Բաքվի քաղաքային իշխանությունները սկսել են թափառական շների գնդակահարություն

Սումգայիթ քաղաքի 5-ամյա բնակիչ Զեյնաբ Միքայիլզադեն հուլիսի վերջին մահացել է թափառական կատաղած շան կծելու պատճառով: Այդ տեղեկատվությունն առիթ է դարձել Բաքվի և Սումգայիթի փողոցային թափառական շների զանգվածային գնդակահարության արշավի համար:

Դա 2017թ—ին գրանցված միակ մահացու դեպքն է շան կծածից: Սակայն առողջապահության նախարարության հիգիենայի և համաճարակաբանության կենտրոնի բաժնի վարիչ Ռիտա Իսմայիլովայի խոսքով՝ այս տարվա 8 ամիսների ընթացքում Ադրբեջանում 6500 մարդու տարբեր կենդանիներ են կծել, ընդ որում այդ թվի 90%—ը բաժին է ընկնում թափառական շներին:

Օգոստոսի առաջին կեսին Բաքվի շատ բնակիչներ թափառական շների իսկական «որսի» ականատես են դարձել: Քաղաքապետարանի աշխատակիցները հատուկ մեքենաներով շրջում են և գնդակահարում կենդանիներին մարդկանց աչքի առջև, այդ թվում՝ երեխաների: Ընդ որում, շների դիակները չեն հավաքվում, այլ թողնվում են արևի տակ այս շոգ եղանակին: «Որսորդների» խոսքով՝ դիակները հավաքելու համար պատասխանատու է քաղաքապետարանի այլ ծառայություն:

«Այսօր վերականգնվել է շների գնդակահարությունը Բաքվում: Ինչպես միշտ, հարվածի տակ են ընկել ամենախաղաղ և վստահող կենդանիները: Շների սպանություններն արդյունքում բերում են արհեստական ընտրության, և կենդանի են մնում առավել վայրի և մարդկանց հանդեպ առավել անհանդուրժող շները», — Ֆեյսբուքում գրում է Բաքվի բնակիչ Նիգյար Աղաևան:

Այդ արշավը հանգեցրել է սոցցանցերում մեծ քննարկման: Մեկնաբանողների մեծ մասը քննադատել է կենդանիներին սպանելը, սակայն քիչ չէին նաև նրանք, ովքեր արդարացնում էին քաղաքային իշխանությունների գործողությունները: Ահա մի քանի մեկնաբանություն.

«Թափառական կենդանիների պոպուլյացիայի վերահսկման միակ մեթոդը ստերիլացումն է և ամորձատումը: Մնացած միջոցներն անարդյունք են: Մեր երկրում մի քանի տասնամյակ գնդակահարել են փողոցային շներին, եթե դա գործուն մեթոդ լիներ, խնդիրը կանհետանար 50 տարի առաջ»:

«Ստերիլացումն ու ամորձատումը թափառական կենդանիների պոպուլյացիայի խնդիրը լուծում է 7 տարում: Այդպիսի շները դադարում են ագրեսիվ լինել և մարդկանց համար վտանգ չեն ներկայացնում: Երբ կենդանիներին սպանում են, մնացածները սկսում են շատ արագ բազմանալ: Բնությունն է այդպես նախատեսել: Շունը կարող է ավելի քան 9 ձագ ունենալ, եթե տարածքում շները պակասել են»:

«Երկիրը, որը տարբեր օլիմպիադաներ և ֆորմուլա մեկեր է անցկացնում, չի կարող լուծել այս խնդիրը: Ավելի ճիշտ՝ չի ուզում: Առաջատար եվրոպական երկրների հետ են համեմատվում, սակայն այնտեղ պարզապես թափառական ոչ մի շուն կամ կատու չկա: Վերցնենք թեկուզ մեզ հոգեհարազատ Թուրքիան ու Վրաստանը: Որքան են նրանք առաջ գնացել այդ հարցում: Մերոնք պարզապես չեն ուզում դրանով զբաղվել: Ես չգիտեմ, թե որքան մարդու պետք է կծեն շները և քանի կենդանի պետք է սպանվի, որպեսզի պետությունն ի վերջո զբաղվի այդ հարցով»:

«Ես նույնպես սիրում եմ կենդանիներին և չեմ ընդունում նրանց հանդեպ բռնությունը: Տանել չեմ կարողանում կենդանաբանական այգիներն ու ակվարիումները: Սակայն դա չի նշանակում, որ քաղաքը պետք է վերածվի վայրի անտառի: Թափառական շների հանդեպ խիստ վերահսկողություն է պետք սահմանել, նրանք պետք է հեռացվեն այն տարածքներից, որտեղ մարդիկ են ապրում: Պարզվում է՝ պետությունը միջոցներ է դուրս գրել թափառական շների դեմ պայքարի համար: Իմ գործընկեր Իլկին Մուրադովը գրում է, որ Բաքվի գործադիր իշխանությունը յուրաքանչյուր սպանված թափառական շան համար 28 մանաթ (մոտ 15 եվրո) է վճարում»:

Բաքվի գործադիր իշխանության թափառական կենդանիների դեմ պայքարի վարչության բաժնի ղեկավար Արաստուն Ամիրասլանովը պնդում է. «Մինչև տարվա վերջ Բաքվում կլուծվի անտուն շների խնդիրը: Ներկա պահին այդ ուղղությամբ աշխատանք է տարվում: Մարդիկ հանդիպելու են անտուն շների փողոցներում, սակայն դրանք համարակալված են լինելու, ստերիլացված, պատվաստված և անվտանգ են լինելու մարդու կյանքի համար»:

«Շներին բռնում են հատուկ միջոցներով: Առանց ուժ կիրառելու, նրանց բերում են անտուն կենդանիների դեմ պայքարի հատուկ տարածք: Անասնաբույժները զննում են շներին: Եթե շների մոտ մարդկանց համար վտանգավոր հիվանդություն, կատաղություն է հայտնաբերվում, ապա նրանք այրվում են սպանվելուց հետո: Իսկ առողջ շներին մենք կերակրում ենք, մաքրում և պահում: Բացի այդ, շներին բռնում և ստերիլացնում են, որպեսզի նրանք չկարողանան բազմանալ: Դրանից հետո նրանց համարակալում են և փողոց բաց թողնում», — Ամիրասլանովի խոսքերն է մեջբերում ԱՊԱ գործակալությունը: