Վրաստանի ընդդիմադիր 9 կուսակցություններ դաշինք են ստեղծել
Վրաստանում ընդդիմադիր դաշինքի ստեղծում
Ամիսներ տևած բանակցություններից հետո Վրաստանի արևմտամետ ընդդիմադիր 9 կուսակցություններ համաձայնել են միավորվել և ստեղծել «Միասնություն հանուն հաղթանակի» անունով ընդդիմադիր դաշինք։
Դաշինքի առաջին հայտարարության համաձայն՝ ընդդիմադիր դաշտի միավորման նպատակն է «տապալել Բիձինա Իվանիշվիլիի ավտորիտար ռեժիմը, վերականգնել Վրաստանի եվրատլանտյան կուրսն ու ապահովել երկրի ժողովրդավարական կառավարումը, անվտանգությունն ու քաղաքացիների բարեկեցությունը»։
- Վրաստանում ԱՄՆ նախկին դեսպան. «Թբիլիսին այլևս հուսալի գործընկեր չէ Վաշինգտոնի համար»
- Ուկրաինայից հետո ՌԴ թիրախում կհայտնվեն Կենտրոնական Ասիան և Հարավային Կովկասը
Դաշինքի մաս հանդիսացող կուսակցությունները պնդում են, որ համաձայնության են եկել ընդհանուր ռազմավարության և գործողությունների համատեղ կանոնների շուրջ։
Դաշինքի մաս են կազմում հետևյալ կուսակցությունները՝
- «Ախալի»,
- «Գիրչի»,
- «Դրոա»,
- «Միացյալ ազգային շարժում»,
- «Եվրոպական Վրաստան»,
- «Աղմաշենեբելի ռազմավարություն»,
- «Ֆեդերալիստներ»,
- «Ազատության հրապարակ»,
- «Ազգային ժողովրդավարական կուսակցություն»։
Ինչի՞ շուրջ են համաձայնության եկել կուսակցությունները
Ընդդիմադիր կուսակցությունները համաձայնության են եկել 3 սկզբունքների շուրջ՝
Միասնություն՝ առանց միատարրության. այս սկզբունքը ենթադրում է, որ դաշինքի հիմնադիր կուսակցությունները պահպանում են իրենց գաղափարախոսական ինքնությունը, բայց համաձայնում են բողոքի գործողությունների և հաղորդակցության միասնական ռազմավարության շուրջ.
«Մեր խնդիրն է ցույց տալ ինչպես վրաց ժողովրդին, այնպես էլ Վրաստանի արտասահմանյան դաշնակիցներին, որ մենք ներկայացնում ենք ժողովրդավարական այլընտրանք Իվանիշվիլիի օլիգարխիկ և ավտոկրատական ռեժիմի»,- ասված է նրանց տարածած հայտարարության մեջ։
Ժողովրդավարական այլընտրանք. այս սկզբունքի համաձայն՝ դաշինքի ներսում որոշումների կայացումը կհիմնվի հավասարության և ազատ կամարտահայտության սկզբունքների վրա, չեն լինի արտաքին ազդեցություններ։
Քաղաքական և սոցիալական կոնսենսուս. այս սկզբունքի ամրագրումը նշանակում է, որ դաշինքը ձգտում է հասարակության ընդգրկուն մասնակցության միջոցով հասնել քաղաքական և սոցիալական համաձայնության։ Վերջնանպատակը ազատ և արդար ընտրությունների միջոցով «Վրացական երազանքին» հաղթելն է և ժողովրդավարական կոալիցիոն կառավարություն ձևավորելը։ Այդ կառավարությունը պետք է իրականացնի անհրաժեշտ բարեփոխումները։
Մասնակից կուսակցությունները նաև համաձայնության են եկել վարքագծի կանոնների շուրջ, որոնք սահմանում են դաշինքի կուսակցությունների միջև փոխգործակցության կանոնները, ինչպես նաև դրանց խախտման համար պատասխանատվությունը։
«Ընդդիմադիր դաշինքը կպայքարի մինչև վերջ՝ մինչև քաղբանտարկյալների ազատ արձակումը և ազատ ու արդար ընտրություններում հաղթանակ տանելը»,- նշվում է հայտարարության մեջ։
Ո՞ր ուժերը դաշինքի մաս չեն կազմում
Իրենց որպես արևմտամետ դիրքավորող երկու ընդդիմադիր ուժեր՝ «Լելո՝ Ուժեղ Վրաստան» և նախկին վարչապետի «Գախարիան հանուն Վրաստանի» կուսակցությունները, չեն միանա դաշինքին։
«Գիրչի» կուսակցությունը նույնպես այս դաշինքի կազմում չէ, բայց այն չի համարվել միասնական ընդդիմության մաս և երբեք չի մասնակցել նման բանակցությունների։
Սրանք այն կուսակցություններն են, որոնք, ի տարբերություն ընդդիմության մնացած մասի, անցյալ տարի մասնակցել են տեղական ինքնակառավարման մարմինների ընտրություններին։
«Լելո՝ Ուժեղ Վրաստան» կուսակցությունը փետրվարի 19-ին հայտարարել է, որ կշարունակի աշխատել ինքնուրույն։
«Միասնությունը չպետք է լինի ինքնանպատակ», — հայտարարել է կուսակցությունը,- եթե նպատակը իշխող համակարգը պարտության մատնելն է, ապա անհրաժեշտ է ունենալ ուժեղ, բազմազան, պատասխանատու և անկախ ընդդիմադիր սպեկտր։ Բոլորին մեկ արկղում տեղավորելու փորձը պարզեցնում է հակառակորդի նարատիվը և իջեցնում այլընտրանքի որակը։ Ուժեղ ընդդիմությունը ձևավորվում է մրցակցային բազմազանության, այլ ոչ թե պարտադրված միատարրության միջոցով»։
«Գախարիան հանուն Վրաստանի» կուսակցության պատգամավոր Գիգա Պարուլավան հայտարարել է.
«Մենք չենք քննարկել և ապագայում չենք քննարկելու «Միացյալ ազգային շարժման» որևէ ստորաբաժանման հետ միավորման հարցը»։
Նա նաև ասել է, որ կուսակցությունները, միավորվելով և ապա անջատվելով, «նվեր են մատուցում «Վրացական երազանքի» կառավարությանն ու նրա քարոզչությանը»։
Դաշինքի առաջին հայտարարությունները
«Ֆեդերալիստներ» կուսակցության առաջնորդ Թամար Չերգոլեիշվիլին հայտարարել է, որ միավորմանը մինչ օրս խոչընդոտել է էական հարցերի շուրջ համաձայնության բացակայությունը։ Նա կարծում է, որ այս դաշինքը կթուլացնի «Վրացական երազանքը». «Այս ճանապարհն այլընտրանք չունի. մեզ կմիանան բոլորը, ովքեր ցանկանում են փրկություն»։
«Խորհրդակցությունները երկար ժամանակ են ընթանում։ Այս ընթացքում մեզանից շատերը հայտնվել են բանտում։ Ոմանք ազատ են արձակվել, ոմանք դեռ բանտում են, իսկ ոմանք՝ ոչ. վրացական հասարակության շատ կարևոր մարդիկ՝ թե՛ քաղաքական գործիչներ, թե՛ լրագրողներ», — դաշինքի ձևավորման ուշացումն այսպես է բացատրել «Ախալի» կուսակցության նախագահ Նիկա Գվարամիան, ով վերջերս է ազատ արձակվել բանտից։ Նա պատիժ էր կրում նախորդ կառավարության գործողությունները հետաքննող խորհրդարանական քննիչ հանձնաժողով չներկայանալու համար։
«Աղմաշենեբելի ռազմավարություն» կուսակցության առաջնորդ Գիորգի Վաշաձեն, որը նույնպես պատիժ է կրել հանձնաժողովի նիստին չներկայանալու համար, դաշինքի ստեղծումը համարում է առաջին ռազմավարական քայլ. «Ամեն ինչ լավ է։ Մենք վստահ ենք, որ ի վերջո միասին կհասնենք հաղթանակի»։
«Արևմտամետ կուսակցությունների համատեղ աշխատանքը շատ լուրջ նախապայման է նախաձեռնողականություն ցուցաբերելու և պատասխանատվություն ստանձնելու համար։ Ավտորիտար երկրներում շատ այլ ընդդիմություններ չեն կարողացել դա անել։ Այս համաձայնությամբ մենք մեծ քայլ առաջ ենք արել։ Սակայն դեռ վաղ է ուրախանալու համար. արդյունքները պետք է ցույց տրվեն աշխատանքով», — դաշինքի ստեղծումը բանտից մեկնաբանել է «Դրոա» կուսակցության առաջնորդներից մեկը՝ Էլենե Խոշտարիան։
Համաձայնագրի ստորագրումից հետո բոլոր 9 կուսակցությունների առաջնորդները հավաքվել են Թբիլիսիի կենտրոնական Ռուսթավելի պողոտայում՝ բողոքի ակցիա անցկացնելու։
Ի՞նչ է ասում «Վրացական երազանքը»
Իշխող կուսակցությունը ընդդիմադիր դաշինքը անվանել է «ծաղրածուների շոու»։
«Ըստ էության, նրանք երբեք անջատ չեն եղել, միշտ միասնական են եղել Վրաստանի դեմ իրենց գործողություններում: Վրաց ժողովուրդը դեռ 2012 թվականին է որոշել այս գործակալների գտնվելու վայրը, և այդ վայրը քաղաքական աղբանոցն է»,- ասել է «Վրացական երազանքի» առաջնորդ Իրակլի Կիրցխալիան:
Համատեքստ
Վրաստանում արևմտամետ ընդդիմության միավորման վերաբերյալ ակտիվ քննարկումները սկսվել են դեռևս 2020 թվականին: Այդ ժամանակվանից ի վեր այս հարցը պարբերաբար հայտնվել է օրակարգում, հատկապես ընտրություններից առաջ: Այս միավորումը առաջարկվել է երբեմն կոնկրետ ընտրությունների համար միասնական ցուցակ ձևավորելու, երբեմն էլ որպես ընդդիմադիր համայնք միասնական ռազմավարությամբ հանդես գալու համար։
2020 թ․-ի խորհրդարանական ընտրություններից հետո, երբ «Վրացական երազանքը» մեծամասնություն ստացավ, ընդդիմադիր կուսակցությունները համաձայն չէին արդյունքների հետ և հայտարարեցին բոյկոտի մասին: 2021 թվականի տեղական ինքնակառավարման մարմինների ընտրություններից առաջ և հետո ընդդիմության մի մասի միավորումը համարվում էր անհրաժեշտ ռազմավարություն՝ իշխող կուսակցության հետ մրցակցելու համար: 2023-2024 թվականներին, հատկապես խորհրդարանական ընտրությունների մոտենալուն զուգընթաց, կրկին ակտիվորեն քննարկվում էր «միասնական ցուցակը» կամ առնվազն համակարգված գործողությունները:
Հասարակությունը նույնպես պահանջում էր նման միավորում: Սակայն ներքին անհամաձայնությունների, առաջնորդների միջև մրցակցության և ռազմավարական տարաձայնությունների պատճառով չէր հաջողվում հասնել միասնության:
Այժմ այդ միասնությունը ստեղծվել է Վրաստանում առկա ճգնաժամի ֆոնին. «Վրացական երազանքը» լեգիտիմ չի ճանաչվում ո՛չ երկրի ներսում, ո՛չ էլ արտերկրում. երկրում կա ավելի քան 150 քաղբանտարկյալ, այդ թվում՝ լրագրողներ, գրողներ, դերասաններ, երաժիշտներ և բժիշկներ։
Ընդդիմության առաջնորդների մեծ մասն արդեն կրել է իր պատիժը, սակայն նրանց դեմ հարուցվում են նոր քրեական գործեր՝ երկարատև ազատազրկմամբ։ Երկրում բողոքի ցույցերը շարունակվում են ավելի քան 400 օր։
Միևնույն ժամանակ «Վրացական երազանքն» ավելի ու ավելի է ուժեղացնում անկախ քաղհասարակության, լրատվամիջոցների և ընդդիմության նկատմամբ բռնաճնշումները։
Ընդունվել են օրենքներ, որոնք քաղաքացիական հասարակությանն արգելում են ստանալ արտաքին ֆինանսավորում։ Շատ կազմակերպություններ փակվել են, իսկ մի քանի ազդեցիկ պարբերականներ, որոնք դեռևս չեն փակվել, գտնվում են ծանր ֆինանսական ճգնաժամի մեջ։
Նոր օրենքները սահմանափակում են նաև ընդդիմությանը։ Ավելին, «Վրացական երազանքը» նախատեսում է պաշտոնապես արգելել մի քանի ընդդիմադիր կուսակցությունների գործունեությունը։
Հետևեք մեզ — Facebook | Youtube
Վրաստանում ընդդիմադիր դաշինքի ստեղծում
