«Նվեր ԱՄՆ թշնամիներին»․ «Ազատություն» ռադիոկայանն ու «Ամերիկայի ձայնը» կզրկվեն ֆինանսավորումից
«Ազատություն» ռադիոկայանը կզրկվի ֆինանսավորումից
«Ազատություն» ռադիոկայանի փոխանցմամբ՝ ԱՄՆ Գլոբալ մեդիայի գործակալությունը (USAGM) հայտնել է, որ ԱՄՆ-ն կասեցրել է լրատվամիջոցի հետ դաշնային դրամաշնորհային համաձայնագիրը։ Բացի այդ, մարտի 16-ին Սպիտակ տունը հայտարարել է «Ամերիկայի ձայնի» ֆինանսավորման դադարեցման մասին։ Հայտարարության համաձայն՝ ԱՄՆ նախագահ Դոնալդ Թրամփը ստորագրել է հռչակագիր, «որը երաշխավորում է, որ հարկատուների գումարներն այլևս չեն ծախսվի արմատական քարոզչության ֆինանսավորման համար»։
«Ազատություն» ռադիոկայանի նախագահ Սթիվեն Կապուսի խոսքով՝ կազմակերպության ֆինանսավորման դադարեցումը կդառնա «հսկայական նվեր ԱՄՆ թշնամիներին»։
«Իրանական այաթոլլաները, չինական կոմունիստական առաջնորդները և ավտոկրատները Մոսկվայում ու Մինսկում կտոնեն «Ազատություն» ռադիոկայանի անկումը 75 տարվա աշխատանքից հետո։ Հաղթանակը մեր թշնամիներին զիջելը նշանակում է ուժեղացնել նրանց և թուլացնել Ամերիկան։
Լրատվամիջոցի ողջ հարուստ պատմության ընթացքում մենք օգտվել ենք երկկուսակցական աջակցությունից։ 50 միլիոն մարդիկ, ովքեր ապրում են փակ հասարակություններում և ամեն շաբաթ հույս էին դնում մեզ վրա՝ ճշգրիտ լուրեր և տեղեկություններ ստանալու համար, կմնան առանց Ամերիկայի և աշխարհի մասին ճշմարտությունն իմանալու հնարավորության»,- հավելել է Կապուսը։
Ավելի վաղ ԱՄՆ նախագահ Դոնալդ Թրամփը ստորագրել էր հրամանագիր, որով մի շարք դաշնային գործակալությունների հանձնարարվում է դադարեցնել օրենքով չնախատեսված գործառույթների իրականացումը։
Թրամփի այդ հրամանագիրը տարածվում է մի շարք գործակալությունների և կառույցների վրա, ցանկում ներառված են՝
- Միջնորդության և հաշտեցման դաշնային ծառայությունը,
- Վուդրո Վիլսոնի անվան գիտնականների միջազգային կենտրոնը,
- Թանգարանային և գրադարանային ծառայությունների ինստիտուտը,
- Անօթևանության հարցերով ԱՄՆ միջգերատեսչական խորհուրդը,
- Համայնքների զարգացմանը նպաստող ֆինանսական հաստատությունների հիմնադրամը,
- Փոքրամասնությունների բիզնեսի զարգացման գործակալությունը,
- ԱՄՆ գլոբալ մեդիայի գործակալությունը։
ԱՄՆ գլոբալ մեդիայի գործակալությունը վերահսկում է ԱՄՆ կառավարության կողմից ֆինանսավորվող լրատվամիջոցները, ինչպիսիք են «Ամերիկայի ձայնը», «Ազատություն» ռադիոկայանը և «Ազատ Ասիա» ռադիոկայանը։
Բացի այդ, ԱՄՆ պետքարտուղար Մարկո Ռուբիոյի՝ մարտի 10-ի հայտարարության համաձայն՝ չեղյալ է հայտարարվել նաև ԱՄՆ Միջազգային զարգացման գործակալության ծրագրերի 83%-ը։
«5200 չեղարկված պայմանագրերը արժեին տասնյակ միլիարդավոր դոլարներ, դրանք չէին համապատասխանում, իսկ որոշ դեպքերում նույնիսկ վնասում էին Միացյալ Նահանգների հիմնական ազգային շահերին։
Կոնգրեսի հետ համաձայնեցմամբ մենք նախատեսում ենք ավելի արդյունավետ կառավարել մնացած 18% ծրագրերը, որոնք դեռևս ֆինանսավորվում են Պետդեպարտամենտի կողմից։
Մեծ շնորհակալություն Կառավարության արդյունավետության դեպարտամենտին և մեր անխոնջ աշխատակիցներին, որոնք աշխատել են անհաշվելի ժամեր՝ իրականացնելու համար այս վաղուց հասունացած և պատմական բարեփոխումը»,- հայտարարել էր Ռուբիոն։
