5 լավ ու վատ նորություն Բաքվի տրանսպորտային համակարգի բարեփոխման մասին
Սկսենք լավ նորություններից:
Պետք չէ վճարել «իսկական» փողով
Բաքվեցիներն ավտոբուսում վճարում են միասնական վճարային քարտերով: Դա կարևոր է առաջին հերթին այն պատճառով, որ մանր գումարը, որը ստանում էր վարորդը, բյուջեից դուրս չի մնա: Այն, որ հնարավոր չէ վերահսկել իրական եկամուտը (հետևաբար հարկային հաշիվների դուրսգրման ճշգրտությունը), մնաց անցյալում: Այժմ ամեն ինչ այլ է:
Մրցարշավներ էլ չեն լինի
Բոլորովին վերջերս Բաքվում քաղաքային տրանսպորտով երթևեկելը բնավ անվտանգ նախաձեռնություն չէր: Վարորդները միմյանց հետ մրցակցության մեջ մտնելու սովորություն ունեին՝ ամեն մեկը ձգտում էր մրցակցից առաջ անցնել, որպեսզի պլանը կատարի և ավելի շատ գումար վաստակի: Երբեմն այդ ամենն ավարտվում էր մարդկանց մահով: Բաքվի Ոստիկանության գլխավոր վարչության Ճանապարհային ոստիկանության վարչության տվյալներով՝ 2015թ. առաջին կիսամյակում մայրաքաղաքում ավտոբուսների մասնակցությամբ 33 ՃՏՊ է գրանցվել, որոնց հետևանքով մահացել են 9, տուժել՝ 35 մարդ: Այժմ պլան չկա: Հետևաբար՝ մրցավազքեր անցկացնելու անհրաժեշտություն էլ չկա:Ավտոբուսով երթևեկելն այժմ անվտանգ է:
Այժմ պետք է ժամանակին կանգ առնել
Քաղաքացիները կարող էին կանգնեցնել ավտոբուսը, որտեղ իրենց հարմար էր՝ արագընթաց մայրուղու վրա, կամրջին, սեփական մուտքի մոտ: Հիմա վարորդին արգելվում է կանգառներից դուրս կանգնել, իսկ շարժումը կարգավորվում է անվտանգության տեսասարքերով:
Ճշտապահ ավտոբուսներ
Բաքվեցիները հաճելիորեն զարմացած են. պարզվում է՝ ավտոբուսին պետք չէ 15-20 րոպե սպասել, իսկ ուշ ժամի մտածել՝ կգա՞ մեկը, թե՞ արդեն վերջ: Քաղաքային ավտոբուսների ժամանակացույցը խստորեն վերահսկվում է, ինչի շնորհիվ էլ դրանք աշխատում են բացառապես ժամանակացույցին համապատասխան:
Հարմարավետ ավտոբուսներ
Վարորդներն այժմ ավտոբուսների սրահներում չեն ծխում: Միայն դա արդեն կարելի է հաջողություն համարել, բայց դա դեռ ամենը չէ. ավտոբուսներում օդորակիչներ ու ջեռուցման համակարգեր կան: Նախորդ բարեփոխումների փորձը ցույց է տալիս, որ ցանկացած գեղեցկություն ու հարմարավետություն կարելի է փչացնել, բայց բաքվեցիները հույս ունեն, որ այս անգամ այդպես չի լինի:
Բայց մի՛ շտապեք շատ ուրախանալ, վատ նորություններ էլ կան:
Երթուղիների պակաս կա
Նոր ավտոբուսների ամենամեծ բացասական կողմն այն է, որ դրանք ընդամենը 3 երթուղի ունեն, որոնցից մեկը կենտրոնից գնում է դեպի օդանավակայան: Ինչպես հայտնի է, Եվրոպական խաղերի նախօրեին շատ երթուղիներ հանվել են, և այդ գործընթացը շարունակվելու է: Դրանց տեղը պետք է զբաղեցնեին BakuBus-ի ավտոբուսները: Բայց այնքան էլ պարզ չէ, թե ինչու էր պետք սկզբից հանել երթուղիները, հետո մտածել նորերի շուրջ, եթե նույնիսկ խոսքը գնում է հարմարավետ ավտոբուսների մասին:
Երթուղիները կրճատվել են, բայց երթևեկել ողջ քաղաքով պետք է: Շատ նորարարություններ են արվել, ու հաճախ իսկական խառնաշփոթ է առաջանում: Ավտոբուսների սովորական համարներն այլևս արդիական չեն, նորերն այնպիսի երթուղով են շարժվում, որ կեսից ստիպված ես փոխել ավտոբուսը: Ուղևորները ժամանակ, գումար և նյարդեր են վատնում:
Քարտեզները չարիք են
Կարծես թե բոլորն այդպես են մտածում, թե չէ ուևորները մեծ հաճույքով կօգտվեին դրանցից, չէ՞ որ հարմար է: Բայց մեծամասնությունը ոչ միայն չի կարողանում այդ պարզ գործողությունները կատարել, այլ նաև չի ուզում սովորել: Ուղևորները դժգոհում են նաև, որ քարտերը 2 մանաթ (2$) արժեն: Այդ պատճառով էլ շատերը նախընտրում են առաջվա պես վճարել, քարտ ունեցող ուղևորին 20 գյափիկ (մոտ 20 ցենտ) են առաջարկում, որ վճարի իրենց տեղը:
Դռների խառնաշփոթ
Օրենքով՝ ավտոբուս պետք է նստել դիմացի դռնից, միանգամից վճարել, իսկ դուրս գալ՝ ետևի դռնից: Ցերեկային ժամերին այդ սխեման գուցե և աշխատում է: Բայց ամենակուլմինացիոն ժամերին առանց կանոնների մարտ է սկսվում. կանգառում ավտոբուսին սպասելուց հոգնած ուղևորները, փորձում են խցկվել ցանկացած դռնով: Վարորդի զգուշացումներն արհամարհվում են, վարորդը սրտնեղում է, նրա և ուղևորների միջև վեճ է սկսում, հրմշտոց, խառնաշփոթ է առաջանում: Եվ ոչ ոք չգիտի, թե ուղևորների ինչ քանակ է առանց տոմսի երթևեկում: Մի այլ բարդություն էլ սարքն է առաջացնում, որը ողջ ավտոբուսի համար մի հատ է նախատեսված, և լարված ժամերին դրան մոտենալն այդքան էլ հեշտ գործ չէ:
Վերապատրաստված վարորդների պակաս կա
Նրանց պակասն արդեն զգացվում է, իսկ հիմա երթուղիներն այդան էլ շատ չեն: Ֆեյսբուքի ադրբեջանական սեգմենտում արդեն գրառումներ են հայտնվում այն մասին, որ վարորդները ոչ մի կերպ չեն կարողանում հիշել, թե որ կանգառներում է պետք կանգնեցնել ավտոբուսը, նրանցից ոմանք ծխում են աշխատանքային ժամերին, ոմանք էլ՝ ճանապարհային երթևեկության կանոններն են խախտում:
