120 մլն եվրո՝ զբոսաշրջության զարգացմանը. ՀՀ-ն ու ՎԶԵԲ-ը համատեղ ծրագիր կիրականացնեն
ՀՀ-ում զբոսաշրջային կլաստերներ կստեղծվեն
Հայաստանում կիրականացվի զբոսաշրջության և մարզային ենթակառուցվածքների ծրագիր։ Ծրագրի շրջանակում զբոսաշրջության զարգացման նպատակով մինչև 2030 թ․-ի ավարտը կլաստերներ կստեղծվեն մարզային 7 բնակավայրերում՝ Արենիում, Դիլիջանում, Դվինում, Գյումրիում, Ջերմուկում, Գորիսում և Եղեգիսում։
Ծրագրի ֆինանսավորման համար ՀՀ-ի և Վերակառուցման և զարգացման միջազգային բանկի միջև վարկային համաձայնագիր կստորագրվի։ Կառավարությունը նախօրեին հաստատել է նախագիծը։
«Նպատակն է օժանդակել զբոսաշրջության առանձնացված կլաստերներից յոթին՝ Արենի, Դիլիջան, Դվին, Գյումրի, Ջերմուկ, Գորիս և Եղեգիս՝ խթանելով գինու, առողջարանային, արկածային, մշակութային, կրթական և էկոզբոսաշրջությունը Հայաստանի տարբեր մարզերում»,- նկատել է Էկոնոմիկայի նախարարի տեղակալ Արման Խոջոյանը։
Իրականացվելիք ծրագրի ընդհանուր արժեքը կազմում է 120 մլն 500 հազար եվրո, որից 24 մլն 100 հազար եվրոն ՀՀ կառավարության համաֆինանսավորումն է։
Զբոսաշրջության և մարզային ենթակառուցվածքների ծրագիրն իրականացնելու է Հայաստանի տարածքային զարգացման հիմնադրամը։ Աշխատանքները համակարգելու է Էկոնոմիկայի նախարարությունը։
- Օրենսդրական փոփոխություններ ՀՀ զբոսաշրջության ոլորտում. ռիսկերն ու հնարավոր հետևանքները
- Հայաստանի հյուրատների ֆենոմենը․ ջերմ միջավայրը հաղթում է բարձրակարգ հյուրանոցներին
- Ավելի քիչ զբոսաշրջիկներ են եկել Հայաստան, թեև պետական ֆինանսավորումն ավելացել է
«Նպատակը ՀՀ-ի զբոսաշրջության ներուժը մեծացնելն է»
Նախագծի հիմնավորման համաձայն՝ զբոսաշրջության և մարզային ենթակառուցվածքների ծրագրի նպատակն է մեծացնել երկրի զբոսաշրջության ներուժը՝ մի քանի մարզերում թիրախային ենթակառուցվածքի և «փափուկ» ներդրումների միջոցով.
«Ծրագրի առանցքում կլինեն այս կլաստերների հետ զբոսաշրջիկների կապն ապահովելը և զբոսաշրջային վայրերի ենթակառուցվածքների բարելավմանն ուղղված ներդրումները»։
Էկոնոմիկայի փոխնախարար Արման Խոջոյանի խոսքով՝ ծրագրի իրականացման արդյունքում՝
- կպահպանվեն մշակութային և բնական ժառանգության արժեքները,
- կամրապնդվեն գործարար և մասնագիտական հմտությունները։
Ծրագրի շահառու են հանդիսանալու ոչ միայն հարյուր հազարավոր զբոսաշրջիկներ, այլև համայնքների բնակիչները:
Նրանց հասանելի են լինելու «ենթակառուցվածքի բարելավված ծառայություններն ու բարձր գրավչությամբ զբոսաշրջային առաջարկները»։
«Նաև նոր և ավելի լավ աշխատատեղեր կստեղծվեն ծրագրի տարածքներում։ Ակնկալվում է, որ դրանք շահեկան կլինեն բնակիչների և աշխատողների համար՝ զբոսաշրջային արժեշղթայում ապահովելով եկամուտների գոյացման և մասնագիտական զարգացման հնարավորություններ»,- ասված է փաստաթղթում։
Ինչի՞ն են ուղղվելու ծրագրի միջոցները
Փոխնախարար Խոջոյանի խոսքով՝ բնակավայրերը ընտրելիս հաշվի են առնվել դրանց առանձնահատկությունները։ Օրինակ՝ Արենին Հայաստանում հայտնի է որպես գինեգործության կենտրոն, Ջերմուկը՝ առողջարանային, իսկ Գյումրին՝ արհեստների։
Ասում է՝ զբոսաշրջային զգալի ներուժ են ներկայացնում նաև Դիլիջանը, Գորիսը, Դվինն ու Եղեգիսը։
«Դվին կլաստերի զարգացման նպատակն է գրավել հնագիտությամբ հետաքրքրված այցելուների»,- նկատել է նա։
Պաշտոնյայի փոխանցմամբ՝ Արենին տարեկան հյուրընկալում է 500 հազարից ավելի զբոսաշրջիկի, Դիլիջանը՝ շուրջ 250 հազար, Գյումրին՝ ավելի քան 100 հազար այցելուի։
Ծրագրով նախատեսված են զբոսաշրջությանը վերաբերելի ենթակառուցվածքների և ծառայությունների վերականգնման և արդիականացման աշխատանքներ։
Արման Խոջոյանը ներկայացրել է նաև, թե յուրաքանչյուր կլաստերում ինչ է իրականացվելու, մա
Արենի— ճանապարհային և փողոցների ցանցի վերականգնում, քաղաքային շարժունակության ապահովում, հյուրանոցային, ռեստորանային և հանրային սննդի ուղղությամբ աշխատանքներ, ուսուցման և զբոսաշրջային զարգացման ծրագրերի ապահովում, արշավային արահետների ցանցերի ստեղծում և ճանապարհային նոր վայրերի հիմնում, թանգարանների և մշակութային կենտրոնների հիմնում և վերականգնում։
Գյումրի- Գյումրիի շուկայի վերականգնում, Գյուլբենկյան պատմական շենքի վերանորոգում և Լոզանի հյուրընկալության միջազգային դպրոցի մասնաճյուղն այդտեղ տեղակայելու հնարավորության դիտարկում, արհեստավորների դպրոցի ստեղծում։
Դիլիջան— քաղաքի հիմնական գետի՝ Աղստևի աղտոտման նվազեցում ու հեղեղումների ռիսկի մեղմում, ճոպանուղու կառուցում, կապի և հասանելիության բարելավում, փողոցների հարդարում, հետիոտնային, զբոսաշրջային գոտիների ստեղծում, հանրային և կանաչ տարածքների ընդլայնում։
Դվին- Դվին պատմական վայրի հուշարձանների և հնագիտական վայրի մասնակի վերակառուցում, թանգարանային շենքի կառուցում, որը նաև կհյուրընկալի հնագիտական հետազոտական կայանը։
Ջերմուկ- ըմպելասրահի և հարակից ենթակառուցվածքների վերականգնում, Ջերմուկի ջրվեժ տանող ճանապարհի և արահետների վերականգնում, զբոսաշրջիկների համար ընդհանուր հարմարավետության բարելավում։
Գորիս— Գորիսի պատմամշակութային կենտրոնի վերանորոգում, տների ճակատային մասերի վերականգնում և մշակութային միջավայրի պաշտպանություն։ Շրջակա բնակավայրերի համախմբում միասնական բրենդի ներքո՝ թեմատիկ գրավչություններով և արշավային արահետներով, որոնք մարզի պատմական և բնական տեսարժան վայրերը կկապեն միմյանց։
Եղեգիս— ճանապարհների, հետիոտնային և զբոսաշրջային շղթաների ենթակառուցվածքի բարեկարգում ու վերականգնում, աջակցություն մշակութային միջոցառումների խթանմանն ուղղված նախաձեռնություններին։
Հետևեք մեզ — Facebook | Youtube | Telegram
ՀՀ-ում զբոսաշրջային կլաստերներ կստեղծվեն
