Հայաստանը 250 մլն դոլարի վարկ կներգրավվի ԼՂ-ից բռնի տեղահանվածների բնակապահովման համար
250 մլն դոլարի վարկ արցախցիների բնակապահովման համար
Հայաստանն Ասիական զարգացման բանկից 250 մլն դոլար վարկային միջոցներ կներգրավի։ Գումարն ուղղվելու է Լեռնային Ղարաբաղից բռնի տեղահանված ընտանիքների համար իրականացվող բնակարանային ապահովման պետական աջակցության ծրագրի ֆինանսավորմանը։
Ծրագիրն իրականացվում է 2024 թ․-ից։ Նախորդ տարի արցախցիների բնակապահովման նպատակին կառավարությունն ուղղել է 65 մլրդ դրամ։ Աշխատանքի և սոցիալական հարցերի փոխնախարար Դավիթ Խաչատրյանի փոխանցմամբ՝ 2025 թ․-ին այն կգերազանցի 40 մլրդ դրամը։
2023 թ․-ի սեպտեմբերին ԼՂ-ում համարյա 10-ամսյա շրջափակաման, ապա ռազմական գործողությունների հետևանքով տեղի ունեցավ էթնիկ զտում։ Շուրջ 120 հազար հայեր տեղահանվեցին իրենց բնօրրանից։ Մինչ օրս ՀՀ քաղաքացիություն է ստացել 26․233 անձ։ Դա պարտադիր պայման է պետական աջակցության ծրագրի շահառու դառնալու համար։
«Քաղաքացիության համար դիմած և դեռևս մշակման փուլում գտնվող քաղաքացիների թիվը կազմում է 6696 անձ»,- ԱԺ արտահերթ նիստում տեղեկացրել է Դավիթ Խաչատրյանը։
- Փաշինյանն առաջարկում է փակել արցախցիների վերադարձի և «Արևմտյան Ադրբեջանի» թեմաները
- «Զիջումներ պատերազմի հետաձգման դիմա՞ց»․ ԼՂ-ի բանակցային ժառանգությունը
- 44-օրյա պատերազմի մասին զեկույցը բաց ռեժիմով չի քննարկվի. ինչի՞ց է խուսափում ՀՀ իշխանությունը
Նպատակը տեղահանվածների սոցիալ-տնտեսական ինտեգրմանն աջակցելն է
Օրենքի նախագծի նպատակը Հայաստանում կայուն, դիմացկուն և ներառական բնակարանային համակարգ զարգացնելն է՝ աջակցելով «փախստականների սոցիալ-տնտեսական ինտեգրմանը և բարեկեցությանը»։
«Ծրագիրը նպատակաուղղված է բնակարանային քաղաքականության երկարաժամկետ զարգացմանը և դրա իրականացման գործընթացների կատարելագործմանը»,- ասված է նախագծի փորձաքննական եզրակացության մեջ։
Խորհրդարանի արտահերթ նիստում Աշխատանքի և սոցիալական հարցերի փոխնախարար Դավիթ Խաչատրյանը տեղեկացրել է՝ ֆինանսական միջոցները տրամադրվելու են ՀՀ և Ասիական զարգացման բանկի միջև «Կենսունակության բարելավման և հզորացման համար բնակարանային բարեփոխումներ» (THRIVE) ծրագրի վարկային համաձայնագրի շրջանակում։ Խոսքը 250 մլն դոլարի մասին է։
Ասիական զարգացման բանկից (ԱԶԲ) բացի դրամական միջոցներ է հատկացնելու նաև «Արտոնյալ ֆինանսավորման գլոբալ գործիքի հիմնադրամը» (Global concessional financing facility)։ Դրանք նույնպես կառավարելու է ԱԶԲ-ն։
«Արտոնյալ ֆինանսավորման գլոբալ գործիքի հիմնադրամի կողմից տրամադրվող դրամաշնորհային միջոցներն էլ կազմում են 16 մլն 450 հազար դոլար, որն ուղղված է լինելու վարկային ծրագրի համաֆինանսավորմանը»,- մանրամասնել է Խաչատրյանը։
Օրենքի նախագծի համաձայն՝ վարկային միջոցների մասհանման վերջնաժամկետը 2030 թ․-ի դեկտեմբերի 31-ն է։ Վարկը տրամադրվում է 27 տարի ժամկետով, առաջին 10 տարին սահմանված է որպես «արտոնյալ ժամկետ»։
Տեղահանված 3810 ընտանիք հավաստագիր ունի, 1631-ն արդեն տուն է ձեռք բերել
Դեռևւս 2024 թ․-ից իրականացվող բնակարանային ապահովման պետական աջակցության ծրագրի շրջանակում Լեռնային Ղարաբաղից բռնի տեղահանված արցախցիները մի շարք պայմանների բավարարելու պարագայում դիմում են, ստանում բնակարանի գնման հավաստագրեր։
Աջակցությունը տրամադրվում է ընտանիքի յուրաքանչյուր անդամի հաշվարկով, յուրաքանչյուրին տրվում է 3-5 մլն դրամ՝ կախված բնակավայրից, որտեղ ուզում են անշարժ գույք ձեռք բերել։
«Այսօրվա դրությամբ 3810 ընտանիք դիմել ու ստացել է բնակարանի հավաստագիր, նրանցից 1631-ը ձեռք է բերել տուն»,- հայտնել է Աշխատանքի և սոցիալական հարցերի փոխնախարար Դավիթ Խաչատրյանը։
Ասիական զարգացման բանկից ներգրավվող միջոցներով գործադիրը նախատեսում է «ապահովել շուրջ 109․000 էթնիկ հայ փախստականների համար երկարաժամկետ բնակարանային լուծումներ»։
Հետևեք մեզ — Facebook | Youtube
250 մլն դոլարի վարկ արցախցիների բնակապահովման համար
