Աբխազիայում ծեծելով սպանել են 4-ամյա աղջկա․ ի՞նչ քայլեր պետք է ձեռնարկեն իշխանությունները
4-ամյա երեխայի սպանություն Աբխազիայում
Աբխազիայում հետաքննություն է ընթանում 4 տարեկան երեխայի դաժան սպանության գործով։ Նախնական տեղեկությունների համաձայն՝ աղջիկը մահացել է բազմաթիվ վնասվածքներից, որոնք ստացել է տանը։
Դեպքը լայն հասարակության վրդովմունքին է արժանացել և կրկին սրել ընտանեկան բռնության կանխարգելման մասին օրենքի անհրաժեշտության վերաբերյալ բանավեճը։
Ողբերգությունը տեղի է ունեցել ապրիլի 7-ին Մաճարա գյուղում: Ժամը 22:50-ի սահմաններում 4-ամյա Գաբրիելա Լախինան ծայրահեղ ծանր վիճակում տեղափոխվել է հիվանդանոց: Բազմաթիվ վնասվածքներ են հայտնաբերվել գլխի, դեմքի, իրանի և վերջույթների շրջանում: Չնայած բժիշկների գործադրած ջանքերին՝ նրա կյանքը փրկել չի հաջողվել, մահացել է մի քանի ժամ անց:
Դատախազությունը հետաքննություն է սկսել։ Նշանակվել է դատաբժշկական փորձաքննություն, և ձեռնարկվում են անհետաձգելի քննչական գործողություններ միջադեպի բոլոր հանգամանքները պարզելու համար։ Նախնական տեղեկությունների համաձայն՝ խոսքը ընտանիքի անդամների կողմից դաժան վերաբերմունքի մասին է։ Մասնավորապես՝ արարքի կատարման մեջ կասկածվում է երեխայի հարազատ մորաքույրը։
Հետաքննությանը մասնակցում են Ներքին գործերի նախարարության աշխատակիցներ, ինչպես նաև Երեխաների իրավունքների հանձնակատարը, որն աշխատում է վկաների, այդ թվում՝ անչափահասների հետ և հետևում է, որ նրանց իրավունքները հարգվեն։
Միջադեպը ցնցել է բոլորին՝ սովորական քաղաքացիներից մինչև պաշտոնյաներ ու իրավապաշտպաններ: Աբխազիայի Հանրային պալատն այն անվանել է «ընտանեկան բռնության հրեշավոր ակտ»՝ ընդգծելով, որ ողբերգությունը բացահայտեց երեխաների պաշտպանության և քաղաքացիների անվտանգության հետ կապված համակարգային խնդիրները:
Երեխաների իրավունքների պաշտպանը նաև նշել է, որ երեխայի մահը ցավալի հաստատումն է այն բանի, որ ընտանեկան բռնությունը շարունակում է լուրջ խնդիր մնալ Աբխազիայում, և ընտանիքում շարունակական բռնության համար քրեական պատասխանատվության բացակայությունը սահմանափակում է երեխաներին պաշտպանելու իշխանությունների հնարավորությունները։
Այս ֆոնին ուժգնացել են ընտանեկան բռնության դեմ պայքարի մասին օրենքի անհապաղ ընդունման կոչերը: Համապատասխան փոփոխություններն ու նախաձեռնությունները խորհրդարան են ներկայացվել դեռևս 2025 թվականի վերջին, սակայն մինչ օրս չեն ընդունվել:
Իրավապաշտպաններն ու հասարակական գործիչներն ընդգծում են, որ խորհրդարանն ունի հնարավորություն ցուցադրելու երեխաների և ընտանիքների պաշտպանության հարցերի հանդեպ իր իրական հետաքրքրությունը։
Նրանք ասում են, որ Մաճարա գյուղում տեղի ունեցած ողբերգությունը կարող է դառնալ շրջադարձային պահ՝ հույս ներշնչելով, որ ընտանեկան բռնության կանխարգելման մասին օրենքը վերջապես կընդունվի:
Երեխայի մահից ցնցված հասարակությունն իշխանություններից ակնկալում է ոչ միայն հետաքննություն, այլև համակարգային լուծումներ, որոնք կօգնեն ապագայում կանխել նմանատիպ ողբերգությունները։
