5 խորհուրդ արտերկրում սովորել ցանկացողներին
1. Փորձեք օգտվել փոխանակման ծրագրերից
Արտերկրի համալսարանում ուսանող դառնալու ամենադյուրին ճանապարհը փոխանակման ծրագրերն են: Այդպիսիք քիչ չեն, մեծ մասը նախատեսված է բակալավրիատի և մագիստրատուրայի ուսանողների համար, սակայն կան ծրագրեր նաև դպրոցականների, դոկտորի կոչման դիմող հայցորդների համար: Փոխանակման ծրագրով սովորելն ամենահեշտն է նրանց համար, ովքեր դեռ չեն կողմնորոշվել համալսարանի հարցում. ձեր փոխարեն դա կանի ծրագիրը: Երբեմն այն կազմակերպում է նաև բոլոր հարակից թեստերի անցկացումը (TOEFL, GRE, SAT պես միջազգային քննություններ) և հարցազրույցներ, ինչը նույնպես շատ հարմար է: Սակայն փոխանակման ծրագրի գլխավոր առավելությունն այն է, որ ծրագիրը ծածկում է ուսման բոլոր ծախսերը: Ի տարբերություն այլ հնարավորությունների, երբ դուք ստիպված եք ֆինանսավորում փնտրել (scholarship, կրթաթոշակ) ինքնուրույն:
2. Ընտրեք՝ Եվրո՞պա, թե՝ Ամերիկա
Նմանատիպ ծրագիր է Erasmus+-ը: Այս եվրոպական ծրագրի բյուջեն գերազանցում է 18 մլրդ եվրոն: Ամեն տարի ծրագրին մասնակցում են հարյուր հազարավոր միջազգային ուսանողներ, ովքեր ուզում են սովորել եվրոպական բուհերում: Մինչև 2020թ. Erasmus+ ծրագիրը 2 մլն ուսանողների ուսման գրանտեր է տրամադրել: Erasmus+ ծրագրի առաջարկները կարելի գտնել այստեղ. http://eacea.ec.europa.eu/erasmus_mundus/funding/scholarships_students_academics_en.php
Սակայն ակադեմիական փոխանակման հնարավորություններն ավելի մեծ են ԱՄՆ-ում, քան Եվրոպայում: ԱՄՆ-ում գործում են մի շարք պետական ծրագրեր, որոնց նպատակը ամբողջ աշխարհից լավագույն ուսանողներին ընտրելն ու ամերիկյան համալսարաններում նրանց կրթությանն աջակցելն է: Հաճախ այդպիսի ծրագրերի մասին ինֆորմացիան ներկայացված է լինում տարբեր երկրներում ԱՄՆ դեսպանատան կայքերում: Օրինակ, Վրաստանում ԱՄՆ դեսպանատան կայքում ներկայացված ցուցակին կարելի է ծանոթանալ այստեղ՝ http://georgia.usembassy.gov/resources/programs/exchange-programs.html
3. Մի մոռացեք Ասիայի մասին
Հարավային Կորեայի համալսարանները կարող են լավագույն ընտրություն լինել այն ուսանողների համար, ովքեր ուսումնասիրում են առևտրային հարաբերություններ կամ տեխնոլոգիաներ: Ամեն տարի Հարավային Կորեայի կառավարությունը միջազգային ուսանողների համար դրամաշնորհներ է դուրս գրում, որպես կանոն, այդ գումարները ծածկում են 66 համալսարաններից մեկում ուսանելու բոլոր ծախսերը: Համապատասխան ծրագիրը, որը կոչվում է KOREAN — Government Scholarship Programe (KGSP), ամեն երկրի համար քվոտաներ է սահմանում: Օրինակ, Վրաստանի համար այն կազմում է տարեկան 3 ուսանող: Այն դիմումները, որտեղ դիմորդը նշում է նախընտրելի համալսարանները, ուղարկվում են Կորեայի դեսպանատուն, որտեղ կատարվում է նախնական ընտրություն և հարցազրույց, իսկ բոլոր փուլերն անցած դիմորդի փաստաթղթերն ուղարկվում են Սեուլ: Այնտեղ դրանք ուսումնասիրում է ՝ NIIED NATIONAL INSTITUTE FOR INTERNATIONAL EDUCATION կազմակերպությունը, որը բաշխում է ակադեմիական դրամաշնորհները: Վերջնական փուլը համալսարաններում կատարվող ընտրությունն է: Եթե ընդունված ուսանողը կորեերեն չգիտի, նա ուսման ծրագիրը սկսում է տարեկան ծրագրից, որի ընթացքում կորեերեն է սովորում:
4. Բախտը փորձեք ուղղակիորեն
Փոխանակման ծրագրին մասնակցությունը բոլորովին պարտադիր պայման չէ նրանց համար, ովքեր ուզում են սովորել արտասահմանում: Այս հնարավորությունից կարող են օգտվել նրանք, ովքեր գլուխ են հանում արևմտյան համալսարաններից, հասկանում են, որտեղ է պետք ընդունվել և ինչ է պետք դրա համար անել, կարճ ասած, հստակ գիտեն իրենց նպատակը: Երբ ընդունելության բոլոր փուլերն անցնեք, և համալսարանը ցանկանա ձեզ իր ուսանողների շարքում տեսնել, պետք է ինքնուրույն ֆինանսավորում փնտրեք: Դա չի նշանակում, որ ուսման համար պետք է վճարեք սեփական խնայողություններից: Հաճախ ակադեմիական դրամաշնորհները համալսարանն է տրամադրում, սակայն ուսանողները հիմնականում դիմում են հատուկ հիմնադրամներ՝ միջազգային և տեղական:
5. Գտեք ֆինանսավորում
Վրաստանում, օրինակ, նման հովանավոր է Կրթության միջազգային կենտրոնը: Այն կառավարական կառույց է, որը մի քանի տարի առաջ հիմնել է Վրաստանի վարչապետը: Իր գործունեության առաջին տարում կենտրոնն աջակցել է 192 վրացի ուսանողի, ովքեր այժմ սովորում են արևմտյան համալսարանների մագիստրատուրայում կամ դոկտորանտուրայում: Բոլոր ցանկացողները կարող են գրանցվել Կրթության միջազգային կենտրոնում մարտի 20-ից մինչև մայիսի 15-ը հետևյալ հղումով՝ http://www.iec.gov.ge: Վրաստանի հայցորդների համար ևս մեկ կարևոր ռեսուրս է www.progeorgia.ge, որը յուրօրինակ փնտրողական համակարգ է և թույլ է տալիս գտնել հովանավորներ, որոնք պատրաստ են վճարել ձեր կրթության համար:
