Վրաստանի ընդդիմության 8 առաջնորդների նկատմամբ քրեական հետապնդում է հարուցվել
Վրաստանի 8 ընդդիմադիրների քրեական հետապնդում
Վրաստանում քրեական հետապնդում է հարուցվել ընդդիմության 8 առաջնորդների՝ Միխեիլ Սաակաշվիլիի, Գիորգի Վաշաձեի, Նիկա Գվարամիայի, Նիկա Մելիայի, Զուրաբ Գիրչի Ջափարիձեի, Էլենե Խոշտարիայի, Մամուկա Խազարաձեի և Բադրի Ջափարիձեի դեմ։
Գործը համատեղ հարուցել են Գլխավոր դատախազությունը, Պետական անվտանգության ծառայությունն ու Ներքին գործերի նախարարությունը՝ «պետության դեմ հանցագործությունների՝ սաբոտաժի, օտարերկրյա պետության թշնամական գործունեությանը օժանդակելու, սահմանադրական կարգի և ազգային անվտանգության դեմ ուղղված գործողությունների ֆինանսավորման, ինչպես նաև սահմանադրական կարգի բռնի փոփոխության և իշխանության տապալման կոչերի» մեղադրանքներով։
Դատախազությունը միջնորդում է գրավի դիմաց ազատ արձակել Մամուկա Խազարաձեին և Բադրի Ջափարիձեին, ինչպես նաև նախնական լսումներ անցկացնել մնացած մեղադրյալների մասով, որոնք արդեն իսկ կալանքի տակ են։
Դատախազության հայտարարությունը
Ըստ Վրաստանի գլխավոր դատախազ Գիորգի Գվարակիձեի՝ «մինչ Վրաստանի կառավարությունը ընտրել էր խաղաղության պահպանման ուղին և հրաժարվել էր Ռուսաստանի դեմ տնտեսական պատժամիջոցներ կիրառել», ընդդիմադիր կուսակցությունների որոշ առաջնորդներ (Էլենե Խոշտարիա, Զուրաբ Ջափարիձե և Գիորգի Վաշաձե), իբր, արտասահմանյան երկրների ներկայացուցիչներին տեղեկություններ են փոխանցել նավթամթերքի ներմուծման և երկրի ռազմական ոլորտում տիրող իրավիճակի մասին: Հետաքննությունը պնդում է, որ նրանք տարածել են «կեղծ տեղեկություններ այն մասին, որ Վրաստանի օդային տարածքն օգտագործվում է Ռուսաստան իրանական անօդաչու թռչող սարքեր մատակարարելու համար»:
Ավելին, ըստ գլխավոր դատախազի՝ Խոշտարիան, Ջափարիձեն և Վաշաձեն արտասահմանյան գործընկերներին են փոխանցել պետական ծառայողների ցուցակներ և այլ փաստաթղթեր՝ պատժամիջոցներ կիրառելու համար: Դատախազի կարծիքով՝ դրա արդյունքում Արևմուտքի կողմից պատժամիջոցներ են սահմանվել մոտ 300 պաշտոնյաների և գործարարների նկատմամբ:
Դատախազը նաև հայտարարել է, որ 2024 թվականի հոկտեմբերի խորհրդարանական ընտրություններից հետո մեղադրյալները սկսել են «ակտիվ փողոցային գործունեություն, որն ուղղված է եղել գործընթացի արմատականացմանը։ Մասնավորապես՝ հրապարակայնորեն կոչ են արել հեղափոխություն անել, տապալել իշխանությունը, ակցիաներ անել կառավարական շենքերի մոտ և ֆիզիկական դիմադրություն ցույց տալ իրավապահ մարմինների աշխատակիցներին»:
«Բացի վերոնշյալից, օրինական կառավարությունը տապալելու նպատակով Վրաստանի նախկին նախագահ Միխեիլ Սաակաշվիլին օգտագործել է իր սոցիալական ցանցի էջը, կողմնակիցներին հրապարակավ կոչ արել ձեռնարկել անօրինական և բռնի գործողություններ՝ հայտարարելով պայքարի և ագրեսիվ դիմադրության անհրաժեշտության մասին: Իր հայտարարություններում նա նաև համակիրներին հորդորել է գրավել կառավարական շենքերն ու «տապալել ռեժիմը»»,- հավելել է դատախազը։
Խտացված գույներով ներկայացնելով Վրաստանում գրեթե մեկ տարի շարունակվող բողոքի ցույցերը՝ դատախազությունը պնդել է, որ ցուցարարները ֆինանսավորվել և նյութական աջակցություն են ստացել մի շարք ոչ կառավարական կազմակերպությունների և հատուկ ստեղծված հիմնադրամների միջոցով, որոնք միջոցներ են ստացել միջազգային դոնորներից։
Հետևեք մեզ — Facebook | Youtube
Վրաստանի 8 ընդդիմադիրների քրեական հետապնդում
