայում էլ` 2015թ.-ին Հայաստանում անցկացված Սահմանադրական հանրաքվեին ընդառաջ, ապօրինի ձեռք է բերել հրազեն ու ռազմամթերք` նպատակ ունենալով գրավել ռազմավարական նշանակության շենքեր, իշխանություններին պարտադրել ինչ-որ գործողություններ:

Մեղադրանքում նշվում է, որ Ժիրայր Սեֆիլյանն իր կամքից անկախ ավարտին չի հասցրել հանցավոր մտադրությունները:

Իշխանությունները Սեֆիլյանին մի քանի անգամ մերժել են տալ Հայաստանի քաղաքացիություն: 2007 թ.-ին նա դատապարտվել է 1.5 տարվա ազատազրկման` ապօրինի զենք և զինամթերք պահելու մեղադրանքով: Բայց Եվրոպական դատարանը վճռել էր, որ Սեֆիլյանի իրավունքները խախտվել են:

Այսօր դատավճռի ընթերցման ժամանակ ավելի քան տասը տարվա պատժաչափի մասին լսելիս Սեֆիլյանը ծափահարել է, ասելով.

«Բրա՛վո, շուտով ձեզ համար են ընթերցելու այսպիսի վճիռներ»:

Իր գործով քննության ժամանակ ընդդիմադիր գործիչն այդպես էլ ցուցմունք չտվեց, չկարողացավ հանդես գալ պաշտպանական ճառով, վճռի հրապարակման օրը հանդես չեկավ և վերջին խոսքով:

Դատավոր Տաթևիկ Գրիգորյանը այդպես էլ թույլ չտվեց նրան խոսել նստած: Շուրջ տասը ամիս տևած դատավարության մեծ մասին Սեֆիլյանը չմասնակցեց, քանի որ դատավորը հեռացնում էր նրան նիստերից՝ պահանջելով դատարանի հետ խոսել հոտնկայս: Սեֆիլյանը մերժում էր այդ պահանջը, այդպես արտահայտելով դատական համակարգի նկատմամբ ունեցած վերաբերմունքը:

Փաստաբանների և իրավապաշտպանների գնահատմամբ՝ դատական ողջ գործընթացն ուղեկցվել է աղաղակող խախտումներով: Դատավոր Տաթևիկ Գրիգորյանը տասնյակ սանկցիաներ է կիրառել ոչ միայն մեղադրյալի ու նրա փաստաբանի, այլ նաև դատավարությանը մասնակցող Սեֆիլյանի համակիրների նկատմամբ:

Ժիրայր Սեֆիլյանի պաշտպան Արայիկ Պապիկյանը հայտարարել է.

«Սա դատավարություն չէր, այլ՝ բացահայտ քաղաքական պատվեր ու հաշվեհարդար: Մարտի 20-ը պիտի նշվի որպես արդարադատության մահվան օր, այդ օրը պետք է իջեցնեն դատարանների դրոշները և դրանց փոխարեն սև ժապավեն կապեն: Այս օրը կմնա պատմության մեջ, բայց կգա ժամանակը, երբ քաղաքական իշխանությունը պատասխան կտա դրա համար»:

Ինքը Ժիրայր Սեֆիլյանն ավելի վաղ ասել է, որ սա ոչ թե դատավարություն է, այլ հաշվեհարդար իր նկատմամբ, որը պատվիրված էր, քաղաքական հալածանք էր ու թատերական բեմականացում:

JAMnews-ը հաղորդել է նաև, որ 2016թ.-ի հուլիսի 17-ին մի խումբ զինված անձինք գրավեցին Ոստիկանության պարեկապահակային գունդը՝ պահանջելով ազատ արձակել Ժիրայր Սեֆիլյանին:

Նրանք պահանջում էին Սեֆիլյանին բերել իրենց մոտ և հայտարարում, որ պատրաստ են կատարել միայն նրա հրամանները: Բացի այդ, խմբի անդամները պահանջում էին նախագահ Սերժ Սարգսյանի հրաժարականը: Այս պահանջներին աջակցեց բնակչության որոշակի հատված և ՊՊԾ գնդի գրավումը վերածվեց բողոքի շարժման:

Զինված խումբը երկու շաբաթ անց հայտարարեց, որ հանձնվում է «ռազմագերու կարգավիճակով», որպեսզի մարտի չբռնվի ոստիկանության հետ և չթափվի այն մարդկանց արյունը, որոնք «քիչ առնչություն ունեն ռեժիմի հետ»: Խմբի անդամների նկատմամբ ևս դատական գործ է ընթանում: