Լեռնային Ղարաբաղում նախագահական ընտրությունների երկրորդ փուլ կանցկացվի

Լեռնային Ղարաբաղում մարտի 31-ին միաժամանակ նախագահական և խորհրդարանական ընտրություններ են անցկացվել։

Ընտրություններին մասնակցությունը կազմել է 73,5%, ընդհանուրառմամբ, քվեարկել է 76 728  մարդ։

Նախագահական ընտրությունների մասին

Ղարաբաղի Կենտրոնական ընտրական հանձնաժողովի տվյալներով՝ նախագահի 14 թեկնածուներից ոչ ոք չի հավաքել ձայների 50 և ավելի տոկոսը, որն անհրաժեշտ է ընտրություններում վերջնական հաղթանակ տանելու համար։ Դա նշանակում է, որ 14 օրից՝ ապրիլի 14-ին, նախագահական ընտրությունների երկրորդ փուլ կկայանա։

Ըստ ԿԸՀ նախնական տվյալների՝ առաջատարների առաջին եռյակն այսպիսի տեսք ունի.

• նախկին վարչապետ Արայիկ Հարությունյան՝ ընտրողների ձայների 49,26%-ը,
• ԱԳՆ ղեկավար Մասիս Մայիլյան՝  26,4%,
• Անվտանգության խորհրդի նախկին քարտուղար Վիտալի Բալասանյան՝  14,7%։

Ըստ ԿԸՀ ղեկավար Սրբուհի Արզումանյանի՝ թեև այս տվյալները վերջնական չեն՝ ընտրությունների արդյունքի վրա  հնարավոր փոփոխություններն արդեն ոչ մի կերպ չեն ազդի։

Ղարաբաղում նոր սահմանադրության վերաբերյալ հանրաքվե է։ Ի՞նչ է փոխվելու և ինչո՞ւ 

Կորոնավիրուսը Կովկասում․ Չորրորդ մահը Հայաստանում։ Թարմացվում է

Խորհրդարանական ընտրությունների մասին

Ընտրություններին մասնակցած 12 քաղաքական ուժերից խորհրդարան է անցել մեկ դաշինք և չորս կուսակցություն։

Ձայների մեծ մասն ընտրողները տվել են կրկին նախկին վարչապետ Արայիկ Հարությունանի գլխավորած ուժին «Ազատ հայրենիք»/ «Քաղաքացիական միացիալ դաշինք»  — 40,4%։

Խորհրդարանում ներկայացված կլինեն նաև Դեմոկրատական կուսակցությունը, «Միասնական հայրենիք», «Արդարություն», ՀՅ «Դաշնակցություն» կուսակցությունները։

Խախտումների մասին

Ընտրություններին հնարավոր չի եղել խուսափել խախտումներից և բողոքներից։

ԿՀԸ-ն ստացել է 9 գրավոր բողոք, թեժ գծով 6 բանավոր բողոք, խախտումների մասին 44 հաղորդում է ներկայացվել Լեռնային Ղարաբաղի դատախազություն, 12 դիմում է ստացել օմբուդսմեն Արտակ Բեգլարյանը։

«Ականատես» նախաձեռնությունը, որը գործում է Transparency International հասարակական կազմակերպության շրջանակում, ֆեյսբուքյան իր էջում հաղորդում է այն մասին, որ «Արցախի Հանրապետությունում կայացած նախագահական և խորհրդարանական ընտրությունների քվեարկությունն ընթացել է մասամբ լարված մթնոլորտում».

 «Բազմաթիվ տարերային խախտումների հետ միաժամանակ, տեղ են գտել մի շարք կրկնվող երևույթներ, որոնք հիմք են տալիս ենթադրել, որ դրանք եղել են միտումնավոր և կազմակերպված։ Ակնհայտորեն որոշ ընտրողների կամարտահայտումը չի եղել ազատ, վերահսկվել է, ինչը կարող էր ազդեցություն ունենալ քվեարկության արդյունքների վրա»։

Միջազգային արձագանքը

Կայացած ընտրությունների մասին արդեն արտահայտվել է Եվրամիությունը։

ԵՄ պաշտոնական կայքում տեղադրված հայտարարությունում ասվում է, որ «Եվրամիությունը չի ճանաչում սահմանադրական և իրավական շրջանակները, որոնցում անցկացվում են այսպես կոչված նախագահական և խորհրդարանական ընտրությունները»։

 «Այդ իրադարձությունը չի կարող վնաս հասցնել Լեռնային Ղարաբաղի ապագա կարգավիճակի որոշմանը կամ շարունակվող բանակցային գործընթացի ելքին… ԵՄ-ն պատրաստ է այսուհետ նույնպես աջակցել ջանքերին, որոնք ուղղված են ղարաբաղյան հակամարտության արագ և խաղաղ կարգավորմանը», — ասված է հայտարարությունում։

Վրաստանի արտգործնախարարությունը նույնպես հանդես է եկել հայտարարությամբ։

«Վրաստանի ԱԳՆ-ն հաստատում է իր աջակցությունն Ադրբեջանի ինքնիշխանությանն ու տարածքային ամբողջականությանը և չի ճանաչում այսպես կոչված խորհրդարանական և նախագահական ընտրությունները, որոնք անցկացվել են Լեռնային Ղարաբաղում մարտի 31-ին։

Վրաստանը սատարում է բացառապես խաղաղ ճանապարհով ղարաբաղյան հակամարտության կարգավորմանը՝ հաշվի առնելով միջազգային իրավունքի նորմերն ու սկզբունքները», — ասված է ապրիլի 1-ին տարածված հայտարարությունում։