Դեկտեմբերի 10-ին Մոսկվայում կայացել է տարածաշրջանային նոր հարթակի՝ «3+3»-ի առաջին հանդիպումը։ Նախնական հանդիպմանը մասնակցել են Ռուսաստանի, Իրանի, Հայաստանի, Թուրքիայի և Ադրբեջանի փոխարտգործնախարարները։ Վրաստանի ներկայացուցիչը, ինչպես և նախապես հայտարարվել էր, ներկա չի եղել հանդիպմանը։
Խորհրդակցական հարթակի ձևավորմանն ուղղված հանդիպումը կազմակերպվել էր Ռուսաստանի արտաքին գերատեսչության հրավերով։
Հանդիպմանը Հայաստանը ներկայացրել է փոխարտգործնախարար Վահե Գևորգյանը, որը նախանիստի առիթն օգտագործել է ևս մեկ անգամ հայկական կողմի դիրքորոշումը հնչեցնելու համար․
«Հարթակի օրակարգը պետք է միտված լինի տարածաշրջանային համագործակցության փոխշահավետ և փոխընկալելի օրակարգի ձևավորմանը՝ զերծ մնալով միջազգային այլ հարթակների, այդ թվում՝ հակամարտությունների կարգավորման մանդատ ունեցող ձևաչափերի գործունեության կրկնորդումներից»։
Հայաստանի արտաքին գերատեսչության տեղեկացմամբ՝ քննարկվել են տարածաշրջանային հնարավոր համագործակցության շրջանակները, որոնք ներառել են տնտեսության, տրանսպորտի, մշակույթի և հումանիտար բնագավառներին վերաբերող հարցեր։ Պայմանավորվածություն է ձեռք բերվել շարունակել խորհրդակցությունները՝ հիմնվելով տարածաշրջանի բոլոր երկրների իրավունքների հարգման և ներգրավման անհրաժեշտության վրա։
Հատկանշական է, որ հարթակի շրջանակում առաջին հանդիպումից առաջ Մոսկվայում Վահե Գևորգյանին ընդունել էր ՌԴ արտգործնախարարի տեղակալ Անդրեյ Ռուդենկոն։
«Վստահաշատ և կառուցողական միջավայրում քննարկվել են երկկողմ, ինչպես նաև՝ միջազգային ու տարածաշրջանային օրակարգի հարցեր», — հաղորդել էր ՌԴ արտաքին գերատեսչությունը։
Նոր հարթակի շրջանակներում տարածաշրջանի երկրների երկխոսության փորձը տեղի է ունենում հայ-ադրբեջանական սահմանին իրավիճակի սրման ֆոնին։
Արդեն երեք օր է, ինչ իրավիճակը չի հաջողվում կայունացնել։ Վերջին 1 օրում տեղի ունեցած փոխհրաձգության արդյունքում հայկական կողմն ունի 1 զոհ և 8 վիրավոր։
Հայաստանի արտաքին գործերի նախարարությունը դատապարտել է Ադրբեջանի սադրիչ գործողություններն ու կոչ արել զերծ մնալ նաև սադրիչ հռետորաբանությունից, այդ թվում՝ այսպես կոչված «Զանգեզուրի միջանցքի» շուրջ։
Թուրքիայի նախաձեռնած «3+3» ֆորմատին Հայաստանը համաձայնել է մասնակցել այն պայմանով, որ չպետք է քննարկվեն այնպիսի հարցեր, որոնք արդեն իսկ քննարկվում են այլ ձևաչափերի շրջանակում։ Խոսքը Լեռնային Ղարաբաղի կարգավիճակի ու հակամարտության կարգավորման, սահմանագծման ու սահմանազատման, ինչպես նաև տարածաշրջանի կոմունիկացիաների ապաշրջափակման հարցերի մասին է։
Հայկական կողմի այս դիրքորոշումը վարչապետ Նիկոլ Փաշինյանը վերահաստատեց նաև օրեր առաջ՝ ԱԺ-Կառավարություն հարցուպատասխանի ժամանակ։
«Առիթ ենք ունեցել մի քանի անգամ ասել, որ «3+3» ձևաչափով կարող ենք հետաքրքրված լինել, եթե պարզվի, որ այդ հարթակներում չեն քննարկվելու այնպիսի հարցեր, որոնց վերաբերյալ մենք ներգրավված ենք այլ ձևաչափերում։ Այդ հարցը քննարկել ենք մեր գործընկերների, մասնավորապես՝ ռուսաստանցի գործընկերների հետ և ունենք ազդակ, որ իրենք էլ կիսում են այդ տեսակետը», — ընդգծել էր Նիկոլ Փաշինյանը:
