Երևանում ցույցերը շարունակվում են․ հին կարգախոսներ և նոր ձերբակալություններ։ Ֆոտոռեպորտաժ
Երևանում Ազատության հրապարակում նոյեմբերի 11-ից՝ Արցախում ռազմական գործողությունների դադարեցման մասին եռակողմ հայտարարության ստորագրման հաջորդ օրվանից, հանրահավաքներ են անցկացվում։ Բողոքի ակցիաները կազմակերպում են 17 ընդդիմադիր կուսակցությունները։ Ընդդիմության կոալիցիան վարչապետ Նիկոլ Փաշինյանի հրաժարականը պահանջում էր դեռևս նախքան Արցախի հարցով փաստաթղթի ստորագրումը։ Իսկ այժմ դա նրանց համար պարտադիր պայման է։
Հազարավոր մարդիկ սատարում են նրանց պահանջը, քանի որ համաձայն չեն այս փաստաթղթի պայմաններին, որը ստորագրել են Հայաստանի, Ադրբեջանի և Ռուսաստանի ղեկավարները։ Դրանով Ադրբեջանի վերահսկողության տակ են անցնում Արցախի հարակից շրջաններն, այնտեղ են վերադառնում փախստականները։ Հայաստանում կարծում են, որ սա Արցախն Ադրբեջանին ինքնակամ հանձնելու համաձայնագիր է։
Ակցիային մարդիկ իրենց հետ էին բերել «Իմ քայլն» իշխող դաշինքի պատգամավորների լուսանկարները, որոնց վրա անունների փոխարեն գրված էր «Մեկը՝ 88 դավաճաններից»։
Հավաքվածները վանկարկում էին՝ «Նիկոլ, հեռացիր», «Արցախը ես եմ», «Նիկոլ՝ դավաճան»։
Ելույթների ժամանակ ընդդիմության առաջնորդները հայտարարել են, որ վարչապետն Ադրբեջանի հետ անթույլատրելի գործարքի է գնացել։
Ցուցարարներին վերահսկում էր ոստիկանությունը։ Հանրահավաքի սկզբում ոստիկանները մի քանի ակտիվիստի են ձերբակալել։
«Բարգավաճ Հայաստան» կուսակցության պատգամավոր Իվետա Տոնոյանը հաղորդել է, որ իր յոթ գործընկերներին հարցաքննության են կանչել Հատուկ քննչական ծառայություն։
«Մենք գիտեինք, որ մեզ նման բան է սպասվում, սակայն չենք վախենում։ Մեզ չեն ստիպի լռել», — հայտարարել է նա։
Հանրահավաքը մոտ երեք ժամ է տևել։ Ընդդիմադիրները հաղորդել են, որ ակցիաներ են անցկացվելու նաև հանգստյան օրերին։ Նոյեմբերի 14-ի երեկոյան ջահերով ակցիա կանցկացվի՝ ի հիշատակ Արցախում զոհված զինծառայողների, իսկ նոյեմբերի 15-ին ժամը 16:00-ին կրկին հանրահավաք կկայանա։
