Ադրբեջանի շրջաններից մեկի ղեկավարությունը հրապարակել է 30 գրքերի անվանում, որոնք պարտադիր պետք է կարդացվեն

Ադրբեջանում Նախիջևանի Ինքնավար Հանրապետության Գերագույն մեջլիսի նախագահ Վասիֆ Տալիբովը օգոստոսի 28-ին հրաման է ստորագրել «Ընթերցանության համար պարտադիր գրքերի ցանկի մասին»: Ըստ կարգադրության՝ հաստատվել է ընթերցանության համար պարտադիր գրքերի ցուցակ, որոնք նպաստում են երիտասարդ սերնդի մոտ հայրենասիրության, ազգային ինքնության և աշխարհայացքի ձևավորմանը: Դրա համաձայն՝ ուսումնական և մշակութային հաստատությունների գրադարաններում պետք է ստեղծվեն հատուկ գրքի անկյուններ:

Ցուցակը ներառում է 30 անուն գիրք, որի մեջ կան ինչպես ադրբեջանցի հեղինակներ, այնպես էլ համաշխարհային գրականության դասականներ:

Ցանկը գլխավորում է, ինչպես կարելի էր ենթադրել, Ադրբեջանի նախկին նախագահ, Նախիջևանի ղեկավարի պաշտոնում Տալիբովին նախորդած Հեյդար Ալիևը: Հենց առաջին առաջին տեղն է զբաղեցնում նրա «Համազգային առաջնորդ Հեյդար Ալիևի ուղերձը Ադրբեջանի ժողովրդին՝ նոր տարվա՝ 2001թ, նոր ժամանակաշրջանի և երրորդ հազարամյակի կապակցությամբ»:

Ցանկում ներառված են նաև Նիզամիի, Տուսիի, Սաադիի, Շահրիյարի, ծնունդով Նախիջևանից մի քանի հայտնի հեղինակների, ինչպես նաև Դրայզերի, Հեմինգուեյի, Մոպասանի, Ջեք Լոնդոնի և այլ դասականների ստեղծագործություններ:

Ռուսական գրականությունը ներկայացված է ընդամենը մեկ՝ խորհրդային տարիների հեղինակի. Նիկոլայ Օստրովսկու ինքնակենսագրական «Ինչպե՞ս է կոփվում պողպատը» վեպով:

30 գրքերի ամբողջական ցուցակին կարող եք ծանոթանալ այստեղ (ռուսերենով).

Տալիբովի կարգադրությունը բուռն քննարկումների տեղիք է տվել Ադրբեջանի սոցցանցերում: Ներկայացնում ենք մի քանի մեկնաբանություն՝ առանց հեղինակների անունները նշելու.

— Անկեղծ ասած, այնտեղ նշված գրքերի մեծ մասը այս կամ այն չափով հասկանալի են՝ հարգանք մեծի նկատմամբ, խրատ, բայց մի քանի կետ միանգամայն դուրս է մնում ցուցակից: Կամ հումորի համար են ներառել, կամ ընդհանրապես գլուխ չեն հանել:

— Օ՜յ: Ես էլ ցանկին ծանոթացա… այնտեղ իսկապես հետաքրքիր ստեղծագործություններ են ներկայացված: Իսկապես զարմացած եմ:

— Հիանալի նախաձեռնություն է: Ես այդ հրամանը կտարածեի ամբողջ Ադրբեջանում: Բոլոր նրանց, ովքեր չեն կարդա այդ գրքերը, տուգանե՛լ: Միգուցե այդ դեպքում մի քանի տարի հետո մեր հասարակությունում դրական փոփոխություններ տեղի կունենան:

— Հիասքանչ ընտրություն է՝ սկսած Ulu Öndər-ից («Մեծ առաջնորդ». այդպես են Ադրբեջանում անվանում Հեյդար Ալիևին) մինչև սոցիալիստական ռեալիզմ: Եվ որպես բոնուս՝ սոցիալական ցածր պատասխանատվություն, բայց փոխարենը բարձր հայրենասիրության բարձր զգացում ունեցող աղջկա պատմություն (նկատի ունի Մոպասանի Boule de Suif ստեղծագործությունը-խմբ.)