Doctor Yan. բժշկի հետ պացիենտի ուղիղ կապն ապահովող հայկական հավելված
Doctor Yan՝ ինչպես կապվել բժշկի հետ
Հայաստանում ստեղծված Doctor Yan հավելվածը օգնում է պացիենտներին կապվել իրենց նախընտրած բժշկի հետ առանց ընդհանուր ծանոթներ փնտրելու և մերժումներ ստանալու՝ օգտագործելով կապի ժամանակակից միջոցները։
Հավելվածի միջոցով աշխարհի ցանկացած ծայրից հնարավոր է օնլայն եղանակով ամրագրել այց Հայաստանում աշխատող բժշկի մոտ, իսկ հետո խուսափել նաև առողջապահական կենտրոններում ժամերով հերթում սպասելուց:
Հավելվածը նաև մասնագիտական ժամանակը խնայելու ու առավել պլանավորված աշխատելու հնարավորություն է ընձեռում բժիշկներին։ Այն փաստացի կատարում է նրանց համար անձնական օգնականի գործառույթներ՝ տեղեկացնելով ու պարբերաբար հիշեցնելով գրանցված այցերի, զբաղված ժամերի, ինչպես նաև արդեն իսկ այցելած պացիենտների կարծիքների ու ոլորտային միջոցառումների մասին: Իսկ հաճախորդների դրական գնահատականները նպաստում են առցանց հարթակներում բժիշկների հեղինակության առաջխաղացմանը։
Բոլոր մանրամասները հավելվածի ստեղծման և զարգացման հեռանկարների մասին։
- Որակյալ առողջապահություն․ Հայաստանի պահանջարկն ու սփյուռքի առաջարկը
- Բժիշկ Հակոբը. «Պատերազմի դաշտում ժամանակ չես ունենում տարբերակելու՝ ում փրկես, ում՝ չէ»
- Ինչպես են ապրում ՄԻԱՎ-ով մարդիկ Հայաստանում․ խտրականություն բոլոր կողմերից
Գաղափարը ծնվել է բժիշկների ընտանիքում
«Այս միտքն եկավ է 2020թ.-ին ընտանեկան զրույցներից մեկի ընթացքում: Հայրիկիս, որպես փորձառու բժշկի, օրվա մեջ անընդհատ, ամենատարբեր ժամերի զանգահարում էին, որպեսզի խորհրդակցեն։ Հարցնում էին, թե որ բժշկին դիմեն այս կամ այն խնդրի դեպքում, խնդրում, որ օգնի այց ամրագրել որևէ մասնագետի մոտ: Ու մենք մտածում էինք, ինչպե՞ս անենք, որ մարդիկ կարողանան առանց խնդիրների իրենց համար նախընտրելի բժշկի մոտ արագ այց ամրագրեն»,- հիշում է նախագծի համահիմնադիր Իրինա Ղազարյանը:
Բժիշկների ընտանիքում մեծացած Իրինան նկատում էր՝ ոլորտը նորարարական մոտեցմամբ սպասարկելու անհրաժեշտություն կա։ Ամեն դեպքում, նախագիծը կյանքի կոչելուց առաջ նախ ուսումնասիրեց առողջապահական համակարգի խնդիրները՝ զրուցելով տարբեր ոլորտների բժիշկների, առողջապահական կենտրոնների ղեկավարների հետ։
Գաղափարն իրատեսական դարձնելու ճանապարհին մասնագիտական խորհուրդներով նրան աջակցել է և հայրը՝ «Միքայելյան վիրաբուժության ինստիտուտի» բուժական գծով տնօրեն Արա Ղազարյանը:
«Ուզում էինք գաղափարը վերածել այնպիսի պրոդուկտի, որը հարմար կլիներ և բժշկի համար՝ իր ժամանակացույցը կազմելու տեսանկունից, և պացիենտին հնարավորություն տալ արագ այց ամրագրել իր նախընտրած բժշկի մոտ»,- ասում է Արա Ղազարյանը։
Նաև շեշտում է, որ հավելվածի ստեղծման ու գործարկման հիմքում կարևոր են համարել երիտասարդ մասնագետներին հանրության համար առավել տեսանելի դարձնելու անհրաժեշտությունը։ Ասում է՝ «նորավարտները շատ հաճախ ստվերում են մնում»:
Գաղափարի տեխնիկական լուծումները գտել ու հավելվածի բնակակոն աշխատանքն ապահովելու պարտականությունը ստանձնել է Զավեն Նաղաշյանը։ Նա նախագծի համահիմնադիրն է և «Նաղաշյան Սոլուշնս» ՍՊԸ-ի գործադիր տնօրենը: Իրինա Ղազարյանն էլ զբաղվում է հավելվածի կառավարման և առաջխաղացման հարցերով:
Շատ բժիշկ՝ ավելի շատ պացիենտ
Հավելվածում արդեն գրանցված են Հայաստանի առողջապահական կառուցների ամենատարբեր ոլորտների շուրջ 600 բժիշկ ու 10 հազար պացիենտ: Առաջիկա 2 տարիների ընթացքում հիմնադիրները նախատեսում են բժիշկների թիվը հասցնել ավելի քան 3000-ի։ Վստահ են՝ շղթայական էֆեկտով դա կազդի նաև հավելվածից օգտվողների թվի շեշտակի ավելացման վրա:
«Եթե համավարակը, 2020-ի պատերազմը և դրան հաջորդած սրացումները չլինեին, ապա հավելվածի առաջընթացն ավելի տեսանելի կլիներ: Մեզ հետ համագործակցող բժիշկներից շատերը համավարակի ժամանակ գնացին քովիդ-կենտրոններ, պատերազմների ժամանակ՝ հոսպիտալներ։ Այլ կերպ ասած, հավելվածի հիմնադրումից մինչ օրս մեզ չի հաջողվել երկարաժամկետ, կայուն, առանց դադարների աշխատել»,- ասում է Իրինան:
2021 թվականին հավելվածի միջոցով բժիշկների մոտ այց է գրանցել շուրջ 1500 պացիենտ, 2022-ի օգոստոսի դրությամբ այս ցուցանիշն արդեն գերազանցվել է: 1000-ից ավելի պացիենտներ այցերից հետո հավելվածում թողել են իրենց կարծիքը՝ բժշկի մասին։ Դա կարևոր դեր է խաղում հավելվածից օգտվող այլ անձանց համար՝ բժշկի ընտրություն կատարելիս:
«Ամենատպավորիչը մեր այցելուներից մեկի արձագանքն էր, որը մեր հավելվածով կարողացել էր այց գրանցել ընդամենը 30 վայրկյանում: Այն դեպքում, որ մինչ այդ ամիսներ շարունակ չէր կարողացել կապվել իր նախընտրած բժշկի հետ։ Նա անհավանական հաջողություն էր համարում կատարվածը»,- պատմում է Իրինան:
Առցանց գրանցման հնարավորությունից զատ հավելվածն ունի նաև «բլոգ» բաժինը, որտեղ զետեղվում է առողջապահական ոլորտին առնչվող արդիական, օգտակար տեղեկատվութուն:
«Այս բլոկը ստեղծել ենք հայերեն լեզվով առողջապահական ոլորտին առնչվող նյութերի պակասը լրացնելու նպատակով: Մեր նպատակն է, որ հավելվածը լինի ոչ միայն բժշկի մոտ այցի ամրագրման գործիք, այլ նաև ոլորտի մասին նորությունների ու օգտակար տեղեկատվության իրազեկման հարթակ»,- նշում է Իրինան:
«Ամենօրյա օգտագործման գործիք»
Արա Ղազարյանը վստահ է՝ նախագիծը հաջողելու է, պետք է միայն «համբերություն ու տքնաջան աշխատանք, և հավելվածը կդառնա մարդկանց համար ամենօրյա օգտագործման գործիք»:
Այն հասանելի է երեք լեզվով՝ հայերեն, ռուսերեն, անգլերեն: Հատկապես վերջին շրջանում ավելացել է ռուս օգտատերերի թիվը, որոնք Հայաստան են տեղափոխվում ռուս-ուկրաինական պատերազմի հետևանքով:
«Հայաստան տեղափոխված ռուսաստանցիների համար շատ հեշտ ու հարմար է հավելվածից օգտվելը, քանի որ Ռուսաստանի Դաշնությունում տարիներ շարունակ նմանատիպ հավելված է գործել»,- ասում է Արա Ղազարյանը:
Նա կարծում է, որ այս նախագիծը կարող է նպաստել նաև Հայաստանում առողջապահական տուրիզմի զարգացմանը․
«Արտերկրից շատերն են հետաքրքրված հատկապես ստոմատոլոգիական ու պլաստիկ վիաբուժության ծառայություններով: Եվ եթե նախկինում արտերկրից զանգով էին փորձում բժիշկների հետ պայմանավորվել, ապա հիմա շատերը ցանկացած երկրից ամրագրում են իրենց այցն ու նոր միայն գալիս Հայաստան»:
Առողջապահական կենտրոններից զատ հավելվածի համահիմնադիրները համագործակցում են նաև ոլորտը համակարգող պետական կառույցի՝ առողջապահության նախարարության հետ:
Չնայած պետական կառույցների հետ սերտ համագործակցությանը, Իրինան վստահ է՝ հավելվածի մասնավոր, ոչ պետական համակարգի մաս լինելը մի շարք առավելություններ ունի․
«Երբ նախագիծը մասնավոր է, դու և՛ լիարժեք հսկողություն իրականացնելու, և՛ ազատ գործելու, ճկունություն դրսևորելու հնարավորություն ես ունենում։ Դա թույլ է տալիս հավելվածն արագ փոփոխել ու ադապտացնել նոր մարտահրավերներին ու կարիքներին, որն էլ դառնում է նախագծի հաջողության գրավականը: Իսկ պետական համակարգում ամեն մանր փոփոխություն կարող է տևել մի քանի տարի»:
Doctor Yan՝ ինչպես կապվել բժշկի հետ
