Հայաստանը հետ է կանչել իր ներկայացուցչին ՀԱՊԿ գլխավոր քարտուղարի պաշտոնից

Հավաքական անվտանգության պայմանագրի կազմակերպության գլխավոր քարտուղար Յուրի Խաչատուրովը ազատվել է զբաղեցրած պաշտոնից: Որոշումն ընդունել է ՀԱՊԿ խորհուրդը:

Ի՞նչ է ՀԱՊԿ-ը

Հավաքական անվտանգության պայմանագրի կազմակերպությունը տարածաշրջանային միջազգային կազմակերպություն է, որը գործում է Ռուսաստանի հովանու ներքո: Ինչպես արձանագրված է ՀԱՊԿ կանոնադրության մեջ, կազմակերպության նպատակն է «խաղաղության ամրապնդումը, միջազգային և տարածաշրջանային անվտանգությունն ու կայունությունը, անդամ-պետությունների անկախության, տարածքային ամբողջականության և ինքնաիշխանության պաշտպանությունը՝ հիմնված հավաքականության սկզբունքի վրա»:

Կազմակերպությունը հիմնադրվել է 1992թ.՝ ԽՍՀՄ փլուզումից անմիջապես հետո: Վրաստանը, Ադրբեջանը և Ուզբեկստանը շուտով լքեցին կազմակերպության շարքերը: Եվ այսօր դրա 6 անդամներն են Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը:

Ինչու են Խաչատուրովին ազատել պաշտոնից

Կազմակերպության պաշտոնական հաղորդագրության մեջ նշվում է, որ որոշումը կայացրել է հայկական կողմը:

«Համաձայն սահմանված կարգի՝ Հավաքական անվտանգության պայմանագրի կազմակերպության գլխավոր քարտուղարի պաշտոնից Հայաստանի Հանրապետության ներկայացուցիչ Յուրի Խաչատուրովին հետ կանչելու՝ հայկական կողմի նախաձեռնած գործընթացն ավարտված է»:

ՀԱՊԿ գլխավոր քարտուղարի պարտականությունները ժամանակավորապես կկատարի Խաչաուրովի տեղակալը՝ Վալերի Սեմերիկովը:

Պաշտոնական Երևանը Յուրի Խաչատուրովին հետ կանչելու մասին որոշում է կայացրել նրան «Մարտի 1»-ի գործով որպես կասկածյալ մեղադրանք առաջադրելու պատճառով: Խաչատուրովի դեմ «սահմանադրական կարգի տապալման» հոդվածով քրեական գործը հարուցվել էր այս տարվա հուլիսին: Նա ազատ էր արձակվել գրավի դիմաց:

Յուրի Խաչատուրովը զանգվածային ակցիաների ժամանակ գլխավորում էր Զինված ուժերի Երևանի կայազորը, և ըստ քննության, գլխավորել է ցուցարարներին ցրելու գործողությունը:

• Ինչի համար են ձերբակալել Հայաստանի նախկին նախագահ Ռոբերտ Քոչարյանին և ինչ հիմքով են ազատ արձակել

• Ռուսաստանը շարունակում է զենք մատակարարել Հայաստանին

• Նրանց մասին, ովքեր կազմակերպել են 1999թ. Հայաստանի խորհրդարանի ահաբեկչությունը  

Ի՞նչ կլինի հետո

Այժմ Հավաքական անվտանգության պայմանագրի կազմակերպությունը պետք է ընտրի նոր գլխավոր քարտուղար: Դա, ամենայն հավանականությամբ, տեղի կունենա նոյեմբերի 8-ին ՀԱՊԿ խորհրդի նիստին: Ըստ կազմակերպության կանոնակարգի՝ գլխավոր քարտուղարի մանդատը Հայաստանը դեռ մեկ տարի կպահպանի:

Պաշտոնական Երևանի մեկնաբանությունը

Իրավիճակն արդեն մեկնաբանել է Հայաստանի արտգործնախարար Զոհրաբ Մնացականյանը: Նրա խոսքով՝ այժմ քննարկվում է, արդյո՞ք գլխավոր քարտուղարի մանդատը կմնա Հայաստանի մոտ հարցը.

«Մենք համոզված ենք, որ կարող ենք իրականացնել այդ գործառույթը: Մենք բավականաչափ ռեսուրսներ ունենք թեկնածու առաջադրելու համար: Շահագրգռվածությունն առաջին հերթին նրանում է, որպեսզի կազմակերպությունը մնա արդյունավետ»:

Կհաջողվի՞ Հայաստանին պահպանել մանդատը

Հարցին՝ կհաջողվի՞ արդյոք Հայաստանին պահել այդ պաշտոնը, Յուրի Խաչատուրովի դեմ քրեական գործ հարուցելուց հետո քննարկվել է փորձագիտական շրջանակներում: Իրավիճակը թեժացավ պաշտոնական Մոսկվայի սուր արձագանքից հետո: Այնտեղ կարծում են, որ Հայաստանը պետք է սկզբում հետ կանչեր Յուրի Խաչատուրովին գլխավոր քարտուղարի պաշտոնից և հետո միայն քրեական հետապնդում սկսեր նրա դեմ: Իսկ ստեղծված իրավիճակը վնաս հասցրեց կառույցի հեղինակությանը:

Քաղտեխնոլոգ Վիգեն Հակոբյանը ենթադրում է, որ Հայաստանը չի կարողանա պահպանել մանդատը և գլխավոր քարտուղարի պաշտոնը կանցնի այլ երկրի.

«Ոչ ոք չի ցանկանա, որպեսզի դա դառնա նախադեպ: Կարծում եմ, կընդունվի միջանկյալ որոշում. նախագահությունը կանցնի այլ երկրի՝ ըստ այբբենական կարգի»:

Յուրի Խաչատուրովի մասին

1987-1989թթ. Յուրի Խաչատուրովը ծառայել է Աֆղանստանում որպես հրթիռային զորքերի և հրետանու շտաբի պետ: 1992թ.-ից գործուղվել է Հայաստանի պաշտպանության նախարարության տրամադրության տակ: 2008թ.-ից գեներալ-գնդապետ Յուրի Խաչատուրովը զբաղեցրել է Հայաստանի զինված ուժերի գլխավոր շտաբի պետի և պաշտպանության նախարարի տեղակալի պաշտոնը: 2016թ. նշանակվել է Հայաստանի ազգային անվտանգության խորհրդի քարտուղար: ՀԱՊԿ գլխավոր քարտուղարի պաշտոնը զբաղեցնում էր 2017թ. մայիսից: