Ցույցերը համակել են Բեյրութը պայթյունից հետո

Աղբյուրը՝ BBC, Aljazeera

Ոստիկանությունն արցունքաբեր գազ և ռետինե փամփուշտներ է կիրառել Բեյրութում բողոքի զանգվածային ցույցերի մասնակիցների դեմ, որոնք կառավարական շենքեր են գրավում։ Նրանք պատասխանել են քարերով և «Մոլոտովի կոկտեյլներով»։

Բախումների հետևանքով, ըստ Aljazeera հեռուստաալիքի տեղեկությունների, զոհվել է մեկ ոստիկան, վիրավորվել 700 մարդ։ 20 մարդ է ձերբակալվել։

Ի՞նչն է առիթ դարձել

Անկարգությունների առիթ է դարձել 3 հազար տոննա ամոնիումի նիտրատի պայթյունը, որի հետևանքով ամբողջությամբ ոչնչացվել է Բեյրութի նավահանգիստը, փլուզվել է քաղաքի շենքերի մեկ երրորդն, ավելի քան 130 մարդ է զոհվել, հարյուրավոր մարդիկ վիրավոր են կամ անհետ կորել են, տասնյակ հազարավորները զրկվել են իրենց տներից։

• Բեյրութը կիսավեր է նավահանգստում որոտացած պայթյունից հետո։ Լուսանկարներ, տեսանյութ, ի՞նչ համատեքստում և ինչ է տեղի ունեցել

• Թբիլիսիում բողոքի ակցիան դաժանաբար ցրելու օրվանից մեկ տարի է անցել. ինչպե՞ս և ինչո՞ւ հունիսի 20-ը մտավ պատմության մեջ

Պայթյունավտանգ սելիտրան Բեյրութի նավահանգստում է հայտնվել յոթ տարի առաջ, երբ առգրավվել է Բաթումից դեպի Մոզամբիկ ուղևորվող նավից։ Առգրավման պատճառը նավի տիրոջ պարտքերն են եղել։

Լիբանանի և Բեյրութի իշխանությունները բազմիցս զգուշացվել են սելիտրան նավահանգստում պահելու վտանգների մասին, սակայն բոլոր նախազգուշացումներն անտեսվել են։

Պայթյունի քաղաքական հետևանքները

Կատարվածից հետո մոտ 7 հազար մարդ Բեյրութում փողոց է դուրս եկել։

Ցուցարարները կատարված ողբերգության համար մեղադրում են պաշտոնյաներին, որոնց անպատասխանատվությունը, ոչ կոմպետենտությունն ու կոռուպցիան պայթյունի պատճառ են դարձել։

Այսօրվա դրությամբ ձերբակալվել է կառավարության 16 աշխատակից, որոնք կասկածվում են կատարվածին մասնակցություն ունենալու համար։

Ցուցարարները գրավել են արտգործնախարարության և տնտեսական զարգացման նախարարությունները։

Ավելի ուշ Լիբանանի բանակը մաքրել է ԱԳՆ շենքը գրաված մի խումբ ցուցարարներից։

Ոստիկանությունն ու բանակն արցունքաբեր գազ և ռետինե փամփուշտներ են կիրառում։

Մարտական փամփուշտների օգտագործման մասին չհաստատված հաղորդագրություններ են ստացվում։

Ցույցը վաղուց էր հասունացել

Լիբանանը վաղուց է քաղաքական և տնտեսական ճգնաժամ ապրում։

Դա մի երկիր է, որում քվոտավորման քաղաքական համակարգ է գործում հիմնական էթնիկ խմբերի՝ քրիստոնյաների, սունի մուսուլմանների, շիա մուսուլմանների և դրուզների համար։ Այդ խմբերի ներայացուցիչները հերթով ղեկավարում են երկիրը։ Իշխանության գալով՝ նրանք ստիպված են արդարացնել այն անձանց սպասելիքներն, ովքեր իրենց թեկնածությունն են առաջադրել՝ ի վնաս համընդհանուր շահերի։

Արդյունքը կառավարման պետական համակարգի փլուզումն ու խորը տնտեսական ճգնաժամն է։

Լրացուցիչ հանգամանքներ

Լրացուցիչ գործոն է դարձել Ֆրանսիայի՝ Լիբանանում պատմականորեն առանձնահատուկ դեր խաղացող երկրի, որը Ֆրանսիան ղեկավարել է որպես գաղութ, նախագահ Էմանուել Մակրոնի այցը Բեյրութ։

Մակրոնը հայտարարել է երկրի ղեկավարման հարցում փոփոխությունների անհրաժեշտության մասին, խոստացել միջազգային օգնության հատուկ ծրագիր և միջազգային հետաքննության անցկացում պահանջել։

Բեյրութի ցուցարարների կարգախոսներից մեկը «Կեցցե՜ Ֆրանսիան» է։

Լիբանանում իրավիճակը կարող է շուտով էլ ավելի սրվել։ Երկիրը սպասում է միջազգային տրիբունալի վճռին Լիբանանի վարչապետ Ռաֆիկ Հարիրիի սպանության գործով։ Այդ հանցագործության համար մեղադրվում է իրանամետ ռազմականացված «Հեզբոլլահ» խմբավորման 4 ակտիվիստ։

Լիբանանի համար, որտեղ բնակվում են քրիստոնյաներ և մուսուլմաններ, դա կարող է անկայունության լրացուցիչ գործոն դառնալ։