Ադրբեջանում ձերբակալվել են Toplum TV անկախ լրատվամիջոցի աշխատակիցները
Toplum TV. հերթական ռեպրեսիան Ադրբեջանում
Ադրբեջանում զանգվածային ձերբակալություններ են տեղի ունեցել ևս մեկ անկախ լրատվամիջոցի խմբագրությունում։ Խուզարկությունից հետո Toplum TV առցանց պարբերականի գրասենյակը կնիքվել է, և մոտ 20 աշխատակիցներ բերման են ենթարկվել ոստիկանների կողմից։ Նրանցից ոմանք ազատ են արձակվել կեսգիշերին մոտ։ Առցանց պարբերականի համահիմնադիրը և մի քանի աշխատակիցներ մեղադրվում են մաքսանենգության մեջ, որն, իբր, կատարվել է մի խումբ անձանց կողմից նախնական համաձայնության միջոցով:
- Ադրբեջանում ձերբակալել են լրագրող Շահին Ռզաևին
- Սարսափելի հանցագործություն Բաքվում․ երիտասարդը սպանել է իր ընտանիքի հինգ անդամներին
- Քաղաքացիությունը՝ փախստական․ ԼՂ-ի հայերի պատմություններն ու հիշողությունները
Խուզարկությունից հետո լրատվամիջոցի գրասենյակը կնիքվել է
Մարտի 6-ին՝ ժամը 18-ի սահմաններում, ոստիկանությունն ավարտել է երկու ժամից ավելի տևած խուզարկությունը Toplum TV առցանց պարբերականի գրասենյակում և կնիքել այն։
Շենքի բոլոր մուտքերը արգելափակվել են ոստիկանների կողմից, և նույնիսկ պարբերականի աշխատակիցներին թույլ չեն տվել մուտք գործել խմբագրություն։ Իսկ բոլորին, ովքեր այդ պահին եղել են խմբագրությունում, ոստիկանները տարել են անհայտ ուղղությամբ։ Նրանց հետ հեռախոսով կապ հաստատելն անհնար էր, ուստի դժվար էր ճշտել, թե ուր են նրանց տարել, քանի մարդու մասին է խոսքը և կոնկրետ ովքեր են նրանք։
Ներքին գործերի նախարարությունը չի մեկնաբանել, թե ուր են նրանց տարել և որն է կալանավորման պատճառը:
«Կատարվածի համար խելամիտ բացատրություն չկա։ Կարծես ուզում են երկրում ամբողջությամբ վերացնել անկախ լրատվամիջոցները, որպեսզի քննադատական կարծիքների համար հարթակներ չմնան»,- ասել է Toplum TV-ի գլխավոր խմբագիր Խադիջա Իսմայիլը։
«Մենք հանցավոր գործունեության հետ որևէ առնչություն չունենք և անօրինական գործողություններ չենք իրականացրել։ Հետևաբար, կատարվածի համար իրավական հիմքեր չկան»,- ասել է նա և հավելել, որ չի կարողանում ՆԳՆ-ից ստանալ որևէ պաշտոնական տեղեկություն և խուզարկության արձանագրությունը։
Ադրբեջանի ներքին գործերի նախարարությունը սահմանափակվել է Toplum TV-ի գրասենյակում իրականացված խուզարկության մասին կարճ մեկնաբանությամբ։
«Մի խումբ անձանց գործունեության մասին ստացված տեղեկատվության հիման վրա ոստիկանության աշխատակիցները գործողություններ են իրականացրել Յու.Վ. Չեմենզեմինլի հասցեում գտնվող գրասենյակում, Բաքվի Նարիմանովի շրջանի 98Բ բնակարանում և այլ հասցեներում», — ասված է ՆԳՆ տարածած հաղորդագրության մեջ։
Խուզարկություններ «այլ հասցեներով»
Ավելի ուշ հայտնի դարձավ, որ «մյուս հասցեներն» են «3-րդ հանրապետության հարթակի» գրասենյակը, որի համահիմնադիրն է Ակիֆ Գուրբանովը, ով նաև Toplum TV-ի համահիմնադիրն է։ Նրա բնակարանում, ինչպես նաև Toplum TV-ի աշխատակիցներ Ֆարիդ Իսմայիլովի ու Էլմիր Աբբասովի բնակարաններում խուզարկություններ են կատարվել։
«3-րդ հանրապետության հարթակի» գրասենյակում խուզարկության ժամանակ ձերբակալվել են համահիմնադիրներ Ակիֆ Գուրբանովը, Արազ Ալիևը և Ռուսլան Իզեթլին։ Վերջին երկուսն ազատ են արձակվել կեսգիշերին մոտ։
Երկու ակտիվիստներն էլ ասացին, որ իրենք չեն տրամադրել իրենց հեռախոսներն ու չեն հայտնել դրանց վրա դրված գաղտնաբառերը, հետևաբար ֆիզիկական ճնշումների են ենթարկվել։
Ակիֆ Գուրբանովի փաստաբան Շահլա Գումբատովային թույլ չեն տվել ներկա գտնվել նրա գրասենյակի ու բնակարանի խուզարկություններին: Փաստաբանը սոցիալական ցանցերում տեսանյութ է հրապարակել, որտեղ երկար ժամանակ թակում է Գուրբանովի բնակարանի դուռը, որտեղ խուզարկություն է տեղի ունենում, բայց ոչ ոք դուռը բաց չի անում նրա առաջ։ Ավելի ուշ փաստաբանը հայտնել է, որ դիմակավորված անձինք իրեն կոպիտ կերպով հեռացրել են բնակարանի դռան մոտից։
Մոտ տասը մարդ կասկածվում է մաքսանենգության մեջ
Կեսգիշերին Բաքվի քաղաքային ոստիկանության գլխավոր վարչությունից ազատ են արձակվել Toplum TV-ի մոտ տասը աշխատակիցներ: Այդ մասին հայտնել է պարբերականի գլխավոր խմբագիր Խադիջա Իսմայիլը։
Toplum-ի աշխատակիցներ Էլմիր Աբբասովը, Թալեհ Բադալովը, Խանլար Ալիզադեն, Մուշվիգ Ջաբբարովը և Ֆարիդ Իսմայիլովը, ինչպես նաև Ժողովրդավարական նախաձեռնությունների ինստիտուտի անդամներ Ալի Զեյնալն ու Իլկին Ախմեդովը, «3-րդ հանրապետության հարթակի» անդամ Ակիֆ Գուրբանովը շարունակում են պահվել ոստիկանությունում:
Փաստաբան Զիբեյդա Սադիգովան հայտնել է, որ Ֆարիդ Իսմայիլովի դեմ քրեական գործ է հարուցվել Ադրբեջանի քրեական օրենսգրքի 206.3.2-րդ հոդվածով (մաքսանենգություն մի խումբ անձանց կողմից նախնական համաձայնության միջոցով):
Իսմայիլովի բնակարանում խուզարկության ժամանակ «առգրավվել է» մոտ երեք հազար եվրո։
Փաստաբանի խոսքով՝ Իսմաիլովը հայտարարել է, որ իր վրա հոգեբանական և ֆիզիկական ճնշում է գործադրվում՝ որոշ փաստաթղթեր ստորագրելու համար։ Նա հրաժարվել է դա անել։ Պաշտպանական կողմը բողոքարկելու է:
Վերջին տեղեկությունների համաձայն՝ Քրեական օրենսգրքի 206.3.2-րդ հոդվածն են վերագրում նաև Մուշֆիգ Ջաբբարովին, Ալի Զեյնալին, Ռամիլ Բաբաևին, Էլմիր Աբբասովին և Իլկին Ախմեդովին:
Կոտրել են Toplum TV-ի յութուբյան ալիքը
Նույն օրը Youtube վիդեոհոսթինգում վերանվանվել է Toplum TV-ի հաշիվը։ Միևնույն ժամանակ, այդ ալիքից սկսել են անհետանալ տեղարդված տեսանյութերը և հեռարձակումների ձայնագրությունները։
Ընդհանուր առմամբ էջն ուներ 3600 տեսանյութ և 92000 բաժանորդ։
Իրավապաշտպանների խոսքով՝ իրավապահ մարմինները հաշվին հասանելիություն են ստացել կամ ադմինիստրատորին են ստիպել ոչնչացնել լրագրողական թիմի երկարամյա աշխատանքը։
Միացյալ Նահանգները «խորապես մտահոգված է»
«Միացյալ Նահանգները խորապես մտահոգված է հաղորդագրություններից այն մասին, որ ադրբեջանական ոստիկանությունը ներխուժել է Toplum TV անկախ պարբերականի գրասենյակ, ինչպես նաև ձերբակալել մի քանի անկախ լրագրողների և քաղաքացիական հասարակության ակտիվիստների», — ասել է ԱՄՆ Պետդեպարտամենտի խոսնակ Մեթյու Միլլերը: Այդ մասին Վաշինգտոնից հաղորդում է Turan-ի թղթակիցը։
«Մենք մեր խիստ առարկությունն ենք հայտնում լրագրողներին, քաղաքացիական հասարակության ակտիվիստներին և ընդդիմադիր գործիչներին ահաբեկելու, ճնշելու և պատժելու շարունակական փորձերին», — հավելել է Միլլերը:
«Մենք կոչ ենք անում Ադրբեջանին դադարեցնել իրենց հիմնարար ազատություններն իրացնողների հետապնդումները և ազատ արձակել քաղաքական դրդապատճառներով անարդարացիորեն կալանավորված բոլոր անձանց։ Ոչ ոք չպետք է ենթարկվի ազատազրկման կամ այլ պատիժի խոսքի ազատության իրացման համար»,- ճեպազրույցում ասել է Պետդեպարտամենտի ներկայացուցիչը:
«Ինչո՞ւ եք կարծում, որ կառավարությունը կլսի այս կոչերը, եթե մինչ այժմ անտեսել է միջազգային հանրության նմանատիպ արձագանքները»:
Turan գործակալության այս հարցին Միլլերը պատասխանել է. «Ես այլ եզրակացություններ չեմ անի, ուղղակի կասեմ, որ նրանք պետք է դադարեն ճնշել կարծիքի արտահայտման ազատությունը, քանի որ դա բխում է սեփական ժողովրդի շահերից։
Ես կարող եմ ձեզ վստահեցնել, որ երբ մենք մասնավոր դիվանագիտական քննարկումներ ենք անցկացնում ադրբեջանցի պաշտոնյաների հետ, ինչպես դա արեց պետքարտուղարն անցյալ ամիս, մենք բարձրացնում ենք հենց այս խնդիրները»:
