Ռուսաստանում, հնարավոր է, խեղաթյուրում են GPS տվյալները Պուտինի անցուդարձը թաքցնելու համար

Go to top

Անհետացած նավը

Այս տարվա հունիսին կապիտան Գուրվան Լը Մեուրն իր առևտրային նավն ուղղում էր դեպի ռուսական Նովոռոսիյսկ նավահանգիստ: Ինչ-որ պահի ինչ-որ մի բան է տեղի ունենում, և նրա նավն անհետանում է ռադարներից:

«Սկզբից մենք տագնապի ազդանշան լսեցինք, — CNN-ի թղթակցին պատմել է Լը Մեուրը: — Մենք արագ հայտնաբերեցինք, որ մեր նավի գտնվելու վայրը, որը ցույց էր տալիս GPS-ը, տարբերվում էր իրականից 20 ծովային մղոնով»:

Տագնապն աշխատել է այն պատճառով, որ նավի նավիգացիոն համակարգը, որը GPS-ի հիման վրա է աշխատում, ցույց էր տալիս, որ այն ոչ թե ծովում է, այլ Գելենջիկի օդանավակայանի տարածքում:

Լը Մեուրն այդ մասին հայտնել է ԱՄՆ ափային պահպանությանը: Դրա ներկայացուցիչներն ավելի ուշ հայտնել են, որ ավելի քան 20 նավ, GPS-ի տվյալների համաձայն, այդ պահին նույնպես գտնվել է Գելենջիկի օդանավակայանում:

Փորձագետները պնդում են, որ դա տեղի է ունեցել այն պատճառով, որ ինչ-որ մեկը միտումնավոր խանգարել է GPS-ի աշխատանքը: Համակարգը ոչ միայն խաթարվել է, այլ դիտավորյալ մոլորության մեջ է գցվել: Իսկ ո՞վ է կանգնած այս դեպքի ետևում: Ամեն ինչ ցույց է տալիս, որ  GPS-ի աշխատանքին միջամտությունը տեղի է ունենում Ռուսաստանի տարածքից:

Նման դեպքեր

2017թ-ին կտրուկ աճել է Ռուսաստանի տարածքում GPS-ի աշխատանքի խաթարման դեպքերի քանակը: Windward ընկերության վերլուծաբաններն ավելի քան 450 դեպք են գրանցել, երբ ռադարների տվյալները չեն համընկել նավերի իրական գտնվելու վայրի հետ: Հաճախ ռադարները ցույց են տվել, որ նավերը գտնվում են Սանկտ Պետերբուրգի, Սոչիի կամ Գելենջիկի օդանավակայանների տարածքներում:

2016թ-ին Uber-ի և Google maps-ի օգտատերերը մի քանի անգամ հաղորդել են հավելվածների աշխատանքի նման խաթարումների մասին: Երբ մարդիկ գտնվել են Կրեմլի տարածքում, հավելվածները ցույց են տվել, իբր նրանք գտնվում են Վնուկովո օդանավակայանում, որը Մոսկվայի ծայրամասում է:

2016թ-ին Վլադիմիր Պուտինի մամուլի քարտուղար Դմիտրի Պեսկովն ասել է, որ նրա մոտ նույնպես պարբերաբար խեղաթյուրվում է GPS ազդանշանը, երբ նա մեքենայում է: Այլևս ոչ մի մեկնաբանություն ռուսական կողմից չի եղել:

Ի՞նչ են ասում փորձագետները

Որոշ փորձագետներ պնդում են, որ այդ խաթարումներին անմասն չեն ռուսական իշխանությունները: Դա, ինչպես կարծում են նրանք, արվում է Վլալդիմիր Պուտինի տեղաշարժը թաքցնելու նպատակով:

«Արդյո՞ք ես համարում եմ, որ GPS—ի աշխատանքի այդ խախտումները Ռուսաստանում արտոնված են իշխանության կողմից, — CNN-ին պատմել է Օսթինի Տեխասի համալսարանի դասախոս Թոդ Համֆրիսը: — Ես կասեմ, որ ավելի շատ հիմքեր ունեմ «այո» ասելու, քան «ոչ»»:

Համֆրիսը, հիմնվելով իր սեփական հետազոտությունների վրա, պնդում է, որ GPS-ը շատ հեշտ է խաբել: 2013թ-ին նա ինքն է փորձարկում անցկացրել ցույց տալու համար, թե որքան խոցելի է GPS-ը: Նախապես պայմանավորվելով 80մլն դոլար արժողությամբ զբոսանավի տիրոջ հետ, նա այնպես է արել, որ, դուրս գալով ծով, այն չի հայտնվել ռադարների վրա: Միաժամանակ ափային ազդանշանը նույնպես չի աշխատել:

Բրեդ Փարքինսոնը GPS-ի հիմնական մշակողներից մեկն է: Նա է ղեկավարել այդ համակարգի օգտագործմամբ ինքնաթիռի առաջին «կույր» վայրէջքը:

«Այսօր բավականին շատ են GPS ընդունիչները, որոնց շատ հեշտ է խաբել, — ասում է նա: Դրանց անվտանգությունը հնարավոր էր կատարելագործել մշակման ժամանակ, սակայն, անկեծղ ասած, այդպիսի բան չի արվել: Դրանում պարզապես տնտեսական անհրաժեշտություն չի եղել»: