«Ընտրել ենք ակտիվ միջնորդության ճանապարհը»․ Ֆրանսիայի ԱԺ նախագահը Երևանում
Ֆրանսիայի խորհրդարանի խոսնակը Երևանում
«Քանի դեռ հնարավոր խաղաղության և երկխոսության ճանապարհը փակ չէ, այլ միջոցներ կիրառելը տեղին չէ»,- ասել է Ֆրանսիայի խորհրդարանի նախագահը՝ պատասխանելով հարցին, թե արդյո՞ք Փարիզը պատժամիջոցներ կկիրառի Բաքվի նկատմամբ։
Հայաստանի ԱԺ նախագահի հետ համատեղ ասուլիսի ժամանակ Յաել Բրաուն-Պիվեն նշել է, որ ինքը վարչապետ կամ նախագահ չէ, որ արձագանքի Երևանին ռազմական աջակցություն տրամադրելու մասին հարցին։ Պաշտոնյան չի բացահայտել նաև այն, թե որ երկրի կամ երկրների դիրքորոշումն է պատճառ հանդիսացել ՄԱԿ Անվտանգության խորհրդի հայտարարության չընդունման համար։
Ֆրանսիայի խորհրդարանի խոսնակ Յաել Բրաուն–Պիվեի գլխավորած պատվիրակությունը Երևան է ժամանել երեկ՝ հունվարի 12-ին, Հայաստանի ԱԺ նախագահի հրավերով։ ՀՀ-ում Ֆրանսիայի դեսպանատան տարածած հաղորդագրության համաձայն՝ այցի նպատակն այս դժվար օրերին Ֆրանսիայի համերաշխությունը Հայաստանին հավաստելն է։
Այսօր առավոտյան հայ և ֆրանսիացի գործընկերներն այցելել էին Ծիծեռնակաբերդի հուշահամալիր, այնուհետև առանձնազրույց և ընդլայնված կազմով հանդիպում անցկացրել։ Խորհրդարանների նախագահները ստորագրել են հետագա համագործակցությունն ընդլայնող համաձայնագիր, այնուհետև հանդես եկել համատեղ մամուլի ասուլիսով։
Ասուլիսի կարևոր դրվագները և փորձագիտական կարծիք
Յաել Բրաուն-Պիվե․ «Ամեն ինչ կանենք հումանիտար աղետից խուսափելու համար»
Անդրադառնալով Լաչինի միջանցքի արգելափակմանը՝ Ֆրանսիայի խորհրդարանի խոսնակը հայտարարել է, որ Ֆրանսիան կանի «ամեն ինչ հումանիտար աղետից խուսափելու համար»։ Նրա փոխանցմամբ՝ իր երկրին մտահոգում է ԼՂ-ի շրջափակումը, վատթարացող մարդասիրական իրավիճակը։
«Շատ կարևոր է, որ ճանապարհը բացվի, վերականգնվի Հայաստանի և Ադրբեջանի [նկատի ունի Լեռնային Ղարաբաղը] միջև ազատ տեղաշարժը, ինչպես նաև էլեկտրաէներգիան և ինտերնետային կապը»,- ընդգծել է նա։
Յաել Բրաուն-Պիվեի գնահատմամբ՝ «առկա են լարվածություններ, որոնք ակտիվանում են՝ խոցելի դարձնելով Հայաստանը»։ Ասում է՝ Ֆրանսիան միշտ եղել է և այսօր էլ կանգնած է եղբայրական Հայաստանի կողքին` ամրապնդելու նրա սուվերենությունն ու անկախությունը․
«Այն պահին, երբ միջազգային իրավունքի սկզբունքներն են ոտնահարվում Ուկրաինայում, որտեղ Եվրոպայի ժողովրդավարական արժեքները վտանգված են, մենք վերահաստատում ենք՝ այդ բոլոր արժեքները պետք է մեր կողմնացույցը լինեն։ Ֆրանսիան իր համերաշխությունն է հայտնում Հայաստանին»։
Լրագրողները հետաքրքրվել են՝ ժամանակը չէ արդյո՞ք, որ Ֆրանսիան ճանաչի ԼՂ-ի անկախությունը։ Ի պատասխան՝ պաշտոնյան նշել է, որ դիրքորոշումը հայտնի է․ «Ֆրանսիան չի ճանաչում ԼՂ-ի անկախությունը, և դա համապատասխան է այն միջազգային իրավունքին, որին ենթարկվում են»։
Ընդգծել է՝ խաղաղ և կայուն լուծման հասնելու համար անհրաժեշտ է վերականգնել երկխոսությունը։ Խոսելով ԵԱՀԿ Մինսկի խմբի մասին՝ խորհրդարանի խոսնակն ասել է, որ այն երկխոսության «շատ կարևոր հարթակներից մեկն է», թեև միակը չէ։ Յաել Բրաուն-Պիվեի կարծիքով՝ «պետք է փորձել բոլոր միջոցները, որպեսզի հնարավորինս շուտ իրավիճակի լարումը դադարի»։
Նրա փոխանցմամբ՝ հայ-ադրբեջանական կարգավորման գործընթացում Փարիզն ընտրել է «հնարավորինս ակտիվ միջնորդության» ճանապարհը և չի սահմանափակվում միայն հայտարարություններով։ Հիշեցրել է սենատի և խորհրդարանի ստորին պալատի կողմից ընդունված բանաձևերի մասին։
Ալեն Սիմոնյան․ «Ֆրանսիան մեզ պետք է որպես միջնորդ, ոչ թե կողմ»
Փարիզի ներգրավվածության մասին նման կարծիք է հայտնել Հայաստանի ԱԺ նախագահն ու վստահեցրել՝ Ֆրանսիան ամեն ինչ անում է «տարածաշրջան խաղաղություն բերելու, Հայաստանի և հայ ժողովրդի շահերը պաշտպանելու համար»։
Ալեն Սիմոնյանն արձագանքել է նաև ԵԱՀԿ Մինսկի խմբի հետագա գործունեությանն առնչվող հարցին։ Նրա խոսքով՝ ԱՄՆ, Ֆրանսիայի և ՌԴ կողմից եղել են հայտարարություններ այն մասին, որ պատրաստ են քննարկել ձևաչափի հետագա ճակատագիրը։ Մյուս կողմից նկատել է՝ կան նույն խնդրով զբաղվող այլ, ոչ պակաս կարևոր ֆորմատներ։ Այդ շարքում հիշատակել է նաև Պրահայի հանդիպումը, Փաշինյանի և Ալիևի բայակցությունները Եվրոպական խորհրդի նախագահ Շառլ Միշելի և Ֆրանսիայի նախագահ Էմանուել Մակրոնի մասնակցությամբ։
Փորձագիտական կարծիք
Քաղաքագետ Արեգ Քոչինյանը չի կարծում, թե Ֆրանսիայի ԱԺ նախագահի այցի արդյունքում «որևէ բովանդակային ձեռքբերում» կլինի։
«Այցն, ըստ էության, ունի քաղաքական աջակցության բովանդակություն, ավելի շատ սիմվոլիկ բնույթ է կրում, ցուցադրում է, որ Ֆրանսիան շատ դժվար իրավիճակում շարունակում է աջակցել Հայաստանին և Արցախի բնակչության իրավունքների պաշտպանության գործին»,— ասում է նա։
«Ազատության» հետ զրույցում Քոչինյանն անդրադարձել է նաև նախորդ տարվա նոյեմբերին Ֆրանսիայի օրենսդիրների ընդունած բանաձևերին։
Հայաստանին աջակցող ու Ադրբեջանի նկատմամբ պատժամիջոցներ առաջարկող բանաձևերը կոչ էին անում անհապաղ ազատ արձակել հայ ռազմագերիներին, իսկ կառավարությանն առաջարկում էին դիտարկել անհատական պատժամիջոցների կիրառման հնարավորությունը՝ Ադրբեջանի կողմից Հայաստանի ինքնիշխան տարածքի նկատմամբ հարձակումների և օկուպացիայի շարունակման պարագայում:
«Բանաձևը ստեղծեց հնարավորություններ Հայաստանի համար՝ ինչպես զարգացնելու հայ-ֆրանսիական հարաբերությունները, որակապես նոր մակարդակի բարձրացնելու, այնպես էլ աշխատելու թե՛ Ֆրանսիայի, թե՛ եվրոպական այլ երկրների հետ՝ ռազմաքաղաքական իրավիճակի վրա ազդեցություն ունենալու առումով»։
Քաղաքագետի գնահատմամբ՝ հայկական կողմը այդ հնարավորություններից, ըստ էության, չի օգտվել։
Ասում է՝ հնարավորություն կա ընդհուպ մինչև ռազմատեխնիկական ոլորտում համագործակցության հասնելու, բայց նաև հավելում՝ նախ պետք է փոխել «անվտանգային ճարտարապետությունը»։
«Քանի դեռ այդ ճարտարապետությունը չի փոխվում, Արևմուտքի հետ ցանկացած ռազմաքաղաքական համագործակցությունն ունի առաստաղ, և այդ առաստաղը ՀԱՊԿ-ն է»,- ամփոփել է Քոչինյանը։
Հետևեք մեզ — Facebook | Youtube | Telegram
Ֆրանսիայի խորհրդարանի խոսնակը Երևանում
